تورتجىلدىقتىڭ باستى دوداسىنىڭ العاشقى 90 جولداماسى بيىل قىركۇيەك ايىندا سەربيا استاناسى بەلگرادتا وتكەن الەم چەمپيوناتىندا تاراتىلدى. كەلەسى جىلدىڭ كوكتەمىندە ءار قۇرلىقتا ليتسەنزيالىق تۋرنيرلەر ۇيىمداستىرىلادى: امەريكا (28 اقپان – 1 ناۋرىز, اكاپۋلكو, مەكسيكا), افريكا (22-24 ناۋرىز, الەكساندريا, مىسىر), ەۋروپا (5-7 ءساۋىر, باكۋ, ازەربايجان) جانە ازيا (19-21 ءساۋىر, بىشكەك, قىرعىزستان). وسى باسەكەلەردە اقتىق سىنعا دەيىن القىنباي جەتكەن 144 بالۋان وليمپيادادا باق سىناۋ مۇمكىندىگىنە يە بولادى. سول سەبەپتى فينالدىق سايىستار وتپەيدى.
سوڭعى جاھاندىق جارىستى تۇركيانىڭ ىستانبۇل قالاسى قابىلدايدى. 9-12 مامىر ارالىعىندا انادولى ەلىندە جالاۋى جەلبىرەيتىن جارىستا 18 وليمپيادالىق سالماقتىڭ ارقايسىسىندا ءۇش جولدامادان ساراپقا سالىنادى.
