وبلىستاعى 7 اۋداننىڭ التاۋى كۇرىش ەگەدى. ال داريانىڭ ەتەگىندەگى ارال اۋدانىنداعى تىرشىلىك ءتىنى – بالىق پەن تۇز ءوندىرىسى. باستاۋىن وتكەن عاسىرلاردان الاتىن وسى كاسىپتەردەن ەل ءالى دە ىرزىعىن ايىرىپ كەلەدى. بالىق ءوندىرىسى كىشى ارال تولعالى بەرى قايتا قارقىن السا, تۇز – اۋدان ورتالىعىنا جاقىن جاقسىقىلىشتاعى جۇرتشىلىقتىڭ نەگىزگى تىرشىلىك كوزى. بىلتىر وسى جاقسىقىلىش كەنتىندە تۇراتىن نۇرجان جالعاسباەۆ تاۋىق ءوسىرۋدى قولعا العاندا, توسىرقاي قاراعاندار كوپ بولىپ ەدى. 25 ميلليون تەڭگەدەن باستالعان جوبا قازىر شاعىن قۇس فەرماسىنا اينالىپ, ايىنا 7 توننا تاۋىق ەتىن ءوندىرىپ وتىر. ارالداعى دۇكەندەر مەن مەيرامحانالار, ءدامحانالار وسى فەرمانىڭ ءونىمىن ساۋدالايدى.
كاسىپكەر جۇمىرتقانى ارنايى تاپسىرىسپەن چەحيا, گەرمانيا, يسپانيا ەلدەرىنەن الدىرىپ وتىر. وسىندا ينكۋباتورعا سالىنىپ, ودان شىققان بالاپان 37 كۇندە سويۋعا جارايدى ەكەن. جالپى, ءبىر مەزەتتە 2500-3000 باس بالاپان شىعادى.
كاسىپكەر بۇل بالاپانداردىڭ وتە سەزىمتال كەلەتىنىن ايتادى. جۇمىرتقانى جارىپ شىققان ساتتەن بالاداي باپتاپ, ارنايى دارۋمەندەرىن سالۋ كەرەك. قالىپتى تەمپەراتۋرا مەن ءىشىپ-جەمىن دە ءوز مولشەرىندە بەرىلۋىن قاداعالاماساڭ, ەڭبەك ەش كەتۋى مۇمكىن. سوندىقتان جۇمىسشىلارمەن بىرگە بالاپانداردى كۇتىپ-باپتاۋعا وتباسىمەن كىرىسىپ كەتەتىن كەزى كوپ.
جەتىلگەن قۇس ايىنا ءبىر رەت سويىلادى, سول مەزەتتە قوسىمشا 10 ادام ۋاقىتشا جۇمىسقا الىنادى.
«قازىر الىپ-ساتۋدىڭ زامانى ءوتتى. وندىرىسكە بەت بۇرماعاننىڭ ءورىسى تارىلاتىن ۋاقىت كەلدى. ازىق-تۇلىكتەن باستاپ تۇتىنۋشىعا كەرەكتى ءونىمنىڭ ءبارى وزىمىزدەن شىققانى دۇرىس. «كىسىدەگىنىڭ كىلتى اسپاندا» ەكەنى كەشەگى پاندەميا كەزىندە بايقالعان جوق پا؟ جۇمىرتقادان بالاپان, بالاپاننان تاۋىق ءوسىرۋ وڭاي ەمەس, بىراق وسى ارقىلى قازىر اۋداندى قۇس ەتىمەن قامتىپ وتىرمىز. ەلگە پايدامىز تيسە دەيمىن», دەيدى نۇرجان.
ول الدا ارالدان شىققان تاۋىق ەتى ەلىمىزدىڭ وزگە وڭىرلەرىنە دە جەتكىزىلەتىندەي جاعداي جاساعىسى كەلەدى. ءوندىرىس اياسى شاعىن بولعانىمەن دە, كاسىپكەردىڭ كەلەشەككە جاساعان جوسپارى اۋقىمدى. وعان دا جەتەر, باستىسى ۇلكەن ماقساتقا العاشقى قادام جاسالدى.
قىزىلوردا
