قازىر اتالعان نىساندا جوندەۋ جۇمىستارى تاپسىرىس بەرۋشىنىڭ كەلىسىمىنسىز جيىرما كۇننەن اسا ۋاقىتقا توقتاتىلعان. باسقارما تاراپىنان جوندەۋ جۇمىستارىن جانداندىرۋ جونىندە بىرنەشە رەت ەسكەرتۋ دە جولدانعان. وسىعان قاراماستان مەردىگەر ۇيىم ءوز مىندەتىنە تەك قازان ايىندا عانا قايتا كىرىسكەن. سونىمەن قاتار تەحنيكالىق قاداعالاۋ ۇيىمى تاراپىنان دا ەسكەرتۋلەر بەرىلگەنىمەن, مەردىگەر بۇعان قۇلاق اسپاعان.
بايزاقوۆ كوشەسىنىڭ بويىنداعى گوگول كوشەسىنەن باستاپ, رايىمبەك داڭعىلىنا دەيىنگى بولىگىنىڭ بەتكى قاباتى 24 تامىزدا تاپسىرىس بەرۋشىگە ەسكەرتۋسىز, ءتيىستى جول بەلگىلەرىمەن قوسا قىرىپ تاستالعان. وسىلايشا, قازىرگى كەزدە بۇل كوشەنىڭ اتالعان بولىگى كولىك پەن جاياۋ جۇرگىنشىلەر ءۇشىن قاۋىپتى بولىپ تۇر.
كەلىسىمشارت تالاپتارىنا سايكەس تاپسىرىس بەرۋشى ەكىنشى تاراپتىڭ ورەسكەل قاتەلىكتەرىنە بايلانىستى مامىلەنى بەكىتىلگەن مەرزىمىنەن بۇرىن بۇزۋعا قۇقىلى. كەلىسىمشارت تالاپتارىن بۇزۋعا تاپسىرىس بەرۋشىنىڭ كەلىسىمىنسىز جۇمىستاردى 15 كۇننەن ارتىق ۇزاققا توقتاتۋ دا كىرەدى. سوندىقتان جول قاۋىپسىزدىگى مەن قالا تۇرعىندارىنىڭ جايلىلىعىن قامتاماسىز ەتۋ ماقساتىندا باسقارما قولدانىستاعى زاڭناما اياسىندا شارا قولدانۋعا نيەتتەنىپ وتىرعان جايى بار. مەملەكەتتىك ساتىپ الۋلار تۋرالى زاڭعا سايكەس تاپسىرىس بەرۋشى تاراپىنان كەلىسىمشارتتى بىرجاقتى بۇزۋ تۋرالى ەسكەرتۋ جولدانىپ, وعان قوسا ايىپپۇل سالۋ دا قاراستىرىلعان.
كولىك قوزعالىسىنىڭ جيىلىگىن ەسكەرە وتىرىپ جانە اپاتتىق جاعدايلاردىڭ الدىن الۋ ماقساتىندا گوگول كوشەسىنەن رايىمبەك داڭعىلىنا دەيىنگى بولىكتىڭ ورتاشا جوندەۋ جۇمىستارىن كاسىپتىڭ الەۋمەتتىك جاۋاپكەرشىلىگى اياسىندا وزگە مەردىگەر ۇيىمدار اياقتايدى.
ەسكە سالا كەتسەك, بيىل الماتىدا جالپى 200 شاقىرىم جولدى ورتاشا جوندەۋ جوسپارلانعان. قازىر نەگىزگى ماگيسترالدى كوشەلەردەگى جۇمىستار اياقتالدى. ينجەنەرلىك جەلىلەردى ۇيىمداستىرۋ جۇمىستارى ۋاقتىلى اياقتالعان جاعدايدا اۋداندىق ماڭىزى بار جولدارداعى جوندەۋ جۇمىستارىن قاراشا ايىنىڭ سوڭىنا دەيىن ءبىتىرۋ جوسپارلاندى. وسىلايشا, جىل قورىتىندىسى بويىنشا جاقسى جانە قاناعاتتانارلىق ساپاداعى جول ۇلەسىن 86%-دان 89%-عا دەيىن كوتەرۋ كوزدەلىپ وتىر.
الماتى
