بۇل وتكەن جىلى قاراشادا باستالعان ء«بىلىم all» قاناتقاقتى جوباسىنىڭ جالعاسى. سول ۋاقىتتا اقتوبەدەگى 35 تاڭداۋلى ۇستاز 120 اۋىل مەكتەبىنىڭ وقۋشىلارىنا اعىلشىن, ماتەماتيكا, فيزيكا, حيميا, بيولوگيا پاندەرىنەن ونلاين پلاتفورما ارقىلى ءدارىس جۇرگىزە باستادى. تۇپكى ماقسات – اۋىل مەكتەپتەرىندەگى ءبىلىم ساپاسىن جاقسارتۋ. وسى جوبانىڭ باسىندا ەلىمىزدەگى ورتا ءبىلىم جۇيەسى رەفورماتورلارىنىڭ ءبىرى كۇلاش ءشامشيدينوۆا تۇرعانىن ايتىپ وتكەنىمىز ءجون. ول بىرنەشە رەت اقتوبە وبلىسىنا كەلىپ, ويىل, قوبدا, حرومتاۋ اۋداندارىنداعى ء«بىلىم all» جوباسىنا قاتىسقان شاعىن جيناقتى مەكتەپتەردىڭ ونلاين دارىستەرىن باقىلاپ, وقۋشىلارمەن, مۇعالىمدەرمەن اقىلداستى. سونىمەن قاتار بۇرىنعى ءبىلىم جانە عىلىم ءمينيسترى بولعان اسحات ايماعامبەتوۆ پەن تسيفرلىق دامۋ, يننوۆاتسيا جانە اەروعارىش ونەركاسىبى ءمينيسترى باعدات مۋسين ءۇش اۋدانداعى شاعىن جيناقتى مەكتەپتەرگە كەلىپ ساباققا قاتىستى. قاناتقاقتى جوبانىڭ جەتىستىگى مەن كەمشىلىگىن تارازىلاي كەلە, شالعاي ەلدى مەكەندەردەگى ينتەرنەت بايلانىسىن جاقسارتۋ كەزەك كۇتتىرمەيتىن ماسەلە ەكەندىگى بەلگىلى بولدى. وتكەن جىلى ينتەرنەت بايلانىسىنىڭ السىزدىگىنەن 25 اۋىل مەكتەبىندە ونلاين ساباقتار وتكىزۋ قيىندىققا ءتۇستى. دەگەنمەن جۇيەلى جۇمىستىڭ ارقاسىندا بيىل بىرنەشە مەكتەپتە ينتەرنەت بايلانىسى قالپىنا كەلتىرىلدى.
اقتوبە وبلىستىق ءبىلىم باسقارماسىنىڭ باسشىسى جايىق سۇلتاننىڭ ايتۋىنشا, بۇل – بىرنەشە مىڭداعان اۋىل بالاسىنىڭ ساپالى ءبىلىم الۋىنا جول اشاتىن جوبا. ويتكەنى وبلىس ورتالىعىنداعى مامانداندىرىلعان مەكتەپ-ينتەرناتتار 500-دەن ارتىق بالا قابىلداي المايدى. ەكىنشى جاعىنان, بيۋدجەت قارجىسى نەگىزىنەن بالا سانى كوپ مەكتەپتەرگە باعىتتالادى دا, وقۋشى سانى وتە از شاعىن جيناقتى مەكتەپتەر نازاردان تىس قالىپ قويادى.
قازىردە «قازاقستان حالقىنا» قورىنان بولىنگەن قاراجاتقا شاعىن جيناقتى مەكتەپتەردىڭ قازاق تىلىنەن باستاپ العاشقى اسكەري دايىندىق پانىنە دەيىنگى بارلىق كابينەتى, باستاۋىش سىنىپتار, كىتاپحانا مەن اسحانا, ءماجىلىس زالدارى قايتا جابدىقتالىپ جاتىر. ون ەكى تىرەك مەكتەپتە ارت ستۋديا, كينوستۋديا كابينەتى اشىلدى, مۋزىكا كابينەتتەرىنە قازاقتىڭ ۇلتتىق اسپاپتارى قويىلدى. سونىمەن قاتار «قازاقستان حالقىنا» قورى دەنساۋلىعىندا كىناراتى بار بالالارعا ارنالعان اقتوبەدەگى ءتورت مەكەمەنىڭ ماتەريالدىق-تەحنيكالىق بازاسىن جاڭعىرتۋعا كىرىستى. بۇگىندە №7 ارنايى تۇزەتۋ مەكتەبىنىڭ بەس وقۋ كابينەتى, وبلىستىق ارنايى مەكتەپ-بالاباقشا, جايساڭ ارنايى ءبىلىم بەرۋ ۇيىمى, وبلىستىق ارنايى مەكتەپ-ينتەرنات, كوللەدجىنىڭ وقۋ كابينەتتەرى, شەبەرحاناسى تولىق جاڭارتىلىپ, جاڭا جيھازدار ساتىپ الىندى», دەيدى جايىق سۇلتان.
