ماگاداندا قازاننىڭ 24-ءى مەن قاراشا ايىنىڭ 1-ءى ارالىعىندا وتكەن IV «الەم حالىقتارىنىڭ سۇيەك ويۋ ونەرى» فەستيۆالىنە التى ەل مەن رەسەي فەدەراتسياسىنىڭ 23 ايماعىنان سۇيەكتەن ءتۇيىن تۇيگەن 100-دەن اسا اۆتور قاتىستى. ءداستۇرلى حالىقتىق ونەرگە قولداۋ كورسەتىپ ناسيحاتتاۋ, دامىتۋ جانە ءار ەلدەگى سۇيەكتەن بۇيىم جاساۋشىلاردىڭ ءوزارا بايلانىسىن, تاجىريبە الماسۋىن قامتاماسىز ەتۋ ماقساتىنداعى اۋقىمدى جوبا رەسەي سۋرەتشىلەر وداعى قيىر شىعىس فەدەرالدىق وكرۋگى باسشىلىعىنىڭ باستاماسىمەن ۇيىمداستىرىلعان.
– استانادان ماسكەۋگە 3 ساعات, ماسكەۋدەن ماگادانعا 9 ساعات ۇشتىق. كەزىندە اتام بوزجىگىت ايداۋدا بولعان ماگادان نەمەرەسى – مەنى قوناق رەتىندە قابىلدادى. يتجەككەنگە بابالارىمىزدىڭ قالاي ءتىرى جەتكەنىنە, ازاپ پەن بىرگە سۋىق اۋا رايىنان قالاي ءتىرى كەلگەنىنە تاڭدانىسىمدى ءالى شەكتەي الماي ءجۇرمىن. ماگادان قالاسىنىڭ سولتۇستىگىندەگى بيىك توبەنىڭ باسىنا ورنالاسقان «ماسكا سكوربي» دەپ اتالاتىن ساياسي قۋعىن-سۇرگىن ەسكەرتكىشىنە باردىق, تۇتقىندار تۋرالى قانداي دا ءبىر دەرەك تابىلار ما ەكەن دەگەن ويمەن ماگادان وبلىستىق مەملەكەتتىك ارحيۆىنە باردىم. اتام تۋرالى مالىمەت تابا المادىم, ايتسە دە ەلدەن «مەنىڭ اتام تۋرالى دەرەك جوق پا ەكەن؟» دەپ حابارلاسىپ جاتقان كوپتەگەن جەرلەسىم ءۇشىن ارحيۆپەن قالاي ونلاين بايلانىس ورناتۋعا بولاتىندىعىن ءبىلدىم, – دەيدى الدابەرگەن جايلاۋ ۇلى.
الدابەرگەننىڭ ايتۋىنشا, امەريكا, ەۋروپا ەلدەرىنىڭ شەبەرلەرى سانكتسياعا بايلانىستى سايىسقا قاتىسا الماعان, بىراق قىزىعۋشىلىق تانىتىپ, ءوز تۋىندىلارىن ۇسىنعاندار سانى كوپ, بايقاۋدىڭ اۋقىمى كەڭ بولعان.
– كورمەدەن كەرەمەت اسەر الىپ ورالدىم, ەندى ءوزىمىز ءۇشىن شەبەرلىك دەڭگەيىن ءبىر ساتى جوعارى ۇستاۋىم كەرەك. مىقتى شەبەرلەرمەن تانىسىپ, كاسىبي بىلىكتىلىگىمدى شىڭدادىم. كەلەسى جىلى وتەتىن فەستيۆالعا شاقىرتۋ الدىم, بۇل ماعان ۇلكەن ىزدەنىسپەن تىنباي جۇمىس جاساۋ كەرەكتىگىن ۇقتىرادى, – دەيدى شەبەر.
اۋىلعا كەلە سالىسىمەن ماڭعىستاۋ وبلىسىنىڭ استانا قالاسىنداعى مادەني كۇندەرىنە شاقىرتۋ العان الدابەرگەن تىلەنباەۆتىڭ «اداي كوتەرىلىسى» ينستاللياتسياسى «دالا وركەنيەتى كوشپەلىلەر قولونەرىندە» كورمەسىنە قويىلدى.
– ينستاللياتسيادا ماڭعىستاۋ قازاقتارىنىڭ وتارشىلدىق جۇيەگە قارسى سىنباعان اسقاق رۋحى بەينەلەنگەن. قازاق دالاسىن جاۋلاعان پاتشا وكىمەتىنىڭ اتقان وعى ماڭعىستاۋ قازاقتارىنىڭ قالقانىنان وتكەنمەن, سۇيەگىنە جەتپەدى, ءور حالىق مادەنيەتى مەن ءداستۇرىن ساقتاي ءبىلدى, تۋىندىدا وسى ويدى بەينەلەگىم كەلدى, – دەيدى اۆتور.
الدابەرگەن شەبەردىڭ جەتىستىكتەرى از ەمەس, الايدا ماگاداندا 27 ەلدىڭ مىقتىلارىنا شاڭ قاپتىرىپ, توپ جارۋى ازىرگە ەڭ ۇلكەن جەتىستىگى. بۇل – بولاشاعىنا جاسالعان تاعى ءبىر باسپالداق ەكەنى انىق.
ماڭعىستاۋ وبلىسى
