وسى ورايدا دەنساۋلىق ساقتاۋ ءمينيسترى اجار عينيات بارشا اتا-انانىڭ قاپەرىنە بالالارىن قىزىلشاعا قارسى ۋاقتىلى ۆاكتسينالاۋدىڭ ماڭىزدى ەكەنىن ايتىپ, ۇندەۋ تاستادى.
«بۇگىن نەمەرەم ەكەۋمىز الەم ەلدەرىندەگىدەي ءبىزدىڭ ەلىمىزدەگى قولايسىز ەپيدەميالىق جاعدايدى ەسكەرە وتىرىپ, قىزىلشاعا قارسى ەكپە الۋ ءۇشىن قالالىق ەمحاناعا كەلدىك. ەلىمىزدە وسى احۋالدىڭ ناشارلاۋى قىركۇيەك ايىنان باستاپ بايقالدى, بالالار ۇزاق ۋاقىت جابىق ءۇي-جايلاردا وتكىزەتىن مەكتەپكە باردى», دەدى مينيستر استانا قالاسىنىڭ №9 ەمحاناسىندا.
مينيستر بۇل ينفەكتسيانىڭ جۇقپالى ەكەنىن, اسىرەسە جوتەلگەندە, تۇشكىرگەندە اۋا ارقىلى تەز تارالاتىنىن اتاپ ءوتتى.
«سوندىقتان ءبىز كەيىنگى ەكى ايدا بۇل اۋرۋدىڭ كۇرت وسكەنىن كورىپ وتىرمىز. 13 مىڭنان اسا ادام اۋىرىپ قالدى, ونىڭ 83%-ىن نەگىزىنەن 5 جاسقا دەيىنگى بالالار قۇرايدى, ەكپە الماعان ەرەسەكتەر دە بار. بۇگىندە قىزىلشامەن سىرقاتتانعان ناۋقاستاردىڭ 70 پايىزى – ۆاكتسينا سالدىرماعان بالالار. ولاردىڭ كوپشىلىگى, ياعني 60 پايىزى ۆاكتسينالاۋدان باس تارتقان», دەدى ا.عينيات .
ءمينيستردىڭ ايتۋىنشا, سونداي-اق سىرقاتتاردىڭ 18%-ى مەديتسينالىق قارسى كورسەتىلىمدەرگە بايلانىستى جانە 22%-ى ەگۋ جاسىنا جەتپەگەندىكتەن ەكپە الماعان كورىنەدى. بۇگىنگى تاڭدا بارلىعى 2 013 بالا, ونىڭ ىشىندە 30 بالا اۋىر جاعدايدا ەمدەۋگە جاتقىزىلىپتى.
كوللاجدى جاساعان – زاۋرەش سماعۇل ,«EQ»
ونىڭ ايتۋىنشا, قىزىلشامەن سىرقاتتانۋ كۇرت وسكەندىكتەن, قوسىمشا يممۋنداۋ جۇرگىزۋ تۋرالى شەشىم قابىلداندى. بۇل ناۋقان قاڭتار ايىنىڭ سوڭىنا دەيىن سوزىلادى, ال دەرتكە قارسى ۆاكتسينا تولىقتاي جەتكىلىكتى.
«قىزىلشاعا قارسى پروفيلاكتيكالىق ەكپەسى جوق بالالارعا ۆاكتسينا سالامىز. ينفەكتسيا وشاقتارىندا ەكپە الماعاندارمەن بايلانىستا بولعانداردى دا ۆاكتسينالايمىز. بارشاڭىزدى اۋرۋدان ساقتانۋ ءۇشىن ەمحاناعا شاقىرامىز», دەدى مينيستر.
وسى ورايدا ۆەدومستۆو باسشىسى ينفەكتسيالىق اۋرۋدىڭ سالدارى تۋرالى ەسكەرتتى.
