دەرەكتەرگە جۇگىنسەك, اۋدان ورتالىعى سارىكەمەر اۋىلىنداعى مەكتەپ-گيمنازيا وقۋشىلارىنىڭ بويىنداعى السىزدىك پەن لوقسۋ بەلگىلەرى جەتىنشى قاراشا كۇنى انىقتالعان. العاشقى شاعىم دا ءدال سول كۇنى ءتۇس اۋعاندا تىركەلگەن. جالپى سانى 46 ادام ءتۇن مەزگىلىنە دەيىن ءوتىنىش ءبىلدىرىپ ۇلگەرگەن.
جۇرتتى داۋرىقتىرعان ماسەلەگە قاتىستى وبلىس اكىمدىگى رەسمي حابارلاما تاراتتى. سونداي-اق ءوڭىر باسشىسى ەربول قاراشوكەەۆ نىعمەتۋللا كيىكباەۆ اتىنداعى مەكتەپ-گيمنازياداعى شۋدان كەيىن اۋداندىق ورتالىق اۋرۋحاناعا ارنايى بارىپ, ءبىلىم الۋشىلار مەن ۇستازداردىڭ جاعدايىمەن تانىستى.
قازىرگى كەزدە ءوڭىر باسشىسى ەربول قاراشوكەەۆتىڭ تاپسىرماسى نەگىزىندە ارنايى كوميسسيا قۇرىلىپ, جاعدايدى تولىقتاي باقىلاۋعا الىپ وتىر. ءبىلىم الۋشىلار مەن ەرەسەكتەر شىنىندا دا اسحاناداعى استان ۋلانعان با, الدە باسقا سەبەپ بار ما؟ بۇل ماسەلە الداعى ۋاقىتتا تولىقتاي زەردەلەنبەك.
«بايزاق اۋدانىنىڭ ورتالىق اۋرۋحاناسىنا جاتقىزىلعان 35 ادامنىڭ جاعدايى ورتاشا تۇراقتى. ناۋقاستارعا بارلىق قاجەتتى مەديتسينالىق كومەك كورسەتىلىپ جاتىر. بۇل ماسەلە بويىنشا جامبىل وبلىسىنىڭ اكىمى ەربول قاراشوكەەۆتىڭ تاپسىرماسىمەن ارنايى كوميسسيا قۇرىلدى.
سارىكەمەر اۋىلىنداعى ن. كيىكباەۆ اتىنداعى مەكتەپ-گيمنازيا وقۋشىسىنىڭ السىزدىك, قۇسۋ بويىنشا شاعىمدانعان العاشقى ءوتىنىشى 7 قاراشا كۇنى تۇستەن كەيىن تىركەلدى. جامبىل وبلىسى اكىمىنىڭ تاپسىرماسىنا سايكەس رەسپۋبليكالىق مامانداردان, انەستەزيولوگتەردەن, پەدياترلاردان, توكسيكولوگتەردەن, ينفەكتسيونيستەردەن تۇراتىن كوميسسيا قۇرىلدى.
ساعات 23.00-گە دەيىن ءوتىنىش بىلدىرگەندەردىڭ جالپى سانى 46 ادامدى قۇرادى (2 مۇعالىم, 44 بالا). 46 ادامنىڭ 33-ءى اۋرۋحاناعا جاتقىزىلدى, جاعدايلارى ورتاشا تۇراقتى. اۋرۋحاناعا جاتقىزىلعاندارعا دەتوكسيكاتسيا تەراپياسى جۇرگىزىلدى. انتيبيوتيكالىق ەمدەۋدى قاجەت ەتپەيتىن 11 ادام مەديتسينالىق كەڭەس العاننان كەيىن امبۋلاتورلىق ەمدەۋ جانە ۇيدەن باقىلاۋ ءۇشىن قايتارىلدى.
