ل.گۋميلەۆ اتىنداعى ەۇۋ-ءدىڭ جۋرناليستيكا جانە ساياساتتانۋ فاكۋلتەتىنىڭ دەكانى, پروفەسسور قايرات ءومىرباي ۇلى مودەراتورلىق ەتكەن رۋحاني شارانى ل.گۋميلەۆ اتىنداعى ەۇۋ باسقارما مۇشەسى – اكادەميالىق ماسەلەلەر جونىندەگى پرورەكتور, ەكونوميكا عىلىمىنىڭ دوكتورى, پروفەسسور ماقىش سەرىك بيحان ۇلى ۋنيۆەرسيتەت رەكتورى ەرلان سىدىقوۆتىڭ قۇتتىقتاۋىمەن اشىپ, 26 مىڭ ستۋدەنتتى وقىتىپ وتىرعان ۇلكەن ۇجىمنىڭ اتىنان قۇتتىقتادى. سونىمەن قوسا عىلىم جانە جوعارى ءبىلىم ءمينيسترى ساياسات نۇربەكتىڭ قۇرمەت گراموتاسىن مەرەيتوي يەسىنە تابىس ەتتى.
بۇدان سوڭ, مەرەيتوي يەسى تۋرالى «پروفەسسوردىڭ پاراسات كەڭىستىگى» اتتى ۆيدەوفيلم كورسەتىلدى. ساۋلە تاپانوۆانىڭ 70 جىلدىق مەرەيتويى قارساڭىندا شىعارىلعان «ۇستاز. عالىم. ادىسكەر», «ساۋلەلى جىلدار» اتتى كىتاپتارى تانىستىرىلىپ, تۇساۋكەسەر ءراسىمى ءوتتى.
مۇنان سوڭ, باس رەداكتورلار كلۋبىنىڭ ۆيتسە-پرەزيدەنتى مۇراتبەك توقتاعازين پارلامەنت سەناتىنىڭ دەپۋتاتى, باس رەداكتورلار كلۋبىنىڭ پرەزيدەنتى بيبىگۇل جەكسەنبايدىڭ قۇتتىقتاۋىن وقىپ بەرىپ, بارلىق باس رەداكتورلار اتىنان قۇتتىقتاپ, سىي-سياپات جاسادى.
كافەدرا مەڭگەرۋشىسى, تاريح عىلىمدارىنىڭ دوكتورى, پروفەسسور تىلەگەن سادىق ۇلى: «عىلىمنىڭ قاينار بۇلاقتارى ايماقتاردان باستالادى, جەزقازعاندا پەداگوگيكالىق ينستيتۋت اشىلىپ, ءبىلىم-عىلىم, مادەنيەت كەلدى, ۇلكەن باستامالاردى وتكىزدىك. اكادەميك رىمعالي نۇرعاليەۆتىڭ «ايەلدەر بەينەسىن سەنەن ارتىق كىم جازادى» دەگەن ءسوزى ءالى كۇنگە جادىمىزدا تۇر. قازاق ايەلدەرىنىڭ بەينەسىن كورسەتۋدە ەڭبەگىڭىز زور» دەپ, عالىمنىڭ عىلىمعا قوسقان مول ەڭبەگى تۋرالى اتاپ ءوتتى.
ايتا كەتسەك, ساۋلە ەسەمبەكقىزىنىڭ مەرەيتويى وسىدان ءبىر اي بۇرىن تۋعان جەرى جەزقازعان قالاسىندا باستالعان بولاتىن. وسى ورايدا, جەزقازعاندا وتكەن رەسپۋبليكالىق عىلىمي-تاجىريبەلىك كونفەرەنتسيا ساتتەرىنەن شاعىن ۆيدەوكورىنىس كورسەتىلدى.
ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتى جۋرناليستيكا كافەدراسىنىڭ مەڭگەرۋشىسى فيلولوگيا عىلىمدارىنىڭ كانديداتى جانار رامازانوۆا, فيلولوگيا عىلىمدارىنىڭ دوكتورى, پروفەسسور ۆەرا ابيشەۆا, بايقوڭىر اتىنداعى جەزقازعان ۋنيۆەرسيتەتىنىڭ قازاق ءتىلى مەن ادەبيەتى كافەدراسىنىڭ وكىلدەرى كامشات وماروۆا, ەلميرا حاميتوۆا, استاناداعى س.سەيفۋللين اتىنداعى اگرارلىق ۋنيۆەرسيتەتتىڭ وكىلى تولەگەن حاميت ۇلى, ەلورداداعى ەكونوميكا جانە بيزنەس ۋنيۆەرسيتەتىنىڭ وكىلدەرى قاناعات التايبەكوۆا, تولەۋتاي ماحمەت ۇلى قۇتتىقتاۋ ءسوز سويلەپ, اتالعان ۋنيۆەرسيتەتتەردىڭ رەكتورلارىنىڭ قۇتتىقتاۋ حاتتارىن وقىپ بەردى, سونىمەن قوسا, ۇلىتاۋ وبلىسى اكىمىنىڭ «قۇرمەت» گراموتاسى جانە جەزقازعان قالاسى اكىمىنىڭ «قۇتتىقتاۋ حاتى» تابىس ەتىلدى.
ءباسپاسوز جانە باسپا ءىسى كافەدراسىنىڭ مەڭگەرۋشىسى امانگەلدى مەيرام ۇلى, ساياساتتانۋ كافەدراسىنىڭ مەڭگەرۋشىسى باعىش احمەتقىزى, تەلەۆيزيا جانە قوعاممەن بايلانىس كافەدراسىنىڭ مەڭگەرۋشىسى سەرىكزات دۇيسەنعازى مەرەيتوي يەسىن قۇتتىقتاپ, بەلگىلى اقىندار جانات اسكەربەكقىزى مەن سەرىكزات دۇيسەنعازى عالىمعا ارناعان ولەڭدەرىن وقىدى.
ايتا كەتسەك, «جۋرناليستيكا مەن ادەبيەتتانۋدىڭ وزەكتى ماسەلەلەرى جانە دامۋ پاراديگمالارى» اتتى حالىقارالىق عىلىمي-پراكتيكالىق كونفەرەنتسياسىسىنىڭ ماتەريالدارى كەيىن جەكە جيناق بولىپ شىعادى.
ساۋلە ەسەمبەكقىزى تاپانوۆانىڭ «قازاق روماندارىنداعى عاشىقتىق سارىن» (2007), «قازاق باسىلىمدارىنداعى ايەلدەر بەينەسى» (2013) «قازاق روماندارىنداعى ايەلدەر بەينەسى» (2017) اتتى مونوگرافيالارى جارىق كوردى. كوپتەگەن جيناقتاردى قۇراستىرۋشى. ءۇش جۇزدەي عىلىمي ماقالالاردىڭ اۆتورى. 2 ماقالاسى قحر, سينديان جاستار-ورەندەر باسپاسىنان, 6 ماقالا رەسەي, 2 ماقالا فرانتسيا (پاريج), 1 ماقالادان پولشا, اۆستريا, ينديا, تۇركيا ت.ب. ەلدەرىنەن جارىققا شىقتى.
