بايراقتى باسەكە باستالماي تۇرىپ-اق قازاقستاننىڭ جانكۇيەرلەرى جايسىز حابار الدى. بىلتىر ۋيمبلدوندا توپ جارىپ, بيىل اۋستراليانىڭ اشىق بىرىنشىلىگىنىڭ فينالىندا ويناعان ەلىمىزدىڭ ءبىرىنشى جانە الەمنىڭ ءتورتىنشى راكەتكاسى ەلەنا رىباكينانىڭ اتالعان جارىسقا قاتىسپايتىنى بەلگىلى بولدى. رەسپۋبليكالىق تەننيس فەدەراتسياسى تاراتقان مالىمەتكە سەنسەك, وسىدان ءبىر اپتا بۇرىن عانا مەكسيكانىڭ كانكۋن قالاسىندا وتكەن WTA-نىڭ قورىتىندى تۋرنيرىنەن كەيىن ول ءوزىن جايسىز سەزىنگەن ەكەن. سول سەبەپتى بيللي دجين كينگ كۋبوگىندە باق سىناۋدان باس تارتتى. سودان اۋسترالياعا قارسى كەزدەسۋدىڭ قارساڭىندا رىباكينانى دەرەۋ اننا دانيلينامەن الماستىرۋعا تۋرا كەلدى. WTA تىزىمىندە 814-ورىندا تۇرعان ءداپ سول ويىنشى سەۆيلياداعى جارىستىڭ تۇساۋكەسەر سايىسىندا كورتقا شىقتى. ول ۇزدىكتەر رەيتينگىندە 172-ساتىعا جايعاسقان تاجىريبەلى ستورم حانتەرمەن شەبەرلىك بايقاستى. بۇل باسەكەدە جاسىل قۇرلىقتىڭ وكىلى 7:6, 6:4 ەسەبىمەن باسىم ءتۇستى.
كوپ كەشىكپەي يۋليا پۋتينتسەۆا مەن كيمبەرلي بيررەلدىڭ ويىنىن تاماشالادىق. بۇل كەزدەسۋدىڭ ءفاۆوريتى پۋتينتسەۆا ەدى. الەمدىك رەيتينگتە ول 69-ورىندى يەلەنۋدە. قارسىلاسى جەرلەسىمىزدەن 44 ساتى تومەن تۇر. سوندىقتان دا بۇل باسەكەدە پۋتينتسەۆانىڭ جەڭىسكە جەتەتىنىنە كوپشىلىكتىڭ كۇمانى بولعان جوق. ايتقانداي-اق, ءبىرىنشى سەتتى 6:0 ەسەبىمەن اياقتاعان يۋليا ەكىنشىسىندە دە ءوزىنىڭ مىقتىلىعىن مويىنداتتى – 7:5.
قوس ويىننىڭ ناتيجەسى بويىنشا تەڭ ەسەپ تىركەلگەننەن كەيىن باسەكەنىڭ تاعدىرى جۇپتىق سايىستا شەشىلدى. وكىنىشكە قاراي, بۇل جولى ءبىزدىڭ بۇرىمدىلار ءوز دەڭگەيىندە ونەر كورسەتە المادى. يۋليا پۋتينتسەۆا مەن اننا دانيلينا جۇبى ەللەن پەرەس پەن ستورم حانتەرگە 1:6, 6:4, 5:10 ەسەبىمەن ەسە جىبەردى. وسىلايشا, وتانداستارىمىز اۋستراليا قۇراماسىنا جول بەردى.
كەلەسى كۇنى سلوۆەنيامەن سايىسقا تۇستىك. العاشقى باسەكەدە اننا دانيلينا كايا يۋۆانعا ويسىراي ۇتىلدى – 1:6, 0:6. كەلەسى كەزدەسۋدە تامارا زيدانشەكتىڭ ەكىنشى سەتتەن كەيىن ويىندى جالعاستىرۋدان باس تارتىپ, جەڭىس يۋليا پۋتينتسەۆانىڭ ەنشىسىنە جازىلدى. ودان كەيىن اننا دانيلينا مەن جىبەك كۇلامباەۆا جۇبى ۆەرونيكي ەرياۆەتس پەن ەلا نالى ميليچتەن باسىم ءتۇستى – 2:6, 6:4, 10:7. قورىتىندى ەسەپ – 2:1.
دەسەك تە بۇل جەڭىس جەرلەستەرىمىزگە پلەي-وففقا شىعۋ ءۇشىن جەتكىلىكسىز بولدى. ويتكەنى بيللي دجين كينگ كۋبوگىنىڭ ەرەجەسىنە ساي ءار توپتان وزىق شىققان ءبىر عانا كوماندا جارتىلاي فينالدا ونەر كورسەتۋ قۇرمەتىنە يە بولادى. وكىنىشكە قاراي, قازاقستان قۇراماسى ەكىنشى ورىندا قالىپ قويدى. ال جالعىز جولداما سلوۆەنيا تەننيسشىلەرىنە بۇيىردى. ولاردان بولەك, يتاليا, اقش جانە كانادا قۇرامالارى پلەي-وففقا شىقتى.
