2011 جىلى پولشالىق ينۆەستوردىڭ كەلۋىمەن زاۋىت قايتا تۇلەدى. ينۆەستيتسيالىق جوبا ىسكە اسىرىلىپ, قوندىرعىلار جاڭعىرتۋدان ءوتتى. جاڭا وندىرىستىك جەلىلەر ىسكە قوسىلدى. ينۆەستور زاۋىتتى اياعىنا تۇرعىزۋ ءۇشىن 108 ملن دوللار ينۆەستيتسيا قۇيعان. ۇدەمەلى-يندۋستريالدى يننوۆاتسيالىق دامۋ باعدارلاماسىمەن قاتتى تابلەتكا, امپۋلا, ۇنتاق تۇرىندە ءدارى شىعاراتىن جاڭا وندىرىستىك كەشەن سالىندى. زاۋىتقا يتاليا, گەرمانيا, وڭتۇستىك كورەيا ەلدەرىنىڭ زاماناۋي وزىق تەحنولوگيالارى ورناتىلدى. «حيمفارم» كومپانياسى قازاقستانداعى ەڭ وزىق عىلىمي-زەرتتەۋ ورتالىعىنا يە. بۇل كاسىپورىنعا جاڭا دارىلەردى ويلاپ تابۋعا مۇمكىندىك بەرەدى. سوندىقتان Santo دارىلىك پرەپاراتتاردى ءوزى جاساپ, ساۋداعا قويىپ, قازاقستان مەن ورتا ازياعا قولجەتىمدى باعادا ەكسپورتتايدى.
كومپانيانىڭ ءوندىرىسى جىل سايىن 708 ملن تابلەتكا, 255 ملن كاپسۋلا, 46,7 ملن تسەفالوسپورين, 15,5 ملن ميتسينا توبىنداعى انتيبيوتيك قۇتىلارىن, 8,4 ملن قۇتىداعى ستەريلدى ەمەس سۇيىق دارىلەردى شىعارۋعا قۋاتتى. «حيمفارم» – ءارتۇرلى اۋرۋعا ارنالعان 250-دەن اسا ءدارى ءتۇرىن وندىرەتىن قازاقستانداعى ەڭ ۇلكەن فارموكولوگيالىق كومپانيا. كاسىپورىن نارىق سۇرانىسىنا قاراي جىل سايىن ءدارى تۇرلەرىن كوبەيتىپ كەلەدى. دارىلىك پرەپاراتتارىنىڭ باسىم بولىگىن ينەكتسيالىق, ينفۋزيوندى ەرىتىندىلەر مەن تابلەتكالار قۇرايدى. Santo تەك قازاقستان نارىعىن قامتاماسىز ەتىپ قانا قويماي, رەسەي مەن موڭعوليا ەلدەرىنە ونىمدەرىن جونەلتەدى. قىرعىزستان مەن وزبەكستاندا كومپانيانىڭ وكىلدىكتەرى جۇمىس ىستەيدى. كومپانيادا ءارتۇرلى انتيبيوتيك شىعارۋعا, دارىلىك زاتتاردى ساقتاۋعا رۇقسات بەرەتىن حالىقارالىق GMP, GDP سەرتيفيكاتتارى بار.
2019 جىلى Polfarma توبى كومپانياسى ەۋرازيالىق ەكونوميكالىق وداق شەڭبەرىندە ماقۇلدانعان دارىلەر تىزبەگىنىڭ قاتارىنا ەندى. Santo قىزمەتكەرلەرىنىڭ كاسىبي بىلىكتىلىگىن ارتتىرۋعا كوپ كوڭىل بولەدى. ماسەلەن, كومپانيا Santo academy ونلاين-تۇعىرناماسىن ىسكە قوستى. سول ارقىلى ءۇش ەلدىڭ فارمولوگتەرى ونلاين-تۇعىرناماعا كىرىپ, قاجەتتى دەڭگەيدە ءبىلىم الا الادى. كومپانيا قىزمەتكەرلەرىنە ينتەرنەت ءونىمنىڭ ءموبيلدى قوسىمشاسى دا قاراستىرىلعان. 2021 جىلدان باستاپ Santo ونلاين وقۋعا ارنالعان Laba كۋرسىن اشتى. مۇندا قولدانۋشىلار قارجى, ساتۋ, تالداۋ, ماركەتينگ, PR, باسقارۋ جانە بيزنەس باعىتتارى بويىنشا 20 ءتۇرلى ءدارىس تىڭداي الادى. كومپانيا يننوۆاتسيالىق يدەيالاردى دامىتۋعا ارنالعان Leonardo جوباسىن دا قولعا الدى. بۇل جوباعا سايكەس كەز كەلگەن ادام كومپانيا جۇمىسىن جاقسارتۋعا بايلانىستى ءوزىنىڭ يننوۆاتسيالىق يدەياسىن جۇزەگە اسىرۋىنا بولادى. Leonardo جوباسىندا كوپ داۋىس جيناعان 5 قىزمەتكەردىڭ يدەياسى جەڭىمپاز دەپ تانىلىپ, قازىر ولاردى ناقتى ىسكە اسىرۋعا جۇمىستار اتقارىلىپ جاتىر.
