ساراپتامالىق كەڭەس – ەرىكتى نەگىزدە جۇمىس ىستەيتىن كونسۋلتاتيۆتىك-ساراپتامالىق فۋنكتسيالارى بار كونسۋلتاتيۆتىك-كەڭەسشى ورگان. كەڭەس قۇرامىنا بەلگىلى قوعام قايراتكەرلەرى, قۇقىق قورعاۋشىلار, زاڭگەرلەر, قوعامدىق پىكىر كوشباسشىلارى, ادۆوكاتتار, عالىمدار, زەرتتەۋشىلەر جانە باسقا دا بەلسەندى ازاماتتار كىرەدى.
كەزدەسۋگە قاتىسۋشىلاردى ادام قۇقىقتارى جونىندەگى ۋاكىلى ارتۋر لاستاەۆ قۇتتىقتاپ, ەلىمىزدەگى ۋاكىل ينستيتۋتىنىڭ دامۋ تاريحىنا توقتالىپ ءوتتى, سونداي-اق ازاماتتاردان كەلىپ ءتۇسىپ جاتقان وتىنىشتەرىنىڭ كوبەيگەنى جايىندا اقپاراتپەن ءبولىستى.
«بيىلعى 9 ايدا ورتالىق اپپاراتتاعى جانە وڭىرلەردەگى جەكە قابىلداۋلارعا 1 800-دەن استام ادام قاتىستى. 4,5 مىڭعا جۋىق جازباشا ءوتىنىش قارالدى. بۇل 2022 جىلمەن سالىستىرعاندا ەكى ەسە, 2021 جىلمەن سالىستىرعاندا ءۇش ەسە كوپ. نەبارى 9 ايدا ءبىز 16 مىڭعا جۋىق ادامدى قۇقىقتىق اعارتۋ ءىس-شارالارىمەن قامتىدىق», دەدى ا.لاستاەۆ.
ومبۋدسمەن شاعىمداردىڭ ارتۋىنا تۇرتكى بولعان بىرنەشە سەبەپكە دە جان-جاقتى توقتالدى. «ارينە, مۇنى ءبىز ازاماتتاردىڭ قۇقىق قورعاۋدىڭ جاڭا مەحانيزمىنەن حاباردار بولۋىمەن بايلانىستىرامىز. ەكىنشى جاعىنان, شاعىمداردىڭ كوبەيۋى ازاماتتاردىڭ مەملەكەتتىك ورگاندار جۇمىسىنا قاناعاتتانباۋىنىڭ كورىنىسى بولىپ سانالادى. سوندىقتان ناقتى ماسەلەلەردى شەشۋگە كومەكتەسىپ قانا قويماي, ادام قۇقىقتارى سالاسىنداعى جۇيەلى تۇيتكىلدەردى تارقاتۋ باعىتىندا دا جۇمىس ىستەۋ قاجەت», دەدى ول.
جيىندا ءسوز العان ادام قۇقىقتارى جونىندەگى ۇلتتىق ورتالىقتىڭ باسشىسى سالتانات تۇرسىنبەكوۆا ادام قۇقىقتارى جونىندەگى ۋاكىلدىڭ قۇزىرەتى كەڭەيتە وتىرىپ, ساراپتامالىق كەڭەستىڭ اناليتيكالىق ءرولىن كۇشەيتۋ قاجەتتىگىن اتاپ ءوتتى. ء«بىز ونى ناعىز «جاۋىنگەرلىك ازىرلىك» دەڭگەيىنە شىعارۋىمىز كەرەك, وسىلايشا ازاماتتارىمىزدىڭ قۇقىقتارىن پروفيلاكتيكالىق قورعاۋدىڭ ءتيىمدى ورگانىنا اينالدىرا الامىز. ساراپتامالىق كەڭەس قۇرامىنا جاس, بەلسەندى جانە شىعارماشىل ساراپشىلار, ءوز سالالارىنىڭ بىلىكتى وكىلدەرى كىرگەنىن اتاپ وتكەن ءجون. ولاردىڭ قىزمەتى وسى ورگاننىڭ بولاشاقتاعى بەدەلىنە اسەر ەتەتىنى ءسوزسىز. بۇل رەتتە, ارينە, ولار تاجىريبەلى قۇقىق قورعاۋشىلارمەن جەمىستى ىنتىماقتاستىقتا جۇمىس ىستەيتىن بولادى, ءبىز ساراپتامالىق كەڭەستى باسقالارمەن قاتار تالىمگەرلىك ينستيتۋت رەتىندە كورەمىز. مول تاجىريبەنى جاڭا تاسىلدەرمەن بىرىكتىرۋ كەڭەستىڭ ماكسيمالدى تيىمدىلىگى بولۋى مۇمكىن», دەدى ورتالىق باسشىسى.
سپيكەردىڭ ايتۋىنشا, كەڭەستىڭ بارلىق مۇشەسى ۇنەمى وزەكتى ماسەلەلەردى كوتەرىپ وتىرادى, سوندىقتان دا ولار قوعامدا ۇلكەن سەنىمگە يە. سونداي-اق سالتانات تۇرسىنبەكوۆا ادام قۇقىقتارى جونىندەگى ۇلتتىق ورتالىقتا اقپاراتتىق-تالداۋ بولىمشەسى قۇرىلىپ جاتقانىن, ونىڭ مىندەتتەرىنىڭ ءبىرى ساراپتامالىق كەڭەسپەن ءوزارا ءىس-قيمىلعا نەگىزدەلگەنىن ايتتى.
العاشقى وتىرىس بارىسىندا قاتىسۋشىلار الداعى جۇمىس پەن ماڭىزدى ۇيىمداستىرۋ ماسەلەلەرىن تالقىلادى. ساراپتامالىق كەڭەستىڭ 5 مامانداندىرىلعان ءبولىمى دە انىقتالدى. ولار – ازاماتتىق جانە ساياسي قۇقىقتار مەن ادامنىڭ بوستاندىقتارى ماسەلەلەرى; ادامنىڭ الەۋمەتتىك, ەكونوميكالىق جانە مادەني قۇقىقتارى ماسەلەلەرى; تەڭدىك, بىرلىك جانە زورلىق-زومبىلىقتىڭ بارلىق تۇرلەرىنەن قورعاۋ ماسەلەلەرى بويىنشا; قۇقىق قورعاۋ ينستيتۋتتارىن جەتىلدىرۋ, قۇقىقتىق ءبىلىم بەرۋ, ءبىلىم بەرۋ جانە زاڭگەرلىك كەڭەس بەرۋ جانە حالىقارالىق ىنتىماقتاستىق جانە حالىقارالىق مىندەتتەمەلەر مەن شارتتىق جانە بۇۇ جۇيەسىنىڭ باسقا ورگاندارىنىڭ, ادام قۇقىقتارى سالاسىنداعى باسقا دا حالىقارالىق ۇيىمداردىڭ ۇسىنىمدارىن ورىنداۋ ماسەلەلەرى بويىنشا بولىمدەر.
