بۇل جونىندە جاقىندا پرەزيدەنت قابىلداۋىندا بولعان «بايتەرەك» ۇلتتىق باسقارۋشى حولدينگى» اق باسقارما توراعاسى نۇرلان بايبازاروۆ مالىمدەدى. قازىرگى تاڭدا «قازاقستان رەسپۋبليكاسىنىڭ كەيبىر زاڭنامالىق اكتىلەرىندە ەكسپورت-كرەديت اگەنتتىگى ماسەلەلەرى بويىنشا وزگەرىس پەن تولىقتىرۋ ەنگىزۋ جانە شيكىزات ەمەس تاۋارلاردىڭ ەكسپورتىن دامىتۋ تۋرالى» زاڭ جوباسى تالقىعا ءتۇسىپ, ءماجىلىس قاراۋىنا ءوتتى.
كەز كەلگەن مەملەكەتتىڭ ەكونوميكاسىن العا سۇيرەيتىن نەگىزگى باسىمدىقتاردىڭ ءبىرى ەكسپورت قىزمەتى ەكەنى بەلگىلى. ونىڭ ىشىندە شيكىزات ەمەس تاۋارلاردىڭ سىرتقى اينالىمداعى ۇلەسىن ايرىقشا اتاپ وتكەن ءجون. شاعىن جانە ورتا بيزنەس ۇلتتىق ەكونوميكانىڭ ماڭىزدى درايۆەرى ەكەنىن ەسكەرسەك, ولاردىڭ ەكسپورتقا شىعىپ, ساۋدا كولەمىن ارتتىرۋى – وسى سالانىڭ جان-جاقتى دامۋ كورسەتكىشتەرىنىڭ ءبىرى. بۇگىندە تاۋارلارىن ەكسپورتقا شىعاراتىن كومپانيالار ءۇشىن ەڭ باستى كەدەرگى قارجى تاپشىلىعى بولىپ وتىر. وسى رەتتە ەكسپورت-كرەديت اگەنتتىگىنىڭ (ەكا) ماڭىزى مەن قاجەتتىگى ايقىن بايقالادى.
بۇگىندە ەكا قىزمەتىن «KazakhExport» ەكسپورتتىق ساقتاندىرۋ كومپانياسى» اق اتقارادى. ۇلتتىق كومپانيا شيكىزات ەمەس سەگمەنتتىڭ وتاندىق ەكسپورتتاۋشىلارىنا قولداۋ بىلدىرەدى جانە ولاردىڭ شەتەلدىك نارىقتا قولايلى ءارى قاۋىپسىز جاعدايدا ساۋدالاسۋىن قامتاماسىز ەتۋمەن اينالىسادى. الايدا «KazakhExport» ەلدەگى بىردەن-ءبىر مامانداندىرىلعان ساقتاندىرۋ كومپانياسى بولعانىمەن, ەكا مىندەتىن اتقارۋ ءۇشىن زاڭ شەڭبەرىندە ءتيىستى مارتەبەسى جوق. بۇل كومپانيانىڭ اياق-قولىن تۇساپ وتىر.
«KazakhExport» ەسك» اق باسقارما توراعاسى اسلان قاليعازيننىڭ ايتۋىنشا, وتاندىق بيزنەس, ونىڭ ىشىندە ەكسپورتتاۋشىلار قىزمەتىنە قاتىستى زاڭ نورمالارىنا ناقتى وزگەرىستەر قاجەت.
«اگەنتتىك شيكىزات ەمەس ەكسپورتتى دامىتۋ جانە ونىڭ كولەمىن ارتتىرۋ بويىنشا جۇمىس ىستەيتىن بولادى. قىسقاشا ايتقاندا, دامۋ ينستيتۋتىنىڭ فۋنكتسيالارىن موينىنا الادى. بۇل ماقساتتا ەكا مارتەبەسى ءبىزدىڭ كومپانياعا ساقتاندىرۋ, قايتا ساقتاندىرۋ, كەپىل بولۋ, ەكسپورت ساۋداسىن قارجىلاندىرۋ, ەكسپورتتاۋشىلار شىعىندارىنىڭ ءبىر بولىگىن وتەۋ, سونىمەن قاتار سەرۆيس بويىنشا باستان-اياق قولداۋ كورسەتۋ مۇمكىندىگىن ۇسىنادى», دەيدى كومپانيا باسشىسى.