«قىزىلشا پنەۆمونيا, ءتۇرلى قابىنۋ, وتيت سەكىلدى سوقىرلىققا دەيىن قاۋىپتى اسقىنۋلارعا اكەلۋى مۇمكىن. بۇگىنگى تاڭدا قىزىلشانى ەمدەۋدىڭ وزىنە ءتان ەمى جوق, سوندىقتان مۇنداي قاۋىپتى ينفەكتسيادان ساقتانۋدىڭ جالعىز جولى – تەك ۆاكتسينالاۋ. ۆاكتسينانىڭ وزىنەن قورىقپاۋ كەرەك, بۇل ابدەن تەكسەرىلگەن, ءبىز ونى جىل سايىن ۇلتتىق ەگۋ كۇنتىزبەسىنە سايكەس قولدانامىز», دەدى ا.عينيات.
ۆاكتسينالاۋ ەرەجەلەرىنە سايكەس يممۋنداۋ پەدياتر بالانى تەكسەرگەننەن كەيىن عانا جۇرگىزىلەدى. وعان انامنەز جيناۋ, تەمپەراتۋرانى ولشەۋ, ەگىلەتىن ادامنىڭ جاعدايىن باعالاۋ كىرەدى. سودان كەيىن ەگۋگە اقپاراتتاندىرىلعان كەلىسىمگە قول قويىلادى. ءارى قاراي يممۋنداۋدان كەيىن 30 مينۋتتىڭ ىشىندە ۆاكتسينا العان نارەستە دارىگەرلەردىڭ باقىلاۋىندا بولادى.
قىزىلشاعا قارسى پروفيلاكتيكالىق ەگۋ كۇنتىزبەسىنە سايكەس ەلىمىزدە جوسپارلى تۇردە ەكى رەت ۆاكتسينالاۋ جۇرگىزىلەتىن ەسكە سالا كەتەيىك. اتاپ ايتقاندا, بالا العاشقى ەكپەنى 12-15 ايلىعىندا, ەكىنشىسىن 6 جاستا الادى.
بيىل ۆاكتسينالاۋ حالىقتىڭ مىناداي توپتارىنا: 6 ايدان باستاپ 10 اي 29 كۇن بولعان بالالارعا, 2 جاستان باستاپ 4 جاس 11 اي 29 كۇن بولعان بالالارعا, سونداي-اق بۇرىن ەكپە الماعان مەديتسينا قىزمەتكەرلەرىنە (55 جاسقا دەيىن), پروفيلاكتيكالىق ەكپە الماعان 18 جاسقا دەيىنگى ادامدارعا جۇرگىزىلەدى.
جالپى, 2023 جىلدىڭ باسىنان باستاپ رەسپۋبليكا بويىنشا قىزىلشانىڭ 12 671 جاعدايى تىركەلدى. ونىڭ ىشىندە 10 563 ناۋقاس – 14 جاسقا دەيىنگى بالالار, 354-ءى – جاسوسپىرىمدەر, 1 754-ءى – ەرەسەكتەر.
حالىق اراسىندا قىزىلشانىڭ تارالۋىنىڭ الدىن الۋ جانە ەلدەگى ەپيدەميالىق جاعدايدى تۇراقتاندىرۋ ماقساتىندا «قىزىلشاعا قارسى سانيتارلىق-پروفيلاكتيكالىق ءىس-شارالار جۇرگىزۋ تۋرالى» باس مەملەكەتتىك سانيتاريالىق دارىگەردىڭ 2023 جىلعى 1 قاراشاداعى №7 قاۋلىسى شىعارىلدى. كورسەتىلگەن قاۋلىعا سايكەس بيىل 6 قاراشادان باستاپ قىزىلشاعا, قىزامىققا جانە پاروتيتكە (قكپ) قارسى 6-11 ايلىق بالالارعا, جەلتوقساننان باستاپ قىزىلشانىڭ ەگۋ مارتەبەسىنە قاراماستان 2-4 جاستاعى بالالارعا قوسىمشا جاپپاي يممۋنداۋدى جۇرگىزۋ باستالدى.
