«بۇل ەسىمدى اتاسى تاڭدادى. «ەگەر كەلىنىم قىز دۇنيەگە اكەلسە, ەسىمىن توميريس قويامىن. «ساق پاتشايىمى سەكىلدى اقىلدى, العىر, باتىر بولىپ ءوسسىن» دەپ جۇرەتىن. كەلىنى «قىز بوساندى» دەگەندى ەستىگەندە, «ايتقانىم كەلدى» دەپ ءبىر قۋانعان ەدى, «ەلدىڭ 20 ميلليونىنشى ازاماتى اتاندى» دەگەندە, «نەمەرەمنىڭ ومىرگە كەلۋى تاريحي وقيعاعا اينالاتىنىن بىلگەندەي-اق, توميريس ەسىمىن تاڭداعان ەكەنمىن» دەپ تاعى قۋاندى», دەيدى ءسابيدىڭ اكەسى سۇڭعات سەيتجان.
ءتوميريستىڭ اتاسى اقىلبەك ءابدىراحمانوۆ ءالى 40-قا تولا قويماعان جىگىت. قازىر «قازاقمىس» كورپوراتسياسىنا قاراستى №55 شاحتادا بۇرعىلاۋشى بولىپ ەڭبەك ەتەدى. ول زايىبى گۇلزات ەكەۋى ءۇش بالا تاربيەلەپ ءوسىرىپ وتىر. ۇلكەندەرى – سۇڭعات. مارحاباتى – مەدكوللەدج ستۋدەنتى, ال اسىلجان 2-سىنىپتا وقيدى.
سۇڭعات پەن ايگەرىم بىلتىر عانا باس قوسقان. تۇڭعىشتارى جاس اتا-اناسىنىڭ ەسىمدەرىن قازىردىڭ وزىندە تاريحقا ەندىرىپ جاتىر. ويتكەنى ەكەۋى دە بيىل 20 جاسقا تولدى. ۇلىتاۋ ەلىمىزدىڭ 20-ءوڭىرى سانالادى. ال وسى ءوڭىردىڭ ءتوميريسى – ەلىمىزدىڭ 20 ميلليونىنشى ازاماتى.
«نەگىزگى جۇمىس ورنىم – «اسس-سەرىكتەس» جشس, سول جەردە ءورت ءسوندىرۋشىمىن. بىراق ايلىق شايلىققا جەتپەگەندىكتەن, كۇزەت كومپانياسىندا قوسىمشا جۇمىس ىستەيمىن», دەيدى جاس اكە.
ءتوميريستىڭ نەسىبەسى مولىنان ەكەن. ءسابي دۇنيەگە كەلىسىمەن, ەستىگەن ەلدىڭ قۇتتىقتاماعانى, كورىمدىك بەرىپ, شاشۋ شاشپاعانى جوقتىڭ قاسى. وبلىس اكىمى بەرىك ابدىعالي ۇلىنىڭ قۇتتىقتاۋ حاتى مەن سىي-سياپاتىن ارقالاپ وبلىس پەن جەزقازعان قالاسىنىڭ باسشىلارى ارنايى كەلىپ كەتتى. قۇتتىقتاۋلار لەگى مۇنىمەن تولاستاماسى انىق. ەڭ باستىسى, توميريس عۇمىرلى, باقىتتى بولسىن!
جەزقازعان
