كەزدەسۋ بارىسىندا ۇكىمەت حالىقارالىق ۆاليۋتا قورىمەن سەرىكتەستىككە ۇلكەن ءمان بەرەتىنى جانە ونىڭ قازاقستان ەكونوميكاسىن دامىتۋعا قوسقان ۇلەسىن جوعارى باعالايتىنى اتالىپ ءوتىلدى.
بيىل حالىقارالىق ۆاليۋتا قورىنىڭ باسقارۋشى ديرەكتورى كريستالينا گەورگيەۆانىڭ قازاقستانعا ساپارى جانە الماتىدا كاۆكاز, ورتالىق ازيا ەلدەرى جانە موڭعوليا ءۇشىن الەۋەتتى دامىتۋ جونىندەگى وڭىرلىك ورتالىقتىڭ اشىلۋى سياقتى ماڭىزدى وقيعالار باعانى بەلگىلى.
ءاليحان سمايىلوۆ اتاپ وتكەندەي, بۇگىندە ەل ەكونوميكاسى جاڭا جاعدايعا بەيىمدەلىپ, تۇراقتى ءوسىم كورسەتتى. اتاپ ايتقاندا, 10 ايدىڭ قورىتىندىسى بويىنشا ءىجو ءوسىمى 4,9%-دى قۇرادى. نەگىزگى كاپيتالعا سالىنعان ينۆەستيتسيالار 12,6%-عا ءوستى. بۇل – الداعى 2024 جىلعى وڭ ديناميكا ءۇشىن قاجەتتى شارت. سونىمەن قاتار ۇكىمەت پەن ۇلتتىق بانكتىڭ بىرلەسكەن شارالارىن جۇزەگە اسىرۋ ناتيجەسىندە ينفلياتسيانىڭ ايتارلىقتاي باياۋلاۋى بايقالادى.
ۇكىمەت باسشىسى حالىقارالىق رەيتينگتىك اگەنتتىكتەردىڭ قازاقستاننىڭ تاۋەلسىز نەسيەلىك رەيتينگىن ينۆەستيتسيالىق دەڭگەيدە راستاعانىن ايتتى. سونداي-اق قازان ايىندا «Moody's» اگەنتتىگى رەيتينگ بويىنشا بولجامىن «تۇراقتىدان» «وڭ كورسەتكىشكە» دەيىن جاقسارتتى.
پرەمەر-ءمينيستردىڭ سوزىنشە, قازىرگى ۋاقىتتا قازاقستاندا سالىق-بيۋدجەت ساياساتىن جەتىلدىرۋ جۇمىستارى جۇرگىزىلىپ جاتىر. بيۋدجەتتىك ۇدەرىستەردى وڭتايلاندىرۋعا, بيۋدجەتارالىق قاتىناستاردى جاقسارتۋعا جانە جالپى مەملەكەتتىك قارجىنى باسقارۋ ساپاسىن ارتتىرۋعا باعىتتالعان جاڭا بيۋدجەت كودەكسى ازىرلەنۋ ۇستىندە. بۇدان بولەك, جاڭا سالىق كودەكسى ازىرلەنىپ جاتىر.
ء«بىزدىڭ باستى مىندەتىمىز – ماكروەكونوميكالىق تۇراقتىلىقتى جانە تۇراقتى ەكونوميكالىق ءوسۋدى ءارى قاراي قامتاماسىز ەتۋ. وسى تۇرعىدا حالىقارالىق ۆاليۋتا قورىنا تۇراقتى قولداۋ كورسەتكەنى ءۇشىن ريزاشىلىعىمىزدى بىلدىرەمىز», دەدى ءاليحان سمايىلوۆ.
نيكوليا بلانشە قازاقستاننىڭ بولاشاقتا اۋقىمدى ەكونوميكالىق وسۋگە قول جەتكىزۋى ءۇشىن قۋاتى مەن مۇمكىندىكتەرى جەتكىلىكتى ەكەنىن اتاپ ءوتتى.
ء«بىز رەسپۋبليكانىڭ قارقىندى ءوسۋ جولىنداعى امبيتسياسىن كورىپ وتىرمىز جانە قول جەتكىزگەن جەتىستىكتەرىن ەسكەرەمىز. العا جىلجۋ كوپتەگەن سالادا بايقالادى. بۇل وسىمگە قانداي جولمەن قول جەتكىزىلەتىنى وتە ماڭىزدى. ءبىز كەڭەستەرىمىز بەن ۇسىنىستارىمىزدا ءدال وسى جولداردى كورسەتەمىز. ءبىزدىڭ ويىمىزشا, جەكە سەكتور مەملەكەتتىڭ قولداۋىمەن جەتەكشى ءرول اتقارۋى كەرەك», دەدى حۆق-نىڭ قازاقستانداعى ميسسياسىنىڭ باسشىسى.
كەزدەسۋ قورىتىندىسى بويىنشا تاراپتار قازاقستاننىڭ قارجى سەكتورىن ودان ءارى جەتىلدىرۋ جانە دامىتۋ ءۇشىن ءوزارا ءىس-قيمىلدى جالعاستىرۋعا دايىن ەكەندەرىن راستادى.
