تاياۋدا عانا مەكسيكانىڭ كانكۋن قالاسىندا وتكەن قورىتىندى تۋرنيردە توپ جارىپ, بۇگىنگى تاڭدا الەمنىڭ ءبىرىنشى راكەتكاسى اتانىپ وتىرعان 22 جاستاعى يگا سۆەنتەكتىڭ ەسەپشوتىنا 9,86 ملن دوللار كولەمىندە قاراجات اۋدارىلدى. ەكىنشى ورىندى ارينا سوبولەنكو يەلەنىپ وتىر. راسىندا دا, بيىلعى ماۋسىم بەلارۋستىڭ وكىلى ءۇشىن وتە تابىستى بولدى. ول اۋستراليانىڭ اشىق بىرىنشىلىگىندە توپ جارىپ, US open دوداسىنىڭ فينالىندا ونەر كورسەتتى. رولان گارروس پەن ۋيمبلدوندا جارتىلاي فينالعا دەيىن جەتتى. سوبولەنكونىڭ تابىسى – 8,20 ملن دوللار. ءۇشىنشى جانە ءتورتىنشى ورىنداردى اقش-تىڭ قوس مىقتىسى – كوكو گاۋفف پەن دجەسسيكا پەگۋلا ءوزارا ءبولىستى. العاشقىسى – 6,67 جانە ەكىنشىسى – 5,97 ملن-دى ەنشىلەدى.
ءتورتىنشى ورىنعا ءبىزدىڭ ەلەنا رىباكينا تۇراقتادى. قازاقستاننىڭ تۋى استىندا ونەر كورسەتىپ جۇرگەن 24 جاستاعى ارۋ بيىل 5,49 ملن دوللار ولجالادى. ءبىر قۋانتارلىعى, بىلتىر ۋيمبلدوننىڭ جەڭىمپازى اتانعاننان كەيىن ول ەلىمىزدىڭ دارىندى جاستارىن قولداۋ ءۇشىن 35 ملن تەڭگە كولەمىندە قاراجات ءبولدى. سونىڭ ارقاسىندا 14 جاس ويىنشىنىڭ ارقايسىسى 2,5 ملن تەڭگەدەن الدى. بۇل – قازاقستاننىڭ باسقا دا ساقا سپورتشىلارى ءۇشىن ۇلگى بولاتىنداي قۇپتارلىق ءىس. سونداي-اق مول ولجاعا كەنەلگەندەر قاتارىندا چەحيالىق ماركەتا ۆوندروۋشوۆا (4,47 ملن), كارولينا مۋحوۆا (2,80 ملن), پەترا كۆيتوۆا (2,49 ملن), مىسىرلىق ونس جابەر (3,19 ملن) جانە گرەكيالىق ماريا ساككاري (2,55 ملن) سىندى تانىمال تەننيسشىلەر بار.