جالپى پراكتيكا دارىگەرلەرىنەن, پەدياتردان, ۋچاسكەلىك مەدبيكەدەن تۇراتىن 16 ءموبيلدى توپ 205 اۋلانى ارالاپ, وسى كۇنى وقۋ وشاعىنىڭ اسحاناسىنا كەلگەن وقۋشىلاردى تەكسەرۋدەن وتكىزدى. تەكسەرۋ قورىتىندىسىندا ولاردىڭ جاعدايى قاناعاتتانارلىق, شاعىمدار مەن اۋرۋ بەلگىلەرى جوق.
ن.كيىكباەۆ اتىنداعى مەكتەپ-گيمنازيانى تاماقپەن قامتۋعا جاۋاپتى «توقسەيىتوۆ» جەكە كاسىپكەرلىگىنىڭ جۇمىسى ءمان-جايلار ناقتىلانعانعا دەيىن توقتاتىلدى. مەكتەپ وقشاۋلانعان, باكتەريولوگيالىق زەرتتەۋ شارالارى جۇرگىزىلىپ جاتىر», دەلىنگەن وبلىس اكىمدىگى تاراتقان رەسمي حابارلامادا.
اۋداندىق ورتالىق اۋرۋحاناسىنىڭ باس دارىگەرى جاندوس رىسقۇلوۆتىڭ ايتۋىنشا, بويىن السىزدىك بيلەگەن ازاماتتار اۋەلدە ءبىر-بىردەن كەلگەن. كەيىننەن اۋرۋحاناعا قايىرىلۋشىلاردىڭ قاتارى كۇرت كوبەيگەن. قازىرگى كەزدە شاعىمدانعانداردىڭ جاعدايى تۇراقتى. جۇرەك اينۋ, لوقسۋ, دەنە قىزۋىنىڭ كوتەرىلۋى سەكىلدى بەلگىلەر جوق. سونداي-اق تۇنگى ۇشكە دەيىن جۇزدەگەن بالا قارالىپتى. ولاردىڭ دا جاعدايى تۇراقتى. الاڭداۋعا نەگىز جوق.
ن.كيىكباەۆ اتىنداعى مەكتەپ-گيمنازيانىڭ ءبىلىم الۋشىلارى وقۋ ۇدەرىسىنە بۇرىنعىداي قاتىسىپ جاتىر. دەرەكتەرگە جۇگىنسەك, ءبىلىم ورداسىن اسپەن قامتاماسىز ەتۋ قىزمەتىمەن اينالىسقان «توقسەيىتوۆ» اتاۋىمەن تىركەلگەن جەكە كاسىپكەر اۋدان بويىنشا 13 مەكەمەگە ازىق-ت ۇلىك تاسىمالدايتىن كورىنەدى.
سوڭعى دەرەكتەرگە سەنسەك, استان ۇشىنعان ازاماتتاردىڭ سانى الپىسقا دەيىن جەتىپتى. قازىرگى كەزدە پروكۋراتۋرا, سەس قىزمەتكەرلەرى جانە ارنايى كوميسسيا وكىلدەرىنىڭ قاتىسۋىمەن وقيعاعا قاتىستى تەرگەپ-تەكسەرۋ جۇمىستارى باستالدى. ناقتىراق ايتساق, «سانيتارلىق ەرەجەلەردى نەمەسە گيگيەنالىق نورماتيۆتەردى بۇزۋ» بويىنشا سوتقا دەيىنگى تەكسەرۋ جۇمىستارى باستالدى.
مەكتەپ وقۋشىلارى مەن ۇستازدار اسحاناداعى استان ۇشىنعان با؟ الدە باسقا دا ءبىر سەبەپتەر بار ما؟ قاتەلىك كىمنەن كەتتى؟ بۇل سۇراقتارعا الداعى ۋاقىتتا تولىققاندى جاۋاپ بەرىلمەك. ءبىر بەلگىلىسى, ناۋقاستار مەكتەپ اسحاناسىنان كۇرىش جەپ, كومپوت سۋسىنىن ىشكەن.
جامبىل وبلىسى,
بايزاق اۋدانى
