سەرىك ساپيەۆ قاراعاندى وبلىسىنىڭ اباي قالاسىندا دۇنيەگە كەلدى. ءدال وسى شاھاردا جەڭىسپەن ورىلگەن باي ءداستۇرى بار مىقتى بوكس مەكتەبى قالىپتاسقانىن كوزى قاراقتى جانكۇيەرلەر جاقسى بىلەدى. كەزىندەگى ەۋروپا مەن كسرو چەمپيونى سەرىك نۇرقازوۆ, كاسىپقويلار اراسىندا بەلدى نۇسقالار بويىنشا الەمنىڭ بىرنەشە دۇركىن چەمپيونى اتانعان ولەگ ماسكاەۆ پەن ناتاليا راگوزينا, كوپتەگەن ءدۇبىرلى دودادا دارالانعان باقىتجان امانباەۆ پەن دانيار مۇڭايتپاسوۆ, الەم چەمپيوناتىنىڭ ءۇش دۇركىن قولا جۇلدەگەرى ابىلايحان ءجۇسىپوۆ جانە تاعى باسقا كوپتەگەن تانىمال بىلعارى قولعاپ شەبەرلەرى اباي مەكتەبىنەن تۇلەپ ۇشقان. سەرىك تە – سولاردىڭ ءبىرى ءارى بىرەگەيى.
ءبىر ايتا كەتەرلىگى, سەرىكتىڭ اكەسىنىڭ تۋعان ءىنىسى دە كەزىندە قارىمدى بوكسشى بولعان. وتكەن عاسىردىڭ جەتپىسىنشى جىلدارى 51, 54, 57 كگ سالماق دارەجەلەرىندە كۇش سىناسقان باقىتاي ساپەەۆ ەلىشىلىك جارىستاردا قارسىلاس شىداتپاي, بۇكىلوداقتىڭ ارەنادا دا ءوزىن مويىنداتتى. ول – قازاقستاننىڭ ەكى دۇركىن چەمپيونى, كسرو چەمپيوناتىنىڭ كۇمىس جانە قولا جۇلدەگەرى, دوستىق ويىندارى جانە كسرو مەن اقش قۇرامالارىنىڭ ماتچتىق كەزدەسۋىنىڭ جەڭىمپازى. وسى تابىستارىنىڭ ارقاسىندا باقىتاي حالىقارالىق دارەجەدەگى سپورت شەبەرى اتاعىن الدى.
11 جاسىنان بىلىكتى باپكەر الەكساندر سترەلنيكوۆتىڭ قول استىندا جاتتىققان سەرىك 2004 جىلى قىراعى مامانداردىڭ نازارىنا ىلىكتى. سول ماۋسىمدا ول اسكەريلەر اراسىنداعى الەمدىك دودادا دارا شىعىپ, قازاقستان چەمپيونى اتاندى. قازاقتىڭ اسا دارىندى بوكسشىسىنىڭ ودان كەيىنگى ءجۇرىپ وتكەن جولى جارقىن جەڭىستەرگە تولى. ەندى سولاردىڭ اراسىنداعى ەڭ ماڭىزدىلارىنا توقتالايىق.
2005 جىلى قىتايدىڭ مينيان قالاسىندا ساپيەۆ 64 كگ سالماق دارەجەسى بويىنشا الەم چەمپيونى اتانادى. قىتاي ەلىندە ول سلوۆاكيالىق تيبور گلاۆاتسكي (37:13), امەريكالىق كارل داگان (37:26), ۋكراينالىق نيكولاي سەمەنياگۋ (27:15), ازەربايجاندىق ەميل ماگەرراموۆتى (41:23) جانە وزبەك ءدىلشوت ماحمۋتوۆتى (40:21) ەش قينالماي جەڭدى. 2007 جىلى چيكاگودا سەرىك سول ناتيجەسىن قايتالادى. بۇل جولى ول, تىپتەن كەرەمەت ونەر كورسەتتى. تۇساۋكەسەر كەزدەسۋىندە سەربيالىق ميلان پيپەسكيدى (22:6) 18 ۇپاي ايىرماشىلىعىمەن ۇتتى. ودان كەيىنگى ءتورت باسەكەدە ايقىن باسىمدىق تانىتتى. اتاپ ايتساق, نيكاراگۋالىق ەدۋاردو مەندوزا (2 راۋند), كانادالىق كەۆين بيزەر (3 راۋند), يراندىق مۇرتاز سەپاحۆاندي (4 راۋند) جانە جاپونيالىق ماساتسۋگي كاۆاشي (3 راۋند) قانداسىمىزدىڭ وڭاي ولجاسىنا اينالدى. فينالدا الەم چەمپيوناتىنىڭ كۇمىس جۇلدەگەرى, ەۋروپا چەمپيونى, رەسەيلىك گەننادي كوۆالەۆتىڭ سىلىكپەسىن شىعاردى. ول ونى الداپ تا, ارباپ تا ۇرىپ, 20:5 ەسەبىمەن ەركىن ەڭسەردى. سول سەكىلدى سەرىك 2010 جىلعى ازيا ويىندارى جانە 2007 مەن 2009 جىلعى قۇرلىق چەمپيوناتتارىندا ءوزىنىڭ مىقتىلىعىن تۇبەگەيلى مويىنداتتى. اتالعان جارىستىڭ بارلىعىندا قازاقتىڭ ۇلى قارسىلاستارىن باس كوتەرتپەي سابادى.
