بۇل بايقاۋ اتالعان جوعارى وقۋ ورنىندا وسىمەن ءۇشىنشى مارتە ءوتىپ وتىر. وعان ۋنيۆەرسيتەتتەگى بارلىق فاكۋلتەتتەن 30-عا تارتا ستۋدەنت قاتىستى. سولاردىڭ ىشىنەن جۇزگە تارتا تۋىندىنى جاتقا وقيتىن سەرىك قالداننىڭ باعى جانىپ, ۇزدىك دەپ تانىلدى.
«بايقاۋ وتەدى دەگەننەن كەيىن بىردەن قاتىسۋعا بەل بۋدىم. شىنىمدى ايتسام, «كۇلتەگىن» ەپوسىن ەكى جارىم اپتا ىشىندە جاتتاپ الدىم. قيىندىعى دا بولدى. ويتكەنى شىعارمادا ەجەلگى تۇركى اتاۋلارى مەن گەوگرافيالىق تەرميندەر كوپ كەزدەسەدى. سونداي-اق بۇل ەپوستىڭ باسقا جىرلارعا قاراعاندا ەرەكشەلىكتەرى دە بار», دەدى ول.
دارىندى جاس «قوبىلاندى باتىر» مەن ماراباي اقىننىڭ داستاندارىن دا جاتقا بىلەدى. سونىمەن بىرگە ول 150 ولەڭ, 11 قاراسوزبەن بىرگە, اباي اتامىزدان باستاپ, ءىلياس جانسۇگىروۆ, مۇقاعالي ماقاتاەۆ, مۇحتار شاحانوۆ ولەڭدەرىن مۇدىرمەي وقيدى. ول ءبىر سوزىندە قازىر كوركەم شىعارمالاردى جاتقا وقيتىن جاستاردىڭ كوپ ەمەس ەكەنىن جەتكىزدى.
«وسىنداي بايقاۋلارعا قاتىسقان جىگىتتەردى سيرەك كورەمىن. اعا بۋىن وكىلدەرىمەن سالىستىرعاندا قازىرگى جاستار كوركەم تۋىندىنى جاتقا ايتۋعا ونشا قىزىقپايدى. ودان گورى ءبىز قىسقا بەينەجازبالاردى كورىپ, شاعىن ماتىندەردى وقۋعا ۇيرەنگەنبىز», دەيدى س.قالدان.
ايتا كەتەيىك, بايقاۋعا بەلگىلى تۇركىتانۋشى عالىم قارجاۋباي سارتقوجا ۇلى, مەملەكەتتىك ەلتاڭبا اۆتورى, پروفەسسور جانداربەك مالىبەكوۆ, وپەرا ءانشىسى, مەملەكەتتىك سىيلىقتىڭ لاۋرەاتى كەنجەعالي مىرجىقباي سەكىلدى ەلىمىزگە تانىمال ازاماتتار قازىلىق جاسادى.
