كەيىنگى جىلدارى استانادا ينفەكتسيانىڭ جىنىستىق جولمەن جۇعۋ جاعدايلارىنىڭ وسكەنى بايقالىپ وتىر. جۇقتىرعانداردىڭ دەنى – ەڭبەككە قابىلەتتى جاستا. سوندىقتان ءاربىر ادام يممۋن تاپشىلىعى ۆيرۋسىن جۇقتىرمايمىن, ونى تەك جەڭىل ءجۇرىستى قىزدار, ەسىرتكى تۇتىناتىندار, ءبىرجىنىستى قاتىناستاعىلار عانا جۇقتىرادى دەگەن وي-پىكىردەن اۋلاق بولۋى كەرەك. سەبەبى ايتۆ جاس-كارى, ۇلت, ءناسىل, شەكارا تالعامايدى. ادامنىڭ ءال-اۋقاتىنا قارامايدى.
تۇرعىندارعا ايتۆ ينفەكتسياسى تۋرالى اقپاراتتاندىرۋ جۇمىستارىن جۇرگىزىپ جاتقانىمىزعا قاراماستان, ءىس جۇزىندە سول ءبىلىمىن پايدالانا المايتىندار بار. سوڭىندا الەۋمەتتىك جاعدايى جاقسى ادامدار قارماققا ءىلىنىپ جاتادى. بۇل ينفەكتسيادان الدىن الا ساقتانۋ شارالارىن جۇرگىزبەسەك, وندا ءبىزدىڭ ءالسىز بولعانىمىز بولعان.
ايتۆ ينفەكتسياسى قاۋىپتى دەرت ەكەنىن, ونىڭ قانداي جولدارمەن جۇعاتىنىن ءاربىر ادام بىلۋگە ءتيىس. ايتۆ ينفەكتسياسىنىڭ 3 ءتۇرلى جولمەن جۇعۋى مۇمكىن. سوڭعى ۋاقىتتا ايتۆ جۇقپاسىنىڭ كەڭىنەن ەتەك جايعان جۇعۋ جولى ەر مەن ايەل جانە ءبىرجىنىستى قاتىناس سانالادى. ەكىنشى جۇعۋ جولى – قان ارقىلى. ياعني ەسىرتكى ينەسى ارقىلى, ستەريلدەنبەگەن مەديتسينالىق قۇرالدار, پيرسينگ, تاتۋاج جاساعان كەزدە جۇعۋى مۇمكىن. سونداي-اق ءۇشىنشى جۇعۋ جولى – ايتۆ جۇقتىرعان جۇكتى انادان بالاعا ىشتەي بوسانۋ جولدارىنان ءوتۋ كەزىندە, ەمىزگەندە جۇعۋى مۇمكىن.
قازىر دە دۇنيە جۇزىندە ايتۆ ينفەكتسياسىنىڭ الدىن الۋ شارالارىن كۇشەيتۋ ماقساتىندا قوماقتى قارجى جۇمسالىپ جاتقانىن بىلەمىز. بىراق بۇل ۆيرۋستان ساقتانۋ ءۇشىن الدىن الا ەگەتىن ۆاكتسينا مەن ادام اعزاسىن ۆيرۋستان تولىق تازارتاتىن دارىلەر جاساپ شىعارىلعان جوق. سوندىقتان ءار ادام ءوز ومىرىنە جاۋاپتى جانە وسى تاقىرىپقا شىنداپ كوڭىل اۋدارۋعا ءتيىس.
ازىرگە ايتۆ جۇقتىرۋدان ساقتانۋدىڭ مىناداي جالپى شارالارى تۋرالى حابارلاعىم كەلەدى:
- ءبىر عانا جىنىستىق سەرىكتەستىڭ بولعانى ءجون. ەگەر جىنىستىق سەرىكتەستەر جۇقتىرۋ قاۋىپ-قاتەرىنىڭ جوقتىعىنا سەنىمدى بولسا, ەكەۋى دە ايتۆ-عا تەكسەرىلىپ, قارالۋعا ءتيىس.
- قاۋىپسىز قارىم-قاتىناس.
- ەسىرتكى تۇتىنۋدان باس تارتۋ. كەز كەلگەن ەم-دوم كەزىندە بۇرىن قولدانىلعان شپريتس, ينەلەردى پايدالانباۋ.
- ايتۆ جۇقتىرعان ايەل جۇكتىلىك كەزىندە ارنايى ەم قابىلداپ, ءسابيىن ەمشەك سۇتىنەن الشاقتاتۋ كەرەك.
ەلىمىزدىڭ وركەنيەتتى ەلدەر قاتارىنان كورىنۋى ءۇشىن جاس ۇرپاقتى سالاماتتى ءومىر سۇرۋگە تاربيەلەۋ – بۇگىنگى كۇننىڭ تالابى. دەنساۋلىقتى ساقتاپ, نىعايتۋ ءۇشىن جامان ادەتتەر: تەمەكى شەگۋ, ىشىمدىك ءىشۋ جانە ەسىرتكى قولدانۋدان, رەتسىز قارىم-قاتىناستان اۋلاق بولۋ قاجەت.
ۇلۇقبەك ساۋلەباەۆ,
استانا قالاسى اكىمدىگى ايتۆ-ينفەكتسياسىنىڭ الدىن
الۋ ورتالىعىنىڭ ءبولىم مەڭگەرۋشىسى
