جارىستىڭ العاشقى ەكى كۇنىندە مارگاريتا باجاەۆا (50 كگ) مەن ەراسىل قويشىباەۆتىڭ (88 كگ) – كۇمىس, ال گۇلدانا المەنتاەۆا (54 كگ), ارنۇر قۋانتاي (71 كگ) جانە شىنار اباتوۆا قولا جۇلدەنى يەلەنگەنى جايىندا ءبىز بۇعان دەيىن دە جازعانبىز. الايدا قورجىنىمىزدا التىن مەدالدىڭ بولماۋى ءبىزدىڭ كوڭىلىمىزگە سەلكەۋ ءتۇسىردى. كەشە سول ولقىلىقتىڭ ورنى تولدى. +80 كگ سالماقتا كۇش سىناسقان ارايلىم ابەنوۆا فيليپپيندىك سيدنەي سي مەن رۋمىنيالىق بيانكا پرودانى ۇتىپ, فينالدا رەسەيدىڭ تۋى استىندا ونەر كورسەتىپ جۇرگەن جانارا قۇسانوۆامەن كەزدەستى. ورىنبور وبلىسىنىڭ تۋماسى كەزىندە قىزدار اراسىندا الەم چەمپيونى اتاندى. ايەلدەر سايىسىندا دا ول ءوزىن جاقسى قىرىنان كورسەتە ءبىلدى. قانداسىمىزدىڭ الەم چەمپيوناتىنىڭ قولا جانە ەۋروپا ويىندارىنىڭ كۇمىس جۇلدەگەرى, رەسەي چەمپيوناتى مەن كۋبوگىنىڭ ءۇش دۇركىن جەڭىمپازى دەگەن اتاقتارى بار. قوس قازاق قىزىنىڭ ايقاسى وتە شيەلەنىستى ءوتىپ, بۇل باسەكەدە جاناردىڭ باعى جاندى. وسىلايشا, ابەنوۆا جەڭىس تۇعىرىنىڭ ەڭ بيىك ساتىسىنا كوتەرىلدى.
98 كگ سالماق دارەجەسىندە كۇرەسكەن الىبەك زەكەنوۆ موڭعوليالىق گااجادامبا بانۇڭح پەن فيليپپيندىك سي شينوعا شاڭ قاپتىرعانىمەن, جارتىلاي فينالدا ارمەنيالىق داۆيد گريگورياننان ايلاسىن اسىرا المادى. ال قولا مەدال ءۇشىن تارتىستا ول تاجىكستاندىق باحتوۆار ءزاميروۆتى تىزە بۇكتىردى.
ءسويتىپ, 1 التىن, 2 كۇمىس جانە 4 قولا مەدالدى يەلەنگەن قازاقستاننىڭ سامبوشىلارى الەم چەمپيوناتىنىڭ جالپى كوماندالىق ەسەبىندە ءۇشىنشى ورىنعا تۇراقتادى. ءبىرىنشى ورىندا – رەسەي قۇراماسى. ولار 7 التىن, 1 كۇمىس جانە 3 قولانى ولجالادى. ەكىنشى ساتىعا وزبەكستاننىڭ بالۋاندارى جايعاستى. الا تاقيالى اعايىندارىمىز 2 التىن مەن قولا جۇلدەنى ەنشىلەدى.