كومپانيا زاۋىت اينالاسىندا تۇرىپ جاتقان جاعدايى تومەن وتباسىلارعا الەۋمەتتىك كومەك كورسەتىپ وتىرادى. كاسىپورىن «GO WEST!» جوباسىن باستادى. سونىڭ كومەگىمەن ورتا ازيادا فارماتسەۆتيكالىق حابتىڭ قۇرىلۋىنا, عىلىمي-زەرتتەۋ, سىناق الاڭىن اشىپ, ەۋروپالىق وداقتىڭ ساپا سەرتيفيكاتىن الۋىنا جاعداي جاسادى. نەگىزگى جوسپار – دارىلىك پرەپاراتتاردى ەۋروپالىق وداق نارىعىنا ەكسپورتتاۋ. Santo Polfarma توبىنا كىرەتىن باسقا دا كومپانيامەن بىرگە ەۋروپالىق وداقتىڭ ۋاكىلەتتى ورگانىنان رۇقسات الىپ, قازاقستاندا سيتاگليپتين دارىلىك ءونىمنىڭ ءوندىرىسىن باستاماق. بۇل دارىلىك پرەپاراتتى قويمادا ساقتاۋ, تاسىمالداۋ دا ءبىزدىڭ ەلىمىزدە جۇزەگە اسادى. ءتيىستى قۇجات 2024 جىلى قولعا تيەدى. وسىلايشا, «حيمفارم» ورتا ازيانىڭ فارماتسەۆتيكا تاريحىندا ءبىرىنشى رەت ەۋروپالىق وداقتىڭ ينسپەكتسياسىنان ءوتىپ, ساپا سەرتيفيكاتىنا يە بولعان كاسىپورىن اتانىپ وتىر.
زاۋىتتىڭ شەجىرەسىنە قىسقاشا توقتالساق, ورىس گەنەرالى م.چەرنياەۆ ەلىمىزدىڭ وڭتۇستىگىن جاۋلاپ العان سوڭ شىمكەنت قالاسى تۇركىستان گەنەرال-گۋبەرناتورلىعىنىڭ سىرداريا وبلىسىنا قارايدى. سول تۇستا وڭتۇستىك اتىراپتىڭ شۇرايلى جەرى مەن اۋا رايىنا قىزىعىپ ورىس پەرەسەلەندەرى قونىس اۋدارا باستايدى. ول كەزدە شىمشاھارداعى وزەن بويىندا جۋسان كوپ وسەتىن. ونىڭ ەمدىك قاسيەتىن جاقسى بىلگەن ورىس كوپەسى ن.يۆانوۆ ورىنبورلىق كوپەس پ.ساۆەنكوۆپەن بىرگە 1882 جىلى تۇڭعىش رەت ىشەكقۇرتقا قارسى سانتونين ءدارىسىن شىعاراتىن زاۋىت تۇرعىزادى. زاۋىت قۇرىلىسىندا كوپەستەر كۇيگەن كىرپىشتى قولدانعان. ال توبەسىن تەمىر قاڭىلتىرمەن جاپقان. بۇل زاۋىت وسى كۇيىندە ءبىر عاسىر بويى ساقتالىپ تۇرعان. سانتونين ءدارىسىن وندىرەتىن كاسىپورىن بىرنەشە عيماراتتان قۇرالدى. «پۋتەۆىە وچەركي» ەڭبەگىنىڭ اۆتورى پ.شرەيدەر زاۋىتتا 50 شاقتى ادام جۇمىس ىستەگەنىن ايتادى. ولار نەگىزىنەن جەرگىلىكتى قازاقتار بولعان. «ولار تۇيەنى قالاي وڭاي باسقارسا, كاسىپورىنداعى ءتۇرلى ماشينانى دا سونداي ەپشىلدىكپەن جۇرگىزەتىن», دەدى اۆتور. ءبىر قىزىعى سول داۋىردە وڭتۇستىك ولكەسىندە شىعارىلعان تاۋارلار تەك جەرگىلىكتى تۇتىنۋشىلارعا ارنالعان. تەك سانتونين ءدارىسى قازاق دالاسىنان تىس ەلدەرگە ەكسپورتتالعان. كاسىپورىندا جىلىنا حيميالىق تازا 2 مىڭ پۇت سانتونين وندىرىلگەن. شىمكەنتتىڭ ءدارىسىنىڭ ساپاسى جوعارى بولعانى سونشالىق, ول جاپونيا, ءۇندىستان, گەرمانيا, انگليا ەلدەرىنە دەيىن جونەلتىلەتىن. سونىڭ ناتيجەسىندە زاۋىت ونداعان جىلدار بويى ۇزدىكسىز جۇمىس ىستەپ تۇردى. ال كەڭەستىك داۋىردە كاسىپورىندا نەگىزىنەن وسىمدىكتەن جاسالعان دارىلەر مەن ەسىرتكى پرەپاراتتارى شىعارىلدى.
1993 جىلى «حيمفارم» اكتسيونەرلىك قوعامعا وزگەرىپ, تاۋەلسىز قازاقستاننىڭ تۇسىنداعى العاشقى وتاندىق فارموكولوگيالىق زاۋىت بولدى. 2011 جىلى پولشالىق Polfarma كومپانياسىنىڭ توبىنا ەنىپ, ينۆەستيتسيانىڭ كۇشىمەن زاماناۋي ۇلگىدەگى جاڭعىرتۋدى باسىنان وتكەرەدى.
شىمكەنت
