فوتو: اشىق دەرەككوز
«مەكتەبىمىزدىڭ تازالىعىنا جاۋاپ بەرەتىن اپايدى قۋانتۋدى ءوزىم كوپتەن بەرى ويلاپ جۇرگەن ەدىم. ويتكەنى مەنىڭ سىنىبىمداعى وقۋشىلار مەكتەپ تابالدىرىعىن جاڭا اتتاعان جەتكىنشەكتەر بولعاندىقتان سۋ توگىلەدى, قولىنداعى زاتىن شاشىپ الادى دەگەندەي. سوندا وسى كەنجە اپايىمىزدى شاقىرساق, ەش قاباق شىتقان ەمەس. باسقا دا تازالىققا جاۋاپتى كىسىلەر بار, اسىرەسە ءوزىمىزدىڭ زامانداستارىمىز, ءبىر-ەكى رەت شاقىرتۋدان كەيىن قاباعى قاتۋلانىپ, وقۋشىلارعا ۇرسۋعا دايىن تۇرادى. بۇل اپايدىڭ ونداي مىنەزىن كورگەن ەمەسپىز. سوندىقتان دا جاقسى ادامدى قۋانتساق دەپ ويلادىم. ءبىر كۇنى اڭگىمە اراسىندا ءوزى بيىل قازان ايىندا 60 جاسقا تولاتىنىن ايتىپ قالدى. كەنجە اپايىمىز مەرەيلى 60 جاسقا تولعان كۇنى اتا-انالارمەن اقىلداسىپ سىيلىعىمىزدى, گ ۇلىمىزدى الىپ سىنىبىمىزدا كۇتتىك. وندا دا «اپاي, سىنىپتا ءبىر وقۋشى سۋ توگىپ الدى, ءسۇرتىپ الاسىز با» دەگەن «جالعان شاقىرتۋىمىزعا» كەلگەندە ءبارىمىز قۇرمەتتەپ قارسى الدىق. ءوزى دە ابدىراپ قالدى. كەيىن ءوزى سىنىبىمىزعا قايتا كەلىپ مۇندايدى كۇتپەگەنىن, وقۋشىلاردىڭ شىنايى ىقىلاسىنا ەرەكشە رازى بولعانىن ايتتى. ءبىز دە وسى كىشكەنتاي عانا جاقسىلىعىمىز ەلگە كەڭ تارالىپ, قىزۋ قولداۋ تابادى دەپ ويلامادىق تا. الەۋمەتتىك جەلىدە از ۋاقىتتىڭ ىشىندە 1 ميلليوننان اسا قارالىم جينادى. جازىلعان بارلىق پىكىردى وقىپ شىقتىم, رازى بولىپ جاتىر ءبارى. ادامعا كەرەك جىلۋلىق, سىي-قۇرمەت دەگەن وسى شىعار. مەنىڭ پايىمداۋىمشا, كەز-كەلگەن ادامعا سىيلىق جاساپ قۋانتۋ – ىزگى امالدىڭ ءبىرى, دىندە دە ادامداردىڭ ءبىر-ءبىرىن قۋانتۋى سۇننەت ەكەنى ايتىلادى. اپايىمىزدى قۋانتقانىمىز ءۇشىن ءوزىمىز دە العىسقا كەنەلدىك», دەيدى ا. جەكەيبايقىزى.
