ماۋلەن اشىمباەۆ كەزدەسۋگە قاتىسۋشىلارعا ءىلتيپات ءبىلدىرىپ, ەل ەكونوميكاسىندا الەۋمەتتىك كاسىپكەرلىكتىڭ ءرولى ارتىپ كەلە جاتقانىن جانە بۇل سالانىڭ دامۋىنا مەملەكەت باسشىلىعى تاراپىنان ەرەكشە كوڭىل ءبولىنىپ وتىرعانىن اتاپ ءوتتى.
«الەۋمەتتىك كاسىپكەرلەر – مەملەكەتتىك ينستيتۋتتاردىڭ ماڭىزدى سەرىكتەستەرى. ولار ەكونوميكانىڭ دامۋىنا جانە وزەكتى الەۋمەتتىك پروبلەمالاردى شەشۋگە ەلەۋلى ۇلەس قوسىپ كەلەدى. قازىرگى تاڭدا قازاقستاندا الەۋمەتتىك كاسىپكەرلەر رەەسترىنە 200-دەن استام كاسىپورىن تىركەلگەن. ءبىزدىڭ ەلىمىزدە الەۋمەتتىك كاسىپكەرلىكتىڭ الەۋەتى الدەقايدا جوعارى. سوندىقتان الداعى ۋاقىتتا بۇل سالانىڭ دايەكتى تۇردە دامۋى جالعاسا بەرەدى دەپ سەنەمىز», دەگەن پالاتا سپيكەرى قاتىسۋشىلاردى قازاقستانداعى الەۋمەتتىك كاسىپكەرلەردى مەملەكەتتىك قولداۋ تەتىكتەرىمەن تانىستىردى.
الەۋمەتتىك كودەكستىڭ نورمالارىن تالقىلاۋ كەزىندە مۇگەدەكتىگى بار ادامداردى جانە حالىقتىڭ الەۋمەتتىك وسال توپتارىن جۇمىسپەن قامتۋ, ولارعا بەرىلەتىن مۇمكىندىكتەردى كەڭەيتۋ ماسەلەلەرىنە ەرەكشە نازار اۋدارىلدى.
سەنات توراعاسى ورتالىق ازيا جانە تمد ەلدەرىندەگى ارىپتەستەرمەن بارلىق سالادا, ونىڭ ىشىندە زاڭنامالىق تاجىريبە الماسۋ باعىتىندا ىنتىماقتاستىقتى نىعايتۋدىڭ ماڭىزدى ەكەنىن تىلگە تيەك ەتتى. سونداي-اق ول وسىنداي ءداستۇرلى دوستىق قارىم-قاتىناستار مەن ءوزارا ءتيىمدى بايلانىستى دامىتۋ ەلدەرىمىز ءۇشىن نەگىزگى باسىمدىقتاردىڭ ءبىرى بولىپ سانالاتىنىن ايتتى.
«سوڭعى جىلدارى ءبىزدىڭ ەلدەرىمىزدىڭ بايلانىسى كوپتەگەن باعىت بويىنشا ناتيجەلى جانە سەرپىندى دامىپ كەلەدى. ءوڭىر مەملەكەتتەرىنىڭ باسشىلارى ەكىجاقتى جانە كوپجاقتى فورماتتا ءاردايىم كەزدەسىپ تۇرادى. ولار ىنتىماقتاستىقتى نىعايتۋدىڭ وزەكتى ماسەلەلەرىن تالقىلاپ, وڭىرلىك جانە حالىقارالىق كۇن ءتارتىبىنىڭ ماڭىزدى اسپەكتىلەرى بويىنشا ۇستانىمداردى كەلىسىپ وتىرادى. پارلامەنتتىك باعىت بويىنشا دا ءبىز ءوزارا ءىس-قيمىل مەن ىنتىماقتاستىقتى دايەكتى تۇردە دامىتىپ كەلەمىز. بۇل فورۋم ورتالىق ازياداعى الەۋمەتتىك كاسىپكەرلەردىڭ تىعىز قارىم-قاتىناس ورناتۋىنا جول اشاتىن تۇراقتى جانە ءتيىمدى الاڭ بولادى دەپ ۇمىتتەنەمىز. قازاقستان پارلامەنتىنىڭ سەناتى وسى باستاماعا قاجەتتى قولداۋ كورسەتۋگە جانە وڭىرلىك الەۋمەتتىك باستامالاردى ىسكە اسىرۋعا ىقپال ەتۋگە دايىن», دەدى ماۋلەن اشىمباەۆ.
ءوز كەزەگىندە كەزدەسۋگە قاتىسۋشىلار قازاقستاننىڭ الەۋمەتتىك كاسىپكەرلىكتى قولداۋ سالاسىنداعى تاجىريبەسىنە نازار اۋدارىپ, ونى زەردەلەۋدىڭ ماڭىزدىلىعىن اتاپ ءوتتى. ايتا كەتەيىك, مەملەكەت باسشىسى قاسىم-جومارت توقاەۆتىڭ تاپسىرماسى بويىنشا 2021 جىلى الەۋمەتتىك كاسىپكەرلىك تۋرالى زاڭ ازىرلەنىپ, قابىلداندى. وندا قىزمەتتىڭ قۇقىقتىق نەگىزدەرى, الەۋمەتتىك كاسىپكەرلىكتى مەملەكەت تاراپىنان قولداۋ تەتىكتەرى ايقىندالدى.
قۇرىلتاي بارىسىندا اۋىلدىق جەرلەردە الەۋمەتتىك كاسىپكەرلىكتى دامىتۋ جانە ونى قارجىلاندىرۋ, ءتيىستى جەلىلەر مەن قاۋىمداستىقتار قۇرۋ جونىندەگى يدەيالار دا ايتىلدى. ەكولوگيا جانە ورنىقتى دامۋ سالاسىنداعى جوبالاردى قولعا الۋ, سونداي-اق, مەملەكەتتىك ورگاندارمەن جانە بيزنەس-قوعامداستىقپەن ارىپتەستىك قاتىناستاردى نىعايتۋ ماسەلەلەرى دە ءسوز بولدى.
ەكى كۇنگە جالعاساتىن ورتالىق ازيا الەۋمەتتىك كاسىپكەرلەرىنىڭ قۇرىلتايىندا الەۋمەتتىك كاسىپكەرلىك جانە قارجىلىق مودەلدەۋ, بيزنەس-ستراتەگيالاردى ازىرلەۋ, ساتۋ مەن ماركەتينگتى ۇيىمداستىرۋ بويىنشا شەبەرلىك ساباقتارى وتكىزىلەدى. ۇيىمداستىرۋشىلار اراسىندا ەمين اسكەروۆ, ايگەرىم جانالينوۆا, مەرۋەرت جۇنىسبەك, گۇلميرا پارمىشەۆا سياقتى الەۋمەتتىك كاسىپكەرلىك سالاسىنداعى تانىمال ترەنەرلەر مەن كوۋچتار بار.
سونىمەن قاتار ءىس-شارا اياسىندا «Impact_onim» الەۋمەتتىك كاسىپكەرلەر ونىمدەرىنىڭ جارمەڭكەسى جانە مامانداندىرىلعان ەكسكۋرسيا وتەدى. سونىڭ بارىسىندا قاتىسۋشىلار «Green TAL» شەبەرحاناسىنىڭ, «Up and Go» دامۋ ورتالىعىنىڭ جانە «زامانداس 21» اۋلا كلۋبىنىڭ قىزمەتىمەن تانىسادى.
