فوتو: gov.kz
«سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قىرعىز رەسپۋبليكاسىنىڭ اۋىل شارۋاشىلىق ءمينيسترى اسقاربەك جانىبەكوۆپەن كەزدەسىپ, شۋ جانە تالاس وزەندەرىندەگى مەملەكەتارالىق پايدالانۋداعى سۋ شارۋاشىلىعى قۇرىلىستارىن پايدالانۋ جونىندەگى بىرلەسكەن كوميسسياعا ءتيىستى تاپسىرما جۇكتەلدى. ەلىمىزگە سۋ جىبەرۋدى جاقسارتۋ ءۇشىن مەملەكەتارالىق پايدالانۋداعى سۋ شارۋاشىلىعى نىساندارىنىڭ تىزبەسىن كەڭەيتۋ قاجەتتىگى دە ايتىلدى. بۇل تىزبەگە كۇركىرەسۋ وزەنىندەگى قۇرىلىستارىمەن «اقمولدا», «قاراتاقى» جانە «تومەنتامعا» ارنالارىن, شۋ وزەنىندەگى «كولوس» كانالىن جانە تالاس وزەنىندەگى قۇرىلىستارىمەن بىرگە «كوج» كانالىن ەنگىزۋدى ۇسىنادى», دەلىنگەن اقپاراتتا.
«بيىل جامبىل وبلىسىنىڭ شارۋالارى شۋ جانە تالاس وزەندەرىنىڭ باسسەيندەرىندە سۋارمالى سۋ تاپشىلىعىن سەزىندى. سوندىقتان وسىنداي جاعدايدىڭ قايتالانۋىنا جول بەرمەۋ ءۇشىن قىرعىز ارىپتەستەرىمىزبەن بىرگە شۋ جانە تالاس وزەندەرىنىڭ باسسەيندەرىندە كەلەسى ۆەگەتاتسيالىق كەزەڭدى دۇرىس جوسپارلاۋ بويىنشا جۇمىستى الدىن الا جاساۋ وتە ماڭىزدى», دەدى ن.نۇرجىگىتوۆ. شۋ جانە تالاس وزەندەرىندە مەملەكەتارالىق پايدالانۋداعى سۋ شارۋاشىلىعى قۇرىلىستارىن پايدالانۋ جونىندەگى بىرلەسكەن كوميسسيانىڭ كەلەسى وتىرىسى 14 جەلتوقساندا الماتى قالاسىندا وتەدى.
سۋ رەسۋرستارى جانە يرريگاتسيا ءمينيسترى ن.نۇرجىگىتوۆ بۇعان دەيىن قىزىلوردا, تۇركىستان وبلىستارىنا سۋ جىبەرۋ جونىندە وزبەكستان تاراپىمەن دە كەلىسىم جاساسقان بولاتىن.