ەكسپورت-كرەديت اگەنتتىگى قىزمەتى اياسىندا شەتەل نارىعى تەرەڭىرەك تالدانادى, سونداي-اق ولاردىڭ قانداي تاۋارعا مۇقتاج ەكەنى جۇيەلى ساراپتالادى. مۇنىڭ ناتيجەسىندە ەكسپورت بيزنەسىندەگى تولەم مۇمكىندىگى جوعارى ەلدەرمەن تۇراقتى بايلانىس ورناتىلادى.
ەكا شيكىزات ەمەس ءونىمدى ەكسپورتتاۋشىلار, وتاندىق تاۋارلاردى وندىرۋشىلەر, شاعىن, ورتا جانە ءىرى بيزنەس وكىلدەرىمەن جۇمىس ىستەيتىن بولادى. ايتا كەتۋ كەرەك, اگەنتتىك قىزمەتى ەرىكتى نەگىزدە كورسەتىلەدى, ياعني ەكسپورتتاۋشىلار ءۇشىن ەكا قۇرالدارىن پايدالانۋ قازىرگىدەي مىندەتتەلمەيدى. اگەنتتىك تەك ەكسپورتتاۋشىلاردى قولداۋ ءۇشىن ناقتى ۇسىنىستار بىلدىرەتىن بولادى. بۇل بيزنەس پەن اگەنتتىك اراسىنداعى قارىم-قاتىناستى مەيلىنشە ءتيىمدى ەتەدى.
«قارجى-ساقتاندىرۋ قۇرالدارىن قولدانۋ ساتۋشى مەن ساتىپ الۋشىنىڭ ەكسپورتتىق-يمپورتتىق ساۋداسىن ەداۋىر ارتتىرادى. ەكا كومەگىمەن قوس تاراپ سىرتقى كەپىلدىككە يە بولادى. بۇل دەگەنىمىز قاراجات اۋدارىلىمىنىڭ ۋاقتىلى جۇزەگە اساتىنىن بىلدىرەدى. ونىڭ ناتيجەسىندە بولۋى مۇمكىن پروبلەمالاردىڭ جولى كەسىلەدى», دەيدى ا. قاليعازين.
سونىمەن قاتار ۇلتتىق كومپانيا باسشىسى ترانسفورماتسياعا قاتىستى جوسپارلارىمەن دە ءبولىستى: «وتاندىق بانكتەردىڭ شەتەلدىك ارىپتەستەر ءۇشىن ۇسىناتىن قارجىلاندىرۋ بويىنشا سىياقى مولشەرلەمەلەرىن سۋبسيديالاۋ باعدارلاماسىن ىسكە قوسۋ ويدا بار. باعدارلاما وتاندىق جوعارى تەحنولوگيالىق تاۋارلار مەن قىزمەتتەردى ساتىپ الۋ بويىنشا عانا جۇمىس ىستەيدى. ءدال وسى قادام ەكسپورتتاۋشىلارىمىزدىڭ سىرتقى نارىقتا باسەكەگە قابىلەتتى بولۋىن, كليەنت بازاسىنىڭ ارتۋىن, سونداي-اق ءوز ونىمدەرىمىزدىڭ ساپاسى مەن كولەمىن ارتتىرۋدى كوزدەيدى», دەدى.
قازىرگى ۋاقىتتا «KazakhExport» ەسك» اق پورتفەلىندە ەكسپورتتاۋشىلارعا قولداۋ كورسەتەتىن 18 جوبا بار. جاڭا اگەنتتىكتىڭ قۇرىلۋىمەن ەندى تىڭ مۇمكىندىكتەرگە جول اشىلماق.
