بيىل جارتىجىلدىق قورىتىندىسى بويىنشا ەلىمىزدە 53,8 مىڭ جۇپ نەكە قيدى, بۇل بىلتىرعىدان 2,2% از. قالالاردا قيىلعان نەكە سانى ءبىر جىلدا 35,5 مىڭعا دەيىن 16,7% تومەندەسە, اۋىلداردا بىردەن 47,4%, 18,4 مىڭعا دەيىن ءوستى, دەپ جازدى ranking.kz سايتى.
التى ايدا اجىراسۋ سانى 8,2 مىڭدى قۇرادى – بىلتىرعىدان 9% از. قالالاردا اجىراسۋ ءبىر جىلدا 14,8%, 6 مىڭعا دەيىن ازايىپ, اۋىلداردا 12,6%, 2,1 مىڭعا دەيىن ءوستى.
وڭىرلەر بويىنشا ەڭ كوپ نەكە قيۋ الماتىدا: 5,7 مىڭ – بىلتىرعىدان 19,7% از.
نەكە كوپ قياتىندار ۇشتىگىنە تۇركىستان وبلىسى (5,5 مىڭ نەكە, ءبىر جىلدا 8,3% ازايعان) جانە استانا (4,7 مىڭ نەكە, 6,2% ازايعان) كىردى. ەڭ از نەكە ۇلىتاۋ وبلىسىندا تىركەلگەن: 663.
تىركەلگەن اجىراسۋلار سانى بويىنشا دا الماتى كوش باستاپ تۇر: 1,1 مىڭ – ءبىر جىل بۇرىنعىدان 10,4% ازايعان. ودان كەيىن استانا (734) مەن قاراعاندى وبلىسى (723). ەڭ از اجىراسۋ ۇلىتاۋ وبلىسىندا: 102.
ەلدەگى نەكەگە تۇرۋ كورسەتكىشى 1000 ادامعا شاققاندا 5,77-دەن 5,46-عا دەيىن تومەندەدى. نەكەنىڭ ەڭ جوعارى كورسەتكىشى ەلوردادا تىركەلدى: 1000 ادامعا شاققاندا 6,9. ۇزدىك ۇشتىككە ماڭعىستاۋ مەن الماتى وبلىستارى دا كىردى.
احات مالىمەتىنشە, اجىراسۋ تۋرالى سوت شەشىمدەرىن ەسەپكە الماعاندا, ءبىر جىل بۇرىنعى 0,94 كورسەتكىشپەن سالىستىرعاندا 1000 ادامعا شاققاندا 0,83. وڭىرلەر بويىنشا اجىراسۋدىڭ ەڭ جوعارى كورسەتكىشى شىعىس قازاقستان, قاراعاندى جانە پاۆلودار وبلىستارىندا, ەڭ تومەنى تۇركىستان وبلىسىندا.
Wisevoter مالىمەتىنشە, قازاقستان اجىراسۋ سانى بويىنشا الەمدە 114 ەلدىڭ ىشىندە 16-ورىندا. 2022 جىلى قر-دا, پورتالدىڭ مالىمەتىنشە, اجىراسۋ كورسەتكىشى 1000 ادامعا 2,5.
تمد ەلدەرى اراسىندا رەسەي (3-ورىن, 1000 ادامعا شاققاندا 3,9), مولدوۆا (4-ورىن, 1000 ادامعا شاققاندا 3,8), بەلارۋس (5-ورىن, 1000 ادامعا شاققاندا 3,7) جانە ۋكراينا* (9 ورىن, 1000 ادامعا شاققاندا 2,9) قازاقستانعا قاراعاندا رەيتينگتە جوعارى.
وقي وتىرىڭىز: قازاقستاندا 20 جىلدا العاش رەت جاڭا تۋعان نارەستە سانى 9,5% ازايدى
قىرعىزستاندا (1000 ادامعا شاققاندا 1,8), ءازىربايجاندا (1000 ادامعا شاققاندا 1,7), ارمەنيادا (1000 ادامعا شاققاندا 1,1) جانە وزبەكستاندا (1000 ادامعا شاققاندا 1,1) اجىراسۋ سيرەك.
ەڭ كوپ اجىراسۋ مالديۆ ارالدارى, گۋام جانە رەسەيدە, ەڭ ازى ۆەتنام, شري-لانكا جانە پەرۋدە.
