اكىمنىڭ ايتۋىنشا, اۋقىمدى جوبانى ىسكە اسىرۋ ەلدى مەكەندەردى دە, وعان قوسا كوپ وتىن كولەمىن قاجەت ەتەتىن ءىرى ينۆەستيتسيالىق جوبالاردى دا گازداندىرۋعا مۇمكىندىك بەرەدى. ايتا كەتۋ كەرەك, قوستاناي وبلىسىندا اۋىلدىق ەلدى مەكەندەردىڭ تەك 28%-ى ورتالىق گازبەن قامتاماسىز ەتىلگەن. سوندىقتان بۇل جوبانىڭ ءوڭىر تۇرعىندارى ءۇشىن ماڭىزى زور.
مەملەكەت باسشىسى قاسىم-جومارت توقاەۆ بيىلعى قاڭتار ايىندا قوستاناي وبلىسىنا جۇمىس ساپارى كەزىندە اقتوبە وبلىسىنان قوستانايعا دەيىن ماگيسترالدىق گاز قۇبىرىن سالۋ جونىندە تاپسىرما بەرگەن ەدى. ەنەرگەتيكا مينيسترلىگى «QazagGaz» ۇك» اق-مەن بىرلەسىپ, بىردەن تەحنيكالىق-ەكونوميكالىق نەگىزدەمە ازىرلەۋگە كىرىستى. قازىرگى ۋاقىتتا جۇمىس تولىق قارقىنمەن ءجۇرىپ جاتىر.
«بولات ونەركاسىبىنە ارنالعان شيكىزات – ىستىق كريكەتتى تەمىر ءوندىرۋ جوباسىن ىسكە اسىرۋ ءۇشىن گازدىڭ ۇلكەن كولەمى قاجەت بولادى. سونىمەن قاتار قاجەتتى شيكىزات بازاسى مەن بىلىكتى كادرلار بار, ەندىگى كەزەكتە حالىقارالىق ساپا جانە ەكولوگيا ستاندارتتارىنا سايكەس كەلەتىن تۇپكىلىكتى ءونىم شىعارۋ, تەرەڭ وڭدەۋ ءوندىرىسىن جولعا قويۋ قاجەت», دەدى رومان سكليار.
پرەمەر-ءمينيستردىڭ ورىنباسارى اكىمدىك الداعى ۋاقىتتا دا ءوڭىردى گازدىڭ قوسىمشا كولەمىمەن قامتاماسىز ەتۋ ماسەلەسىن ەسكەرە وتىرىپ, ينۆەستيتسيالىق جوبالاردى ىسكە اسىرۋدى ۇيلەستىرۋ بويىنشا ينۆەستورلارمەن جۇمىس جۇرگىزۋى ءتيىس ەكەنىن ايتتى.
وبلىس اكىمدىگى بۇل جوبانى ىسكە اسىرۋ ءوڭىر ءۇشىن قۋاتتى سەرپىلىس ەكەندىگىن اتاپ ءوتتى. بۇل جوبا رەسپۋبليكانىڭ قولدانىستاعى گاز تاسىمالداۋ جەلىسىمەن بايلانىستىرۋعا مۇمكىندىك بەرەدى جانە ءوڭىردىڭ تابيعي گاز بويىنشا قاجەتتىلىگىن, ونىڭ ىشىندە باسەكەگە قابىلەتتى ءوندىرىستى دامىتۋ ءۇشىن ارتىپ كەلە جاتقان قاجەتتىلىكتەرىن قامتاماسىز ەتەدى.
