تمد ەلدەرى پارلامەنتتەرى پالاتالارىنىڭ باسشىلارى مەن دەپۋتاتتارى قاتىسقان ءىس-شارادا ءسوز سويلەگەن ماۋلەن اشىمباەۆ الدىمەن, ارىپتەستەرىن اتالعان مەرەيلى داتامەن قۇتتىقتادى. سەنات توراعاسى قازىرگى تاڭدا جوگوركۋ كەنەش ەلدىڭ دامۋىنا قاتىستى وزەكتى ماسەلەلەر تالقىلاناتىن جانە ماڭىزدى شەشىمدەر قابىلداناتىن جالپىۇلتتىق الاڭ رەتىندە ايرىقشا ءرول اتقارىپ وتىرعانىن اتاپ ءوتتى.
سونداي-اق ول وڭىردە پارلامەنتاريزمنىڭ ەجەلدەن قالىپتاسقان داستۇرلەرىنە نازار اۋداردى. ولاردىڭ نەگىزى قۇرىلتاي جانە حالىق جينالىستارى ينستيتۋتى ەكەنى انىق. ءدال وسى جۇيەلەر دالا دەموكراتياسىنىڭ نەگىزىن قالىپتاستىرۋدا زور ماڭىزعا يە بولدى. سەنات توراعاسى تاۋەلسىزدىك العاننان كەيىن ەلدەرىمىزدىڭ ۇدەمەلى دامۋى جولىندا پارلامەنتاريزم ينستيتۋتىنىڭ ورنى ەرەكشە بولعانىن اتاپ ءوتتى.
ء«بىز ەلدەرىمىز تەڭگەرىمدى ساياسي جۇيە قۇرۋ جانە دامۋدىڭ وزىندىك ۇلگىسىن تابۋ جولىندا ءتۇرلى كەزەڭدەردى باستان وتكەردى. قازىر تمد ەلدەرىندە پارلامەنتاريزم ينستيتۋتى قالىپتاستى دەپ ايتۋعا تولىق نەگىز بار. بۇگىندە ول مەملەكەت پەن قوعامنىڭ مۇددەسىنە ساي قىزمەت ەتىپ كەلەدى. الداعى ۋاقىتتا دا پارلامەنتتەرىمىز ۋاقىت تالابىنا ساي ۇنەمى دامىپ, جەتىلىپ وتىراتىنى انىق», دەدى ماۋلەن اشىمباەۆ.
پالاتا سپيكەرى ايماق ەلدەرىنىڭ پارلامەنتتەرى اراسىنداعى بايلانىستىڭ جوعارى دەڭگەيىن تىلگە تيەك ەتىپ, پارلامەنتارالىق ىنتىماقتاستىقتى ودان ءارى نىعايتۋدىڭ الەۋەتى زور ەكەنىن ايتتى.
«قازىرگى تاڭدا تاۋەلسىز مەملەكەتتەر دوستاستىعى ەلدەرىنىڭ پارلامەنتتەرى اراسىنداعى ىنتىماقتاستىق جوعارى دەڭگەيدە ەكەنىن ەرەكشە اتاپ وتكىم كەلەدى. وعان ءبىزدىڭ حالىقتارىمىزدىڭ عاسىرلار بويعى تاريحي بايلانىسى مەن ءوزارا سەنىمگە تابان تىرەيتىن قارىم-قاتىناسى نەگىز بولعانى ءسوزسىز. پارلامەنتتەرىمىزدىڭ قىزمەتى ءوزارا بايلانىستى نىعايتۋعا جانە حالىقتارىمىزدىڭ ءال-اۋقاتىن ارتتىرۋعا باعىتتالعان. زاڭ شىعارۋشى ورگاندار ەلدەرىمىزدىڭ ساۋدا-ەكونوميكالىق, مادەني-گۋمانيتارلىق, قاۋىپسىزدىك, ەكولوگيا جانە باسقا دا سالالارداعى ىنتىماقتاستىعىنا ۇلكەن ۇلەس قوسىپ وتىر. سوندىقتان پارلامەنتارالىق ءوزارا ءىس-قيمىل مەن ديالوگتى ودان ءارى بەلسەندى دامىتۋدىڭ ماڭىزى زور», دەدى ماۋلەن اشىمباەۆ.
سونىمەن قاتار بۇگىن سەنات توراعاسى تمد ەلدەرى پارلامەنتارالىق اسسامبلەياسى كەڭەسىنىڭ وتىرىسىنا قاتىستى. وندا تمد پاا-عا مۇشە مەملەكەتتەر دەلەگاتسيالارىنىڭ باسشىلارى اسسامبلەيانىڭ 56-پلەنارلىق وتىرىسىنا دايىندىق بارىسىن تالقىلادى.
ايتا كەتەيىك, پلەنارلىق وتىرىستا پارلامەنتارالىق ىنتىماقتاستىقتى ودان ءارى دامىتۋ مەن نىعايتۋ ماسەلەلەرىن جان-جاقتى تالقىلاۋ جوسپارلانعان. اتاپ ايتقاندا, تەرروريزم مەن ەكسترەميزمگە قارسى قىزمەتتى قۇقىقتىق رەتتەۋدى, ەكونوميكالىق قاۋىپسىزدىكتى, زياتكەرلىك مەنشىكتى قورعاۋدى جانە باسقا دا بىرقاتار ماڭىزدى ماسەلەنى جەتىلدىرۋ سالاسىنداعى مودەلدىك اكتىلەر قارالادى.
ساپار اياسىندا ماۋلەن اشىمباەۆ وزبەكستان رەسپۋبليكاسى ولي ءماجىلىسىنىڭ توراعاسى تانزيلا نارباەۆامەن كەزدەستى. سۇحبات كەزىندە تاراپتار پارلامەنتارالىق ءىس-قيمىلدى ارتتىرۋ, مادەني جانە گۋمانيتارلىق بايلانىستاردى, سونداي-اق شەكارا ماڭىنداعى ىنتىماقتاستىقتى نىعايتۋ ماسەلەلەرىن تالقىلادى.
ودان بولەك, ماۋلەن اشىمباەۆ رەسەي فەدەرالدىق جينالىسى فەدەراتسياسى كەڭەسىنىڭ توراعاسى ۆالەنتينا ماتۆيەنكومەن ەكىجاقتى كەزدەسۋ وتكىزدى. وندا قازاقستان پارلامەنتى سەناتى مەن رەسەي فەدەرالدىق جينالىسى فەدەراتسياسىنىڭ كەڭەسى اراسىنداعى پارلامەنتارالىق ىنتىماقتاستىقتى دامىتۋ جونىندەگى جول كارتاسىنا سايكەس بىرلەسكەن جۇمىستىڭ پەرسپەكتيۆالىق باعىتتارى ءسوز بولدى.
قىرعىزستانعا ەكى كۇندىك ساپار بارىسىندا قازاقستاندىق دەلەگاتسيا قازاق-قىرعىز جاستار فورۋمىنا, تمد پارلامەنتارالىق اسسامبلەياسىنىڭ 56-پلەنارلىق وتىرىسىنا جانە شىڭعىس ايتماتوۆتىڭ تۋعانىنا 95 جىل تولۋىنا ارنالعان كونفەرەنتسياعا قاتىسۋدى جوسپارلاپ وتىر.
