ءىسساپار اياسىندا پرەزيدەنت ءىس باسقارماسى مەديتسينالىق ورتالىعىنىڭ وكىلدەرى ماڭعىستاۋداعى وبلىستىق ونكولوگيالىق ديسپانسەر قىزمەتىمەن تانىستى. اۋرۋحانا باسشىسى مەديتسينالىق مەكەمە قىزمەتىنىڭ ستراتەگيالىق باعىتتارى تۋرالى باياندادى, قوناق دارىگەرلەر وڭىردەگى ارىپتەستەرىمەن مەديتسينا سالاسىنداعى تاجىريبەلەرىن ءبولىستى. ءپىب مەديتسينالىق ورتالىعىنىڭ باسشىسى الەكسەي تسوي اۋرۋحانانى ارالاپ, كت, مرت, ۋدز, مامموگرافيا, ەندوسكوپيا كابينەتتەرىنە, سونداي-اق وپەراتسيالىق بلوكتارعا, حيرۋرگيا جانە رەانيماتسيا بولىمشەلەرىنە بارىپ, دارىگەرلەرمەن كەزدەستى.
سونداي-اق وسى ورايدا ماڭعىستاۋ وبلىستىق اۋرۋحاناسىندا جاڭا بولىمشە – وبلىستىق كوپسالالى اۋرۋحانادا گوسپيتالدىق فارماتسيا جۇمىسىن ۇيىمداستىرۋ ماسەلەلەرى تالقىلاندى. گوسپيتالدىق فارماتسيا – ءدارى-دارمەكتەردى باسقارۋدىڭ پاتسيەنتكە باعىتتالعان جانە جەكەلەندىرىلگەن مودەلى. ماماندار ءدارى-دارمەك اينالىمىنا قاتىستى اۋرۋحانانىڭ بارلىق جاعدايىن زەرتتەپ, باسقارۋدىڭ جاڭا ۇلگىسىن ۇسىندى. ورىن تاڭداۋعا قاتىستى ماسەلەلەر پىسىقتالىپ, سحەماسى شارۋاشىلىق قىزمەتىمەن, جەلدەتۋ قىزمەتى جانە توتەنشە جاعدايلار دەپارتامەنتىمەن كەلىسىلدى. جاڭا ءبولىمنىڭ جۇمىس ەرەجەلەرى, نەگىزگى ماقساتتارى, شتات سانى ازىرلەنىپ, قاجەتتى قۇرال-جابدىقتاردىڭ ءتىزىمى دايىندالدى. قىزمەتكەرلەردى اقپاراتتاندىرۋ جانە لاۋازىمدىق مىندەتتەرىن ناقتىلاۋ بويىنشا جۇمىستار جۇرگىزىلدى. الداعى ۋاقىتتا جۇمىستى ونلاين رەجىمدە باقىلاۋ جوسپارلانىپ وتىر. قاجەت بولعان جاعدايدا قاجەتتى ماماندار شاقىرىلادى.
– ءبىز اۋرۋحانا باسشىلىعىمەن جاڭا بولىمشەنىڭ جۇمىسىن ۇيىمداستىرۋعا قاتىستى بارلىق قاجەتتى ماسەلەنى تالقىلادىق. جانساقتاۋ بولىمىنە, وپەراتسيالىق بولىمگە, حيرۋرگيا, كارديوحيرۋرگيا بولىمىنە باردىم, دياليز بولىمىندە بولدىم. ءدارىحانا تەكسەرىلىپ, وسى سالانى جاڭارتۋ بويىنشا ۇسىنىستار بەرىلدى. سونداي-اق حيرۋرگيا بولىمشەسىن مەديتسينالىق ماقساتتاعى بۇيىمدارمەن جانە ءدارى-دارمەكتەرمەن قامتاماسىز ەتۋدى جاقسارتۋ جوباسى ۇسىنىلدى, – دەيدى ۇلتتىق نەيروحيرۋرگيا ورتالىعى گوسپيتالدىق فارماتسيا ءبولىمىنىڭ باسشىسى ا.تولەپبەرگەنوۆا.
