باعدارلاما نەگىزىندە كەلەر جىلدان باستاپ ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى بالالاردىڭ ارنايى جيناقتاۋ شوتىنا اۋدارىلادى. پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى رەتىندە ءبىز دە جاڭالىقتى ەستىپ, قۋانىپ قالدىق. بۇل – كامەلەت جاسقا تولىپ, وڭ-سولىن باعامداپ, قاناتى قاتايا باستاعان جاستارعا ۇلكەن قولداۋ دەپ تۇسىنەمىز. مۇنى ءبىراۋىز سوزبەن بالالاردىڭ بولاشاعىنا قۇيىلاتىن ينۆەستيتسيا دەسەك بولادى. قاراجات ەلدەگى ءار بالانىڭ الەۋمەتتىك جاعدايىنا قاراماستان تەڭدەي ۇلەستەرىلەتىنى دە قۋانتادى. ەلدىڭ دەموگرافيالىق وسىمىنە زەر سالساق, 1991 جىلدان بەرىگە دەيىن تۋ كورسەتكىشى 15 پايىزعا ارتقانىن اڭعارامىز. مىسالى, سول ەگەمەندىك العان جىلى 155 مىڭ ءسابي دۇنيەگە كەلسە, بىلتىر وسى كورسەتكىش 403 مىڭعا وسكەن. بۇگىنگە دەيىن قابىلدانعان كەشەندى شارالار, ۇيلەسىمدى باعدارلامالار ەلدەگى دەموگرافيالىق احۋالعا اسەر ەتكەنىن كورىپ وتىرمىز. «ۇلتتىق قور – بالالارعا» جوباسى سونىڭ زاڭدى جالعاسى دەپ تۇسىندىك.
ءبىز باعدارلامانىڭ ناقتى ناتيجەلەرىن بىرنەشە جىلدان كەيىن كورە الامىز. سول كەزدە حالىق ءوز باعاسىن بەرە جاتار. ال قازىر بۇل باعدارلامانى قازاقستاندىقتاردىڭ جاستارعا شىنايى قامقورلىعى, كومەگىنىڭ ءبىر كورىنىسى دەۋگە بولادى. بالالار كەلەشەكتە وسى قامقورلىقتى ءتۇسىنىپ, كومەكتى ءتيىمدى پايدالانسا, تيىمدىلىگىن كورەدى دەپ ۇمىتتەنەمىز.
ەلينا ماساگۋتوۆا,
«قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ ديرەكتورى
