2022 جىلى قازاقستان مەن قىتاي اراسىنداعى تەمىرجول جۇك تاسىمالى 23 ملن توننادان ارتىپ, تاريحي ماكسيمۋمنان استى. 2023 جىلدىڭ باسىنان بەرى اتالعان كورسەتكىش تاعى 22%-عا ءوستى. مۇنداي جاعدايدا نەگىزگى حالىقارالىق باعىتتاردىڭ قيىلىسىندا ورنالاسقان الماتى تەمىرجول تورابىنا جۇكتەمە ارتىپ وتىر. وسى رەتتە جاڭا جوبانى ىسكە اسىرۋ الماتى ستانساسىن اينالىپ وتەتىن «جەتىگەن – قازىبەك بەك» جاڭا تەمىرجولىنا جۇك اعىنىن قايتا باعىتتاۋعا مۇمكىندىك بەرەدى. جالپى, بۇل جەلى الماتى تورابىنداعى جۇكتەمەنى 40%-عا ازايتىپ, جۇك جەتكىزۋ ۋاقىتىن ەداۋىر قىسقارتادى.
تەمىرجول جەلىسى قۇرىلىسىن باستاۋ راسىمىنە قاتىسقان پرەمەر-مينيستر ءاليحان سمايىلوۆ «التىنكول-قورعاس» شەكارالىق وتكەلىندەگى تەمىرجول باعىتىندا كەيىنگى جىلدارى ءوسىم قارقىن العانىن اتاپ ءوتتى.
«اتالعان ترانزيتتىك دالىزدە الماتى تەمىرجول تورابى شۋ, اقتوعاي, التىنكول, الماتى-2 باعىتتارى بويىنشا پويىزدار قوزعالىسىن قامتاماسىز ەتەدى. جوبانى ىسكە اسىرۋ جۇكتەردى جەتكىزۋ مەرزىمىن 2 ەسەگە قىسقارتادى», دەدى پرەمەر-مينيستر.
ول سونداي-اق جوبانى جۇزەگە اسىرۋ بارىسىندا وتاندىق ءونىم ۇلەسى كەمىندە 85% بولاتىنىن ايتتى. قۇرىلىس كەزىندە 1 400 ادام جۇمىسپەن قامتىلىپ, جەلى ىسكە قوسىلعاندا شامامەن 500 ادامعا تۇراقتى جۇمىس ورنى اشىلادى.
«شپال, رەلستەر مەن ترانسفورماتورلار شىعارۋدى, ينەرتتى ماتەريالدار, قۇم جانە قيىرشىق تاستاردى جەتكىزۋدى جەرگىلىكتى كومپانيالار جۇزەگە اسىرادى», دەدى ءاليحان سمايىلوۆ.
جالپى قۇرىلىس بارىسىندا 130 شاقىرىم تەمىرجول توسەلەدى, 3 ستانسا, 13 كوپىر, 5 تەمىرجول جانە 1 اۆتوكولىك وتكەلى سالىنادى.
رەسمي ءىس-شارادا قۇرمەتتى تەمىرجولشى, ەڭبەك ارداگەرى قالتاي سامبەتوۆ ءسوز سويلەدى.
«جەتىگەن – قازىبەك بەك» بەكەتتەرىنىڭ اراسىندا تەمىرجولشىلار كوپتەن كۇتكەن جول قۇرىلىسى باستالدى. بۇل جولدىڭ ماڭىزى زور, ويتكەنى ول ەل ەكونوميكاسىنىڭ دامۋىنا, ءوسىپ-وركەندەۋىنە ىقپال ەتەدى. اتالعان تەمىرجول باعىتى قازاقستان مەن قىتاي, ورتالىق ازيا مەن رەسەي اراسىنداعى ترانزيتتىك مۇمكىندىكتەردى ەداۋىر ارتتىرادى», دەدى ول.
وتاندىق ءونىمنىڭ ۇزدىكسىز ەكسپورتتالۋىن قامتاماسىز ەتۋ جانە جۇك ءترانزيتىن ارتتىرۋ ماقساتىندا ەلىمىزدە تەمىرجول ينفراقۇرىلىمىن دامىتۋ جۇمىسى قارقىندى ءجۇرىپ جاتقانىن ايتا كەتكەن ءجون. اتاپ ايتقاندا, وتكىزۋ قابىلەتىن ارتتىرۋ ءۇشىن «دوستىق – مويىنتى» ۋچاسكەسىندە ەكىنشى جولدار سالىنىپ جاتىر. جاقىن ارادا قىتايمەن ءۇشىنشى حالىقارالىق ءتۇيىسۋ نۇكتەسىنە شىعاتىن «داربازا – ماقتاارال» جانە «باقتى – اياگوز» تەمىرجول جەلىلەرىنىڭ قۇرىلىسىن باستاۋ جوسپارلانىپ وتىر. ءۇش جىل ىشىندە بارلىعى 1300 شاقىرىمنان استام تەمىرجول سالىنادى.
«بۇگىن ءبىز الماتى تورابىن اينالىپ وتەتىن تەمىرجول جەلىسىنىڭ قۇرىلىسىن باستايمىز. ول ورتالىق ازياعا, ەۋروپاعا جانە كاسپي تەڭىزى پورتتارىنا باعىتتالعان ترانزيتتىك جۇكتەردىڭ ءوتۋىن جىلدامداتادى. بۇل جەلى سوڭعى ۋاقىتتا قارقىندى دامىپ كەلە جاتقان الماتى تورابىن جەڭىلدەتۋ ءۇشىن وتە قاجەت. اسىرەسە, الماتىنىڭ ماڭى, ونەركاسىپ دامىپ كەلەدى. وتكىزۋ قابىلەتىن قاجەت ەتەتىن كولىك-لوگيستيكالىق ورتالىقتار دا سالىنىپ جاتىر», دەدى «قتج» ۇك» اق باسقارما توراعاسىنىڭ ورىنباسارى قانات الماعامبەتوۆ.
ونىڭ ايتۋىنشا, بۇگىن الماتى تورابىنا كەلەتىن جۇك 1,5-2 تاۋلىككە كەشىگىپ جاتىر. الايدا جاڭا تەمىرجول جەلىسىنىڭ ارقاسىندا توراپتىڭ جۇمىسى ايتارلىقتاي جاقسارادى.
«مەنىڭ ويىمشا, مۇندا قىزمەت كورسەتىلەتىن بارلىق جۇك جونەلتۋشىلەر مەن جۇك الۋشىلار مۇنى بىردەن سەزىنەدى. بۇل جۇمىس پرەزيدەنتتىڭ ەلىمىزدىڭ كولىك-لوگيستيكالىق مۇمكىندىكتەرىن دامىتۋعا قاتىستى تاپسىرمالارىن ىسكە اسىرۋ شەڭبەرىندە جۇرگىزىلىپ وتىر. بۇگىندە رەسپۋبليكادا جۇكتەردى جەدەل وتكىزۋ ءۇشىن شىن مانىندە قولايلى جاعدايلار جاسالا باستادى», دەدى ول.