ءتورت كۇنگە سوزىلعان ءىسساپار اياسىندا نەيروحيرۋرگ, ۋرولوگ, تراۆماتولوگ سياقتى 28 جەتەكشى ماماننان قۇرالعان دارىگەرلەر توبى ماڭعىستاۋ وبلىستىق كوپسالالى اۋرۋحاناسىندا پراكتيكالىق جانە كونسۋلتاتسيالىق-ادىستەمەلىك كومەك كورسەتىپ, ءتورت كۇن ىشىندە دارىگەرلەر 60-تان اسا تۇرعىنعا كەڭەس بەرىپ, وننان اسا كۇردەلى وپەراتسيا جاسادى. ولار سونداي-اق مەديتسينالىق مەكەمەلەردىڭ 200-دەن اسا قاتىسۋشىلارىنا پراكتيكالىق ساباقتار, شەبەرلىك ساباقتارى, پرەزەنتاتسيالار مەن دارىستەر وتكىزدى.
ءىسساپار ماڭعىستاۋ وبلىسىنىڭ اكىمى ن.نوعاەۆپەن پرەزيدەنتى ءىس باسقارماسى مەديتسينالىق ورتالىعىنىڭ باسشىسى الەكسەي تسويدىڭ ىنتىماقتاستىق تۋرالى مەموراندۋمعا قول قويۋىمەن قورىتىندىلاندى. كەلىسىم قالا تۇرعىندارىنا دارىگەرلەردىڭ تەگىن كونسۋلتاتسيالارىن, ساناتوريلىك-كۋرورتتىق ەمدەۋ جانە مەديتسينالىق وڭالتۋ بويىنشا قىزمەتتەردى الۋعا, قاجەت بولعاندا جاعدايدا اۋىر ناۋقاستاردى ەمدەۋگە مۇمكىندىك بەرەدى. سونداي-اق ورتاق كەلىسىم ناتيجەسىندە ءوڭىردىڭ مەديتسينالىق مەكەمە قىزمەتكەرلەرىن وقىتۋ, اۋرۋلاردىڭ الدىن الۋ, دياگنوستيكالاۋ, جاڭا مەديتسينالىق تەحنولوگيالار مەن يننوۆاتسيالىق ادىستەمەلەرىن دامىتۋ سالاسىندا تاجىريبە الماسۋ تۋرالى كەلىسىمگە قول جەتكىزىلدى.
ءپىب مەديتسينالىق ورتالىعىنىڭ باسشىسى مۇنداي ءىس-شارالار جەرگىلىكتى اۋرۋحانالار ماماندارىنىڭ بىلىكتىلىك دەڭگەيىن ارتتىرۋعا كومەكتەسەتىنىن, ال ءوڭىر ازاماتتارى ءۇشىن قولجەتىمدى ءارى ساپالى مەديتسينالىق كومەك الۋىنا مۇمكىندىك بەرەتىنىن اتاپ ءوتتى.
– مەديتسينالىق ورتالىق قىزمەتىنىڭ اياسىندا ءبىلىم بەرۋ, عىلىمي زەرتتەۋلەر, سانيتاريالىق-ەپيدەميالىق زەرتتەۋلەر جۇرگىزۋ, سونداي-اق دەنساۋلىق ساقتاۋ سالاسىندا يننوۆاتسيالىق ادىستەردى ىزدەۋ جانە ەنگىزۋ سياقتى ءتۇرلى جوبالار ىسكە اسىرىلىپ جاتىر. بۇگىنگى قول قويىلعان مەموراندۋم شەڭبەرىندە وبلىس اكىمدىگىمەن بىرلەسىپ, جول كارتاسى ازىرلەنەدى. ونىڭ نەگىزىندە ءبىز بىرنەشە جىل بويى وڭىردە دەنساۋلىق ساقتاۋدى دامىتۋ بويىنشا بەلگىلەنگەن جوسپارلاردى ىسكە اسىرامىز, – دەدى ا.تسوي.
ماڭعىستاۋ وبلىسىنىڭ اكىمى ن.نوعاەۆ مەموراندۋمنىڭ الداعى ۋاقىتتا وڭىردەگى مەديتسينا سالاسىنىڭ دامۋىنا ايتارلىقتاي ىقپال ەتەتىنىنە سەنىم ءبىلدىردى.
