فوتو: sputnik.kz
«گاز سالاسى مەملەكەتتەرىمىزدىڭ ورنىقتى الەۋمەتتىك-ەكونوميكالىق پروگرەسىندە ەرەكشە ءرول اتقارادى. سوندىقتان رەسەيدىڭ كوگىلدىر وتىنىن تاسىمالداۋ ءىسى جوباعا قاتىسۋشى بارلىق تاراپتىڭ مۇددەسىنە ساي كەلەدى. 7 قازاندا ىسكە قوسىلعان بۇل جوبا قازاقستاننىڭ گاز تاسىمالداۋ ينفراقۇرىلىمىن كەڭەيتۋگە جانە جاڭعىرتۋعا, ورتالىق ازيانىڭ ايماقتىق تۇراقتىلىعى مەن ەنەرگەتيكالىق قاۋىپسىزدىگىن نىعايتۋعا, ەلدەرىمىزدىڭ وندىرىستىك دامۋىنا, بيزنەس-احۋالدى جاقسارتۋعا, سونداي-اق ازاماتتاردىڭ تۇرمىس دەڭگەيىن ارتتىرۋعا تىڭ سەرپىن بەرەدى. ءبىز ءوزىمىزدىڭ ترانزيت الەۋەتىمىزدى تولىققاندى پايدالانۋعا مۇددەلىمىز جانە رەسەي گازىن تاسىمالداۋ كولەمىن ودان ءارى ۇلعايتۋعا دايىنبىز. بيىل 1 قاراشادا وتكەن حالىقارالىق گاز فورۋمىندا قازاقستان ۇكىمەتى مەن «گازپروم» اراسىندا ستراتەگيالىق ىنتىماقتاستىق تۋرالى كەلىسىمگە قول قويىلدى. بۇل – 15 جىلعا دەيىنگى كەزەڭدى قامتيتىن ءوزارا ءتيىمدى سەرىكتەستىك جوسپارىن ازىرلەۋگە جانە جۇزەگە اسىرۋعا باعىتتالعان ۇزاقمەرزىمدى قۇجات. قازاقستان مەن رەسەيدىڭ مۇناي سالاسىنداعى ىنتىماقتاستىعى بۇرىننان تابىستى دامىپ كەلەدى. ەلىمىزدە «لۋكويل» جانە «تاتنەفت» سياقتى رەسەيلىك كونتسەرندەر جەمىستى جۇمىس ىستەپ جاتىر», دەدى پرەزيدەنت.
مەملەكەت باسشىسى وسى جىلدىڭ اقپان ايىندا «قازمۇنايگاز» بەن «لۋكويل» كاسپي تەڭىزىنىڭ ەلىمىزگە تيەسىلى بولىگىندەگى «قالامقاس تەڭىز», «حازار», «اۋەزوۆ» كەن ورىندارىن يگەرۋ جوباسى بويىنشا بىرقاتار كەلىسىم جاساعانىن دا ايتتى. بىلتىر پوليپروپيلەن وندىرەتىن 10 ءىرى كاسىپورىننىڭ ساناتىنا كىرەتىن «Kazakhstan Petrochemical Industries (KPI)» مۇناي حيمياسى كەشەنىنىڭ قۇرىلىسى اياقتالدى. بۇل جوباعا رەسەيلىك «سيبۋر» كومپانياسى دا قاتىسادى. مەملەكەت باسشىسى سۇحباتىندا 2022 جىلى ساران قالاسىندا «تاتنەفت» كومپانياسىنىڭ قاتىسۋىمەن اۆتوموبيل دوڭگەلەكتەرىن شىعاراتىن «KamaTyresKZ» زاۋىتى سالىنعانىن ايتتى.
ەكى مەملەكەتتىڭ سىرتقا مۇناي تاسىمالداۋدا دا ءوزارا ىنتىماقتاستىعى جوعارى. ماسەلەن قازاقستان مۇنايىنىڭ 80 پايىزعا جۋىعى سىرتقى نارىققا رەسەيدىڭ اۋماعى ارقىلى (كاسپي قۇبىر جەلىسى كونسورتسيۋمى) ەكسپورتتالاتىنىن ايتتى. رەسەي دە قىتايعا جونەلتەتىن مۇنايىن قازاقستان اۋماعى ارقىلى وتكىزەدى. مەملەكەت باسشىسى 2033 جىلعا دەيىن رەسەيدىڭ 100 ميلليون توننادان استام مۇنايىن تاسىمالداۋ جوسپارلانىپ وتىرعانىن جەتكىزدى.
