تابيعاتى تامىلجىعان ولكە قۋانىشقا كىلكىپ تۇر. ومىرگە جيىرما ميلليونىنشى ءسابي كەلدى. نارەستەنىڭ اناسى دينارا – مۇعالىم, ال اكەسى ايدار يسەنوۆ ەنەرگەتيكا سالاسىندا ەڭبەك ەتەدى. ءتۇتىنى ءتۇزۋ ۇشقان شاڭىراق. دارىگەرلەردىڭ ايتۋلارىنا قاراعاندا, ومىرگە كەلگەن ءسابيدىڭ دە, قۇشاعى گۇلگە تولعان جاس انانىڭ دا دەنساۋلىعى جاقسى.
وبلىس اكىمى مارات احمەتجانوۆ ەل پرەزيدەنتىنىڭ اتىنان كىشكەنتايلى بولعان وتباسىن قۇتتىقتاي كەلىپتى.
ء«بىز بۇگىن تاريحي ءساتتىڭ كۋاسى بولىپ وتىرمىز. مەرەيلى ءسابيدىڭ ءبىزدىڭ وبلىستا, ونىڭ ىشىندە جەر ءجانناتى بۋرابايدا ومىرگە كەلۋى – ەرەكشە سىي. مەملەكەت دەنساۋلىق ساقتاۋ, ءبىلىم سالالارىنا كوپ كوڭىل ءبولىپ وتىر. ءبىزدىڭ جاستارىمىز زامان تالابىنا ساي جاقسى ءبىلىم الىپ, ءوسىپ-جەتىلۋى كەرەك», دەدى وبلىس اكىمى.
اق تۇيەنىڭ قارنى جارىلعان قۋانىشقا ورتاقتاسىپ, ارىپتەستەرى, ەت جاقىن تۋىستارى, كورشى-قولاڭ شاشۋ شاشىپ, بوبەكتىڭ باۋى بەرىك بولسىن دەگەن تىلەكتەرىن ايتىپ جاتىر.
ء«بىزدىڭ وتباسى ءۇشىن ءبىر جاعىنان كۇتپەگەن قۋانىشتى كۇن بولدى, – دەيدى وتاعاسى ايدار يسەنوۆ. – بۇل ەكىنشى بالامىز. باۋىر ەتى بالامىزدىڭ باقىتتى بولىپ وسكەنىن قالايمىز. ومىرگە كەلگەن ءار بالانىڭ باقىتتى بولۋعا حاقى بار».
قازىرگى ۋاقىتتا جاس انا مەن ءسابي «اۆيتسەننا-بۋراباي» سەرىكتەستىگىنىڭ انا مەن بالا بولىمشەسىندە. ءسوز اراسىندا جىل باسىنان بەرى وڭىردە 9 604 نارەستەنىڭ ومىرگە كەلگەندىگىن ايتا كەتەلىك.
جاس وتباسىنىڭ وسى ءبىر باقىتتى ساتىنە كۋاگەر بولعان تىلەكتەس قاۋىم جارىق دۇنيە ەسىگىن جاڭا عانا اشقان نارەستەگە ۇزاق عۇمىر تىلەپ تاراستى. ءبىز دە ءوز تاراپىمىزدان ءومىرىڭ ۇزاق, باقىتىڭ ۇستەم بولسىن دەگەن تىلەگىمىزدى ايتتىق. ءجۇز جاسا, ەلىمىزدىڭ جيىرما ميلليونىنشى نارەستەسى!
اقمولا وبلىسى,
بۋراباي اۋدانى