– پرەزيدەنت ءىس باسقارماسى مەديتسينالىق ورتالىعىنان كەلگەن باسشىلىق قۇرام جانە حيرۋرگ دارىگەرلەر, ماڭعىستاۋ وبلىسىنا كەلىپ, تۇرعىندارعا كونسۋلتاتيۆتى-دياگنوستيكالىق كومەك كورسەتىپ, جوعارى دەڭگەيدەگى وپەراتسيالاردى جاساپ, كومەۋ كورسەتىپ جاتقاندارىڭىزعا ۇلكەن العىس بىلدىرەمىز. ۇلت دەنساۋلىعى – ۇلتتىق دامۋدىڭ باستى قۇندىلىعى. بۇگىندە ەلىمىزدە دەنساۋلىق ساقتاۋ سالاسىن دامىتۋعا ەرەكشە كوڭىل ءبولىنىپ كەلەدى. مەملەكەت باسشىسى قاسىم-جومارت توقاەۆ وتكەن جىلعى جولداۋىندا دەنساۋلىق ساقتاۋ جۇيەسىنىڭ تيىمدىلىگىن ارتتىرۋعا ەرەكشە نازار اۋداردى. سوعان سايكەس, ماڭعىستاۋ وبلىسىندا دا مەديتسينالىق كورسەتىلەتىن قىزمەتتەردىڭ قولجەتىمدىلىگى مەن ساپاسى ارتىپ كەلەدى. بۇگىندە وبلىس تۇرعىندارىنا 16 ستاتسيونارلىق جانە 61 مەملەكەتتىك امبۋلاتوريالىق-ەمحانالىق مەديتسينالىق ۇيىم حالىققا قىزمەت كورسەتىپ كەلەدى. وڭىردە 793 مىڭ تۇرعىن بار, ونىڭ 500 425-ءى – مەملەكەتتىك مەكەمەلەرگە, 292 659-ى – جەكەمەنشىك مەكەمەلەرگە تىركەلگەن. وڭىرىمىزدە الەۋمەتتىك ماڭىزداعى اۋرۋلاردىڭ كورسەتكىشىن تومەندەتۋ بويىنشا جىلدان-جىلعا تۇراقتى وڭ ديناميكا قالىپتاسىپ كەلەدى. بيىل ەمدەۋ مەكەمەلەرىنىڭ ماتەريالدىق-تەحنيكالىق بازاسى 73 پايىزدان 92 پايىزعا دەيىن جەتتى, – دەدى وبلىس اكىمى.
ن.نوعاەۆ پرەزيدەنتتىڭ ماڭعىستاۋ وبلىسىنا ءىسساپارى كەزىندە كادر تاپشىلىعى ماسەلەسىنە قاتىستى بەرىلگەن تاپسىرمالارىن ىسكە اسىرۋ بارىسىندا بىرقاتار جۇمىس اتقارىلىپ جاتقانىن اتاپ ءوتتى. ونىڭ ايتۋىنشا, ماماندار تاپشىلىعىن جويۋ ماقساتىندا 2023 جىلعا 198 وبلىس اكىمى گرانتى ءبولىندى. ونىڭ ىشىندە 68 باكالاۆرعا, 97 ينتەرناتۋراعا, رەزيدەنتۋراعا 33 گرانت ءبولىندى. جاس ماماندارعا بىرجولعى الەۋمەتتىك كومەك كورسەتۋ ماقساتىندا وبلىستىق ءماسليحات شەشىمىمەن جەرگىلىكتى بيۋدجەت ەسەبىنەن 70 ملن تەڭگە كولەمىندە قاراجات ءبولىندى. اۋىلدىق جەرگە كەلەتىن دارىگەر ماماندارعا 1,5 ملن تەڭگە كولەمىندە بىرجولعى الەۋمەتتىك كومەك كورسەتۋ جوسپارلانىپ وتىر.
ماڭعىستاۋ وبلىسىندا مەديتسينا سالاسىن جاڭعىرتۋ تەك بولىنگەن قاراجات كولەمىمەن, ءتۇرلى زاماناۋي قۇرال-جابدىقتاردى الۋمەن, مامانداردىڭ جەتكىلىكتى بولۋىمەن عانا جۇزەگە اسپايدى, دارىگەرلىك قىزمەتتىڭ ساپاسىن كوتەرۋ دارىگەرلەردىڭ وزىنە تىكەلەي بايلانىستى. جوعارى كاسىبي ءبىلىم مەن جان-جاقتىلىق – ەڭ باستى جانە ماڭىزدى كريتەري. سوندىقتان ءوز كاسىبىنە ادال, ءبىلىمدى بولۋدى ءار دارىگەر ءوزى نىق ۇستانىم ەتۋى كەرەك.
ماڭعىستاۋ وبلىسى