زاماناۋي ءبىلىم رەسۋرستارىنا قولى جەتكەن جەتى مىڭعا جۋىق اۋىل بالاسىنا ساباق بەرەتىن ۇستازدار سانى وسى كۇنى 132-گە جەتتى. ولاردىڭ قاتارىنا Zoom پلاتفورماسى ارقىلى دارىستەر وتكىزۋگە اۋىل مۇعالىمدەرى دە قوسىلدى. ۇيرەتە ءجۇرىپ, ۇيرەنۋ ءادىسى اۋىلدىڭ جاس مۇعالىمدەرى ءۇشىن وتە ءتيىمدى بولدى. ولار جىل سايىن وبلىستىق, رەسپۋبليكالىق پاندىك وليمپيادا جەڭىمپازدارىن دايارلاپ جۇرگەن ارىپتەستەرىنەن بالانىڭ قابىلەتىن ۇشتاۋ تاسىلدەرىن, ساباق ءتۇسىندىرۋ ادىستەمەسىن ۇيرەنەدى. ونىڭ ۇستىنە, ۇزدىك ۇستازدار ونلاين وقىتۋ ارقىلى شاعىن جيناقتى مەكتەپتەردىڭ 10-11-سىنىپ وقۋشىلارىن ۇبت-عا دايارلايدى. بۇل كۇندەرى قاناتقاقتى جوباعا قاتىسقان شاعىن جيناقتى مەكتەپتەردە مونيتورينگ باستالدى. استاناداعى نازارباەۆ زياتكەرلىك مەكتەبىنەن جانە «قازاقستان حالقىنا» قورىنان كەلگەن 26 باقىلاۋشى 12 تىرەك مەكتەپ, 134 شاعىن جيناقتى جانە 7 باقىلاۋ مەكتەبىنىڭ 6,8,10-سىنىپ وقۋشىلارىنان بەس ءپان بويىنشا تەست الۋدا. وسى ارقىلى ءبىر جىلدا قاي مەكتەپتە ءبىلىم ساپاسىنىڭ وسكەنىن, قاي مەكتەپتە تومەندەپ كەتكەنىن انىقتايدى. بۇل جولى باقىلاۋشىلار قاناتقاقتى جوباعا قوسىلماعان, بىراق اپتاسىنا بەس ءپان بويىنشا ءبىر رەت ونلاين ءدارىس جۇرگىزىلەتىن جەتى مەكتەپتەگى وقۋشىلاردىڭ ءبىلىم دەڭگەيىن دە باقىلاۋعا الدى.
وسى جوباعا قالا مەكتەپتەرىنىڭ ۇستازدارى ىقىلاسپەن كىرىسكەنىن اتاپ وتكەن ءجون. ويتكەنى ولار اۋىل مەكتەبى وقۋشىلارىنىڭ ءبىلىم ساپاسىن جوعارىلاتۋعا اسا قۇلشىنىستى. اۋىل مۇعالىمىنىڭ كاسىبي دەڭگەيىن زاماناۋي تاسىلدەرمەن جەتىلدىرۋىنە جول اشقان جوبانىڭ ارقاسىندا, ءوز ماماندىعىن سۇيەتىن, ىزدەنۋدەن جالىقپايتىن وقىتۋشىلار قاتارى كوبەيىپ جاتىر. اۋىلدى تۇلەتۋ ءۇشىن ەڭ الدىمەن مەكتەبىن تۇزەتۋ كەرەك دەگەن وسى بولار.
اقتوبە وبلىسى