الەم چەمپيوناتتارىندا سەرىك تاعى ەكى رەت جۇلدەگەرلەر ساناتىنا قوسىلدى. 2009 جىلى ميلاندا قولا مەدالدى قاناعات تۇتتى. اپەننين تۇبەگىندە قانداسىمىز 69 كگ سالماق دارەجەسىندە سايىسقا ءتۇستى. العاشقى اينالىمداردا ول گابوندىق حۋگو ميەنيكۋە (2 راۋند) پەن ازەربايجاندىق ەميل ماحارراموۆتى (3 راۋند) مەرزىمىنەن بۇرىن ۇتسا, كوپ كەشىكپەي ۋكراينالىق تاراس شەلەستيۋككە (16:11) شاڭ قاپتىردى. ودان كەيىن قىرعىز اسادۋللو بايمۇراتوۆتى (2 راۋند) وڭدىرماي سابادى. بىراق جارتىلاي فينالدا ويدا-جوقتا رەسەيلىك اندرەي زامكوۆويعا (10:16) ەسە جىبەردى.
2011 جىلى باكۋدە ەكۆادورلىق كارلوس سانچەس (3 راۋند), تايلاندتىق اپيەت سانسيت (2 راۋند), جاپونيالىق ياسۋحيرو سۋدزۋكي (21:12), امەريكالىق ەررول سپەنس (20:10) جانە ليتۆالىق ەگيديۋس كاۆالياۋسكاس (2 راۋند) اقتىق سىنعا دەيىن القىنباي جەتتى. الايدا فينالدا س.ساپيەۆ ۋكراينانىڭ وكىلى تاراس شەلەستيۋككە (10:16) جول بەردى.
وليمپيا ويىندارىنا سەرىك ساپيەۆ ەكى رەت قاتىستى. 2008 جىلى بەيجىڭدە وعان تورەشىلەر كوپە-كورنەۋ قيانات جاسادى. شيرەك فينالدا قازاق جىگىتى تاي ەلىنىڭ وكىلى مانۋس بۋنجامونگپەن كۇش سىناستى. افينا وليمپياداسى مەن ازيا ويىندارىنىڭ جەڭىمپازى باسەكەنىڭ باسىنان اياعىنا دەيىن رينگتە اينالا قاشىپ ءجۇرىپ الدى. ءوزى ماردىمدى ءبىر سوققى دا جاسامادى. ساپيەۆ شابۋىلداسا, كىرەرگە تەسىك تاپپاي قايتا-قايتا قارسىلاسىنىڭ قولىنان ۇستاپ, ەرەجەنى ورەسكەل بۇزدى. سوعان قاراماستان تورەشى بۋنجامونگتى جەڭىمپاز دەپ جاريالادى.
2012 جىلى لوندون وليمپياداسىنا سەرىك «بەس قارۋىن اسىنىپ» باردى. بۇل جولى ونى توقتاتاتىن كۇش جوق ەدى. تۇماندى البيون ەلىندەگى جارىستىڭ باستاپقى باسەكەلەرىندە قازاقتىڭ ءور مىنەزدى ۇلى جاپونيالىق ياسۋحيرو سۋزۋكي (25:11) مەن ۆەنەسەۋالالىق گابريەل ماەسترە پەرەزدى (20:9) ەش كينالماي ۇتىپ, جارتىلاي فينالدا رەسەيدىڭ ءدۇلد ۇلى اندرەي زامكوۆويمەن قايتا قولعاپ ءتۇيىستىردى. ءدال سول ساڭلاقتان قانداسىمىز ءۇش جىل بۇرىن ميلانداعى الەمدىك دودادا ەسە جىبەرگەن ەدى. بۇل جولى ساپيەۆ زامكوۆويدىڭ (18:12) جاقسىلاپ تۇرىپ سازايىن بەردى. فينالدا قازاق بوكسشىسى ۇلىبريتانيالىق فرەد ەۆانسپەن شەبەرلىك بايقاستى. جەرگىلىكتى جانكۇيەرلەر بارىنشا قولداۋ كورسەتكەنىنە قاراماستان قانداسىمىز ونىڭ وسال تۇسىن تاپتى. باسەكەنىڭ باسىنان اياعىنا دەيىن شابۋىلداعان سەرىك سوققىلارىن ءدال دارىتىپ, ەۆانستىڭ ەركىن كوسىلۋىنە ەش مۇمكىندىك بەرمەدى. ناتيجەسىندە, اقتىق سايىس 17:9 ەسەبىمەن ساپيەۆتىڭ پايداسىنا شەشىلدى. جارىس اياقتالعان بەتتە قانداسىمىزعا وليمپيا ويىندارىنىڭ التىنىمەن قوسا, ەڭ ۇزدىك بوكسشىعا تيەسىلى ۆەل باركەر كۋبوگى تابىس ەتىلدى.
قازاقستان سپورتى تاريحىندا وشپەس ءىز قالدىرعان سەرىك ساپيەۆ بىلعارى قولعابىن شەگەگە ىلگەننەن كەيىن دە بۇل سالادان الىستاعان جوق. اۋەلى «بولاشاق» باعدارلاماسى بويىنشا لوندونداعى برۋنەل ۋنيۆەرسيتەتىندە ءبىلىمىن جەتىلدىردى. دۇنيەجۇزىلىك بوكس سەرياسى (WSB) دوداسىندا ونەر كورسەتكەن «استانا ارلانس» كلۋبىن باسقاردى. پارلامەنت ءماجىلىسىنىڭ دەپۋتاتى بولدى, سپورت جانە دەنەشىنىقتىرۋ جونىندەگى كوميتەتتىڭ توراعاسى قىزمەتىن اتقاردى. بۇگىن 40-تىڭ قىرقاسىنا شىققان سەرىك جۇمانعالي ۇلى ءار جىلدارى «وتان» مەن «پاراسات» وردەندەرى, باسقا دا مەدالدار جانە توسبەلگىلەرمەن ماراپاتتالدى.
