فوتو: Turizm_jane_sport_ministrligi
بيىلعى چەمپيوناتقا 17 وبلىس جانە استانا, الماتى, شىمكەنت قالالارىنان 463 بالۋان قاتىسىپ وتىر. سالتاناتتى اشىلۋ راسىمىندە ءسوز العان تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ قازاقستاندا 133 مىڭعا تارتا ادام دزيۋدومەن شۇعىلداناتىنىن ءمالىم ەتتى. جۋىردا قىتايدىڭ حانچجوۋ قالاسىندا جازعى ازيا ويىندارى ءوتتى. قازاقستاننان بارعان 525 سپورتشىعا ارتىلعان سەنىم اقتالمادى. مەملەكەت باسشىسى قاسىم-جومارت توقاەۆ ازيا ويىندارىنان كەيىن سپورتشىلار مەن باپكەرلەردى, وسى سالاعا جاۋاپتى مينيسترلىكتىڭ وكىلدەرىن قابىلداپ, قۇلدىراعان سالانىڭ الەۋەتىن كوتەرۋگە كۇش سالۋ قاجەتتىگىن ايتتى. ءتىپتى «وتاندىق سپورتتا ءادىل باسەكەلەستىك قاعيداتىن ورناتۋ» جونىندە تاپسىرما دا جۇكتەدى. قازاقستان دزيۋدو فەدەراتسياسى ىشكى بىرىنشىلىكتىڭ ءادىل ءوتۋى ءۇشىن شەتتەن تاۋەلسىز 3 تورەشى شاقىرتىپتى.
سونىمەن بيىلعى ەل بىرىنشىلىگىنە 463 بالۋان قاتىستى. ەلىمىزدە 133 مىڭعا تارتا ادام سپورتتىڭ وسى تۇرىمەن شۇعىلدانادى دەدىك. قازاقستان جازعى وليمپيادا ويىندارىنا 1996 جىلدان باستاپ قاتىسادى. دزيۋدو كۇرەسىنەن ءالى چەمپيون شىعارا العامىز جوق. 2008 جىلى بەيجىڭ جازعى وليمپياداسىندا اسحات جىتكەەۆ (100 كەلى), 2016 جىلى ريو جازعى وليمپياداسىندا ەلدوس سمەتوۆ (60 كەلى) كۇمىس جۇلدەگەر اتاندى. 2016 جىلى برازيليا ەلى وتكىزگەن جازعى وليمپيادا ويىندارىندا موڭعوليادان اكەلگەن سپورتشى گالبادراح وتگونتسەتسەگ (48 كەلى) قىزدار اراسىندا قولا مەدال الدى. ەلدوس سمەتوۆ تە 60 كەلىدە قولا جۇلدە يەلەندى. جازعى وليمپيادا ويىندارىنا 7 مارتە قاتىسىپ, دزيۋدو كۇرەسىنەن العانىمىز وسى 4 مەدال عانا. ەلىمىزدە 133 مىڭ ادام دزيۋدومەن كۇرەسەدى دەپ ماقتانعانىمىزبەن, كۇنى كەشە قىتايدا وتكەن جازعى ازيا ويىندارىندا وزبەكستان سپورتشىلارى كۇرەستىڭ وسى تۇرىنەن 3 التىن, تاجىكستان مەن قىرعىزستان بالۋاندارى دا 1 التىن مەدال ولجالادى. بىزگە بۇيىرعانى 1 كۇمىس, 2 قولا جۇلدە عانا.
كەلەر جىلدىڭ ەنشىسىندەگى پاريج جازعى وليمپياداسىنا دا ساناۋلى اي قالدى. دزيۋدو كۇرەسىنەن دە بالۋاندارعا جۇكتەلەر ءۇمىت وراسان. ءبىز وليمپيادا چەمپيونىن باپتاپ شىعارعانىمىزعا ماقتانۋعا ءتيىسپىز, ستاتيستيكا سانىنا ەمەس.
