سەلەكتسيانى, ءتۋريزمدى, ارا شارۋاشىلىعىن دامىتۋ ماسەلەلەرى تالقىلاندى.
– ءبىزدىڭ وڭىرلەر ەكى ەلدىڭ وزىندىك بال استانالارى بولىپ تابىلادى. توزاڭدانۋ, انالىق بال باسىن دامىتۋ, جاڭا بال سۇرىپتارىن جاساۋ, سونداي-اق ولاردى وڭدەۋ ماسەلەلەرىندە ءبىز كوشباسشى بولۋىمىز كەرەك. ول ءۇشىن بارلىق مۇمكىندىكتەرىمىز بار, – دەدى اكىم ەرمەك كوشەرباەۆ. – ەگەر قاجەت بولسا, ءبىز ومارتاشىلارىمىزدىڭ بىرلەسكەن قاۋىمداستىعىن قۇراتىن بولامىز.
بۇل تۇرعىدا رەسەيدىڭ باشقۇرتستانداعى بال ارالارىن گەنەتيكالىق ساراپتاۋ بويىنشا جالعىز زەرتحاناسى قىزىعۋشىلىق تۋدىرادى. ايتپاقشى, 250 مىڭ ارا ۇياسى بار جانە جەتى مىڭ توننا تاۋارلى بال وندىرەتىن رەسپۋبليكادا ساپالى بال بەرەتىن ورتاورىستىق تۇقىم – قارا ورمان اراسىن وسىرۋگە باسىمدىق بەرىلگەن.
سونىمەن قاتار لوگيستيكانىڭ قازىرگى زامانعى باعىتتارىنىڭ وزەكتىلىگىن ەسكەرە وتىرىپ, ايماق باسشىسى باشقۇرتستاننىڭ سەرىكتەستەرىنە قىتايمەن شەكارالاس اۋداندارعا جاقىن شقو اۋماعىندا بوندتىق قويمالار قۇرۋدى ۇسىندى. شىعىس قازاقستان قحر-مەن ساۋدا جاساۋ كەزىندە باشقۇرتستاننىڭ بيزنەس-توپتارى ءۇشىن لوگيستيكالىق قىزمەتتەردىڭ بارلىق تۇرلەرىن كورسەتۋگە دايىن.
باشقۇرتستان رەسپۋبليكاسى پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى سوڭعى ەكى جىلداعى ەكونوميكالىق قيىندىقتارعا قاراماستان, باشقۇرتستان قارقىندى دامىپ كەلە جاتقانىن حابارلادى. اۋىل شارۋاشىلىعى ونىمدەرىن قايتا ءوندىرۋ داعدارىسىنىڭ پروبلەماسى كەيىنگى ۋاقىتتا جاڭا وتكىزۋ نارىقتارىن, اتاپ ايتقاندا قىتايعا اشۋ ارقىلى شەشىلۋدە. بۇل ورايدا شىعىس قازاقستان وبلىسى باشقۇرت تاۋارلارى ءۇشىن ترانزيتتىك حابقا اينالۋى مۇمكىن ەدى.
– ءبىز جاقىن ارادا ءتۋريزمدى دامىتۋ بويىنشا ەكى مىڭعا جۋىق جول بويىنداعى سەرۆيس نىسانىن سالۋدى جوسپارلاپ وتىرمىز. باشقۇرتستان قىمىزدىڭ ءجۇز ءتۇرلى ءتۇرىن وندىرەدى. بىزدە كوشپەلى مادەنيەت دامىعان, وسىنىڭ ءبارى ەلىمىزگە كەلەتىن تۋريستەرگە قىزىقتى, – دەپ اتاپ ءوتتى باشقۇرتستان دەلەگاتسياسىنىڭ باسشىسى.
تاراپتار شقو-دان ۋفاعا حالىقارالىق بيزنەس اپتالىعىنا, سونىڭ ىشىندە تۋريزم سالاسىندا تاجىريبە الماسۋ ءۇشىن ماماندار جىبەرۋگە كەلىستى.
سونداي-اق ەرمەك كوشەرباەۆ باشقۇرتستاندىق ارىپتەستەرىن قاراشا ايىنىڭ سوڭىندا وتەتىن بۇركىتشى فەستيۆالىنە قاتىسۋعا شاقىردى.
– ءبىز باسەكەلەسپەۋىمىز كەرەك, كەرىسىنشە, كووپەراتسيالانۋىمىز كەرەك. شىعىس قازاقستان ينۆەستورلار ءۇشىن بارلىق قاجەتتى جاعدايدى جاساۋعا دايىن. ءبىزدىڭ مىندەتىمىز – بيزنەسكە مۇمكىندىكتەردى كورسەتۋ. بۇدان ءارى كاسىپكەرلەر وزدەرى ارەكەت ەتە باستايدى, – دەپ قورىتىندىلادى شىعىس قازاقستان وبلىسىنىڭ اكىمى.
