الەمدىك سپورت تاريحىندا الەكساندر كارەليننىڭ الاتىن ورنى ەرەكشە. 1967 جىلدىڭ 19 قىركۇيەگىندە نوۆوسىبىردە دۇنيەگە كەلگەن بولاشاق جۇلدىز 13 جاسىنان باستاپ, گرەك-ريم كۇرەسىنە دەن قويدى. جاسوسپىرىمدەر مەن جاستاردىڭ جارىسىندا قارسىلاس شاق كەلتىرمەگەن ول العاش رەت 1987 جىلى ەرەسەكتەر دۋىندا تىرناقالدى تابىسقا قول جەتكىزەدى. ومبىدا ۇيىمداستىرىلعان كسرو چەمپيوناتىنىڭ فينالىندا قاراعاندىلىق يگور روستوروتسكيگە ەسە جىبەرگەن الەكساندر كۇمىس مەدالدى موينىنا ءىلدى. ارادا ءبىر جىل وتكەن سوڭ تبيليسيدە ءدال سول جەرلەسىمىزدى جەڭىپ, وداق بىرىنشىلىگىنىڭ باس جۇلدەسىن ولجالادى. سول كەزدەن بەرى «ورىس ايۋىنىڭ» جەڭىستى جولى باستالادى. ۇزاق جىلدار بويى جەر جاھاندا تەحنيكالىق ارسەنالى مول, قارا كۇشكە باي كارەليندى توقتاتاتىن بىردە-ءبىر ادام تابىلمادى. ونى جەڭۋ بىلاي تۇرسىن, تەڭ دارەجەدە تىرەسۋدىڭ ءوزى مۇمكىن ەمەس ەدى. جەر جاھاننىڭ وزگە دۇلدۇلدەرى الەكساندردىڭ «ارتقى بەلبەۋىنەن» قۇتىلا الماي قور بولدى.
سان سانىچتىڭ (دوستار, ارىپتەستەرى, باپكەرلەر مەن باسقالار كارەليندى وسىلاي ەركەلەتەدى – رەد) 1987-2000 جىلدار ارالىعىندا باعىندىرعان نەگىزگى بەلەستەرى مىناداي: وليمپيا ويىندارىنىڭ 3 دۇركىن جەڭىمپازى (1988, 1992, 1996), الەمنىڭ 9 دۇركىن (1989, 1990, 1991, 1993, 1994, 1995, 1997, 1998, 1999) جانە ەۋروپانىڭ 12 دۇركىن (1988, 1989, 1990, 1991, 1992, 1993, 1994, 1995, 1996, 1998, 1999, 2000) چەمپيونى جانە الەم كۋبوگىنىڭ يەگەرى (1987). سونداي-اق كارەلين تاعى باسقا كوپتەگەن حالىقارالىق جارىستاردا جەڭىس تۇعىرىنا كوتەرىلدى. ءبىر سوزبەن ايتساق, رەسەي بالۋانى جوعارى كورسەتىلگەن ۋاقىت ارالىعىندا بىردە-ءبىر رەت جەڭىلگەن جوق. وعان كوپتەگەن رەكوردتىق كورسەتكىشتەر تيەسىلى. الەكساندر ءوز ەلى, شەت مەملەكەتتەر, حالىقارالىق ۇيىمدارىنىڭ بىرقاتار وردەنى جانە مەدالىمەن ماراپاتتالدى.
دەسەك تە 13 جىل بويى ادام بالاسىنا بەت قاراتپاعان 33 جاستاعى الەكساندر كارەلين 2000 جىلى سيدنەي وليمپياداسىندا ساتسىزدىككە ۇشىرادى. اقتىق ايقاسقا دەيىن بارلىق قارسىلاسىن سىپىرا ۇتقان «ورىس ايۋى» فينالدا 29 جاستاعى ەسىمى كوپشىلىككە بەيمالىم اقش بالۋانى رۋلون گاردنەرگە ويدا-جوقتا ۇتىلىپ قالدى. بۇل عاسىرلار توعىسىندا الاۋى تۇتانعان وليمپيا ويىندارىنىڭ باستى سەنساتسيالارىنىڭ ءبىرى بولدى. سودان كەيىن ءداۋىرى ءوتىپ, كۇش-قۋاتى سارقىلعانىن سەزىنگەن سان سانىچ ۇلكەن سپورتتان قول ءۇزدى.
اتاعى جەر جارعان الەكساندر كارەلين قازاقتىڭ داڭقتى بالۋانى, الاشتىڭ ابزال ازاماتى, پارلامەنت ءماجىلىسىنىڭ دەپۋتاتى داۋلەت تۇرلىحانوۆپەن جاقسى ارالاسادى. ەكەۋى وتكەن عاسىردىڭ سەكسەنىنشى جىلدارىنىڭ ەكىنشى جارتىسىنان بەرى جاقسى ارالاسادى. كسرو چەمپيوناتتارىندا بىرگە كۇرەستى, سەۋل, بارسەلونا جانە اتلانتا وليمپيادالارىندا قاتار ءجۇردى. الەم چەمپيوناتتارىندا بىرگە بولدى. ءبىر سوزبەن ايتساق, ەكەۋى سىيلاس جانە سىرلاس دوستار. بۇل جولى كارەليننىڭ قازاقستانعا كەلۋىنە دە تۇرتكى بولعان تۇرلىحانوۆ ەكەنى ءسوزسىز. ويتكەنى 18 قاراشادا وليمپيا ويىندارىنىڭ ەكى دۇركىن جۇلدەگەرى, الەم مەن ەۋروپا چەمپيونى, كەڭەس وداعى بىرىنشىلىگىندە جەتى رەت جەڭىس تۇعىرىنىڭ ەڭ بيىك ساتىسىنا كوتەرىلگەن داۋلەت اعامىز 60 جاسقا تولدى. دوسىنا قۇرمەت پەن ىزەت كورسەتۋ ءۇشىن سان سانىچ استاناعا ارنايى ات باسىن بۇردى. بۇل دا سىيلاستىقتىڭ ءبىر بەلگىسى.
