وبلىس اكىمى عاۋەز نۇرماعامبەتوۆ جاعدايدى باقىلاۋ جانە تۇزەتۋ ءۇشىن جەدەل شتاب قۇرىلعانىن ايتتى. ونىڭ ايتۋىنا قاراعاندا, قازىر ەلەكتر قۋاتىن بەرەتىن رەزەرۆتەگى گەنەراتورلار ىسكە قوسىلىپ, الەۋمەتتىك سالانىڭ عانا نىساندارىنا توك بەرىلگەن. ال جىلۋ ەش كىدىرىسسىز بەرىلىپ جاتىر.
سونىمەن قاتار توتەنشە جاعدايلارعا بايلانىستى ەكى ەلدىڭ اراسىنداعى ىنتىماقتاستىق تۋرالى كەلىسىمنىڭ شەڭبەرىندە رەسەيدەن ۋاقىتشا ەلەكتر قۋاتى الىناتىنى ايتىلدى. قالعانىن اقمولا وبلىسىنىڭ «كوكشەتاۋ-ەنەرگو» جشس قامتاماسىز ەتۋگە كەلىسىلگەن. بۇگىنگى تاڭدا وسى كاسىپورىننىڭ جوندەۋ بريگادالارى جۇمىس ىستەپ, تايىنشا, ايىرتاۋ, ع.مۇسىرەپوۆ اۋداندارىنىڭ 10 ەلدى مەكەنىنە ەلەكتر قۋاتىن جەتكىزۋ جۇمىستارىن جۇرگىزىپ جاتىر.
وبلىستاعى ەلەكتر قۋاتىن جەتكىزەتىن جۇيەنىڭ ءبارى – «سەۆكازەنەرگو» اكتسيونەرلىك قوعامىنىكى. قازىر ولاردىڭ 46 جوندەۋ بريگاداسى جۇمىس ىستەۋدە. ولار ەلەكتر قۋاتى ءسونىپ قالعان 30 ەلدى مەكەننىڭ جەلىلەرىن جوندەۋمەن اينالىسىپ جاتىر. سونىمەن بىرگە ع.نۇرماعامبەتوۆ بۇگىنگى تاڭدا ءالى 40 ەلدى مەكەنگە توق شەكتەۋلى كولەمدە عانا جەتكىزىلىپ وتىرعانىن دا ايتىپ ءوتتى.
وبلىستىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىعىنىڭ باسشىسى ۆلاديسلاۆ لۋكين تۇرعىنداردى اۋىز سۋمەن قامتاماسىز ەتەتىن «ەسىل سۋ» كومپانياسىنىڭ فيليالى تۇراقتى جۇمىس ىستەپ تۇرعانىن جەتكىزدى. سونىمەن بىرگە ول ەلەكتر جەلىلەرى مەن جاراقتار «سەۆكازەنەرگو» اق بولعاندىقتان, جوندەۋ جۇمىستارىنا بيۋدجەت قاراجاتى بولىنبەيتىنىن ايتتى. «وسىنداي جاعدايعا جالعىز جەلىنى قاتىرعان قارلى-جاڭبىر ەمەس, ەلەكترمەن قامتاماسىز ەتۋ جۇيەلەرىنىڭ توزعانى دا جەتكىزىپ وتىر. قازىر بۇل ماسەلە – وبلىس اكىمىنىڭ تىكەلەي باقىلاۋىندا», دەدى ول.
وبلىس اۋماعىنان وتەتىن استانا – پەتروپاۆل, جەزقازعان – پەتروپاۆل, الماتى – ەكاتەرينبۋرگ, كوكشەتاۋ – رۋزاەۆكا باعىتىنداعى اۆتوكولىك جولدارى جابىلدى. بىلەتىندەردىڭ ايتۋىنا قاراعاندا, مۇنداي اۋا رايى وسىدان 22 جىل بۇرىن بولعان ەكەن.
سولتۇستىك قازاقستان وبلىسى
