– مەملەكەت كەپىلدىك بەرگەن زاڭ كومەگى – ونى الۋعا قۇقىعى بار جەكە جانە زاڭدى تۇلعالارعا كورسەتىلەتىن زاڭ كومەگى. قازاقستاننىڭ ءاربىر ازاماتى ازاماتتىق, اكىمشىلىك جانە قىلمىستىق ۇدەرىستەر شەڭبەرىندە بىلىكتى زاڭ كومەگىن الۋعا اجىراماس قۇقىققا يە. مەملەكەت ازاماتتارعا ادىلدىك پەن زاڭ الدىنداعى تەڭدىك قاعيداتتارى نەگىزىندە بۇل قولداۋعا كەپىلدىك بەرەدى, – دەپ اتاپ ءوتتى الماتى قالاسى ادىلەت دەپارتامەنتى باسشىسىنىڭ ورىنباسارى قايرات بازارباەۆ.
زاڭ كەڭەسى اياسىندا اليمەنت ءوندىرىپ الۋ, زەينەتاقى مەن جاردەماقى تاعايىنداۋ, وڭالتۋ, بوسقىن نەمەسە قانداس مارتەبەسىن الۋ ماسەلەلەرى بويىنشا جەكە تۇلعالاردىڭ, اتا-اناسىنىڭ قامقورلىعىنسىز قالعان كامەلەتكە تولماعانداردىڭ وتىنىشتەرى قابىلدانادى. سونىمەن بىرگە جىنىستىق زورلىق-زومبىلىق, ادام ساۋداسى, تەرروريزم اكتىسى قۇرباندارى نە وسى مارتەبەگە نەمەسە جاعدايعا بايلانىستى ولاردىڭ قۇقىقتارى مەن زاڭدى مۇددەلەرىن قامتاماسىز ەتۋ جانە قورعاۋ ماسەلەلەرى بويىنشا ازاپتاۋعا ۇشىراعاندارعا دا زاڭگەرلەر تەگىن كەڭەس بەرەدى. جەكە تۇلعالارعا اسىراۋشىسىنىڭ قايتىس بولۋىنان كەلتىرىلگەن زياندى وتەۋ ماسەلەلەرى, جۇمىس بارىسىندا دەنساۋلىعىنا زيان كەلىپ جاتسا جانە قىلمىستىق قۇقىق بۇزۋشىلىقتان كەلتىرىلگەن زياندى وتەۋ ماسەلەلەرى دە تەگىن زاڭ كەڭەسى اياسىندا قاراستىرىلادى. ەكىنشى دۇنيەجۇزىلىك سوعىستىڭ قاتىسۋشىلارىنا, جەڭىلدىكتەرى بويىنشا وسى سوعىسقا قاتىسۋشىلارىنا تەڭەستىرىلگەن ادامدارعا, سونداي-اق باسقا مەملەكەتتەر اۋماعىنداعى جاۋىنگەرلىك ءىس-قيمىلدارعا قاتىسقان ارداگەرلەرگە, مەرزىمدى قىزمەتتەگى اسكەري قىزمەتشىلەرگە, ءبىرىنشى جانە ەكىنشى توپتاعى مۇگەدەكتىگى بار ادامدارعا, زەينەتكەرلەرگە كاسىپكەرلىك قىزمەتپەن بايلانىستى ەمەس ماسەلەلەر بويىنشا كوپبالالى وتباسىلاردى تولعاندىرعان ماسەلەلەرگە وراي قۇقىقتىق قولداۋ كورسەتىلەدى. سونداي-اق كاسىپكەرلىك قىزمەتپەن بايلانىستى ەمەس ماسەلەلەر بويىنشا وبلىستاردا, رەسپۋبليكالىق ماڭىزى بار قالالاردا, استانادا بەلگىلەنگەن كەدەيلىك شەگىنەن ءبىر ايدا جان باسىنا شاققانداعى ورتاشا تابىسى بار از قامتىلعان وتباسىلار دا وسى تەگىن زاڭ كەڭەسىنە جۇگىنە الادى.
سوتتاردا, قىلمىستىق قۋدالاۋ ورگاندارىندا, وزگە دە مەملەكەتتىك ورگاندار مەن مەملەكەتتىك ەمەس ۇيىمداردا جەكە تۇلعالاردىڭ مۇددەلەرىن قورعاۋ جانە اكىمشىلىك جاۋاپتىلىققا تارتىلعان ازاماتتارعا, تالاپكەرلەر مەن جاۋاپكەرلەرگە, قىلمىستىق-پروتسەستىك زاڭناماعا سايكەس كۇدىكتىلەرگە, ايىپتالۋشىلارعا, سوتتالۋشىلارعا, سوتتالعاندارعا جانە جابىرلەنۋشىلەرگە دە كەڭەس بەرىلەدى.
– جوعارىدا اتالعان بارلىق ازامات تۇرعىلىقتى مەكەنى مەن ورنالاسقان جەرىنە قاراماستان مەملەكەت كەپىلدىك بەرگەن زاڭ كومەگىن الۋعا قۇقىلى. مەملەكەت كەپىلدىك بەرگەن زاڭ كومەگىنە مۇقتاج ادامنىڭ مۇددەسى ءۇشىن مۇنداي كومەك كورسەتۋ تۋرالى وتىنىشپەن زاڭدى وكىلى بەلگىلەنگەن تارتىپپەن جۇگىنە الادى, – دەپ ءتۇسىندىردى سپيكەر.
بۇل قىزمەت تۇرلەرىن الۋ ءۇشىن الماتى قالاسىنىڭ ادىلەت دەپارتامەنتىنە جۇگىنۋگە بولادى. زاڭ كەڭەسشىلەرى قىزمەتتى «pro bono» تۇرىندە كورسەتەدى. قازىرگى ۋاقىتتا الماتىدا مەملەكەت كەپىلدىك بەرگەن زاڭ كومەگىن الۋ بويىنشا 15 زاڭ كەڭەسى جۇمىس ىستەيدى. زاڭ كەڭەستەرىنىڭ مەكەن-جايلارىمەن ادىلەت دەپارتامەنتىنىڭ رەسمي سايتىندا تانىسۋعا نەمەسە 119 نەمەسە 14 – قۇقىقتىق اقپاراتتىق قىزمەت نومىرىنە حابارلاسىپ, انىقتاۋعا بولادى.
الماتى
