بيىل 15 قاراشا كۇنى ءتول ۆاليۋتامىزعا 30 جىل تولادى. ءار ەلدىڭ ۇلتتىق ۆاليۋتاسى – تاۋەلسىزدىك پەن ەگەمەندىكتىڭ بەلگىسى, مەملەكەتتەگى اقشا جۇيەسىنىڭ نەگىزى.
«Teńgege 30 jyl» كوللەكتسيالىق مونەتالارى كۇمىستەن جاسالعان, سىناماسى – 925/1000, ءون بويىندا تانتال مەتالل دا بار. مونەتا ديامەترى – 50 مم, دايىنداۋ ساپاسى – proof, نومينالى – 1 000 تەڭگەلىك, تارالىمى – 300 ء(ۇش ءجۇز) دانا. مونەتانىڭ جالپى ماسساسى – 84,32 گرامم.
«Teńgege 30 jyl» مونەتاسىنىڭ ديزاينى تسيفرلىق تەحنولوگيالاردى دامىتۋ تۇرعىسىنان «₸» تەڭگە بەلگىسىن پايدالانۋعا نەگىزدەلگەن. بەلگىنىڭ سول جاعىنداعى ويۋ-ورنەك دامۋ مەن وركەندەۋدى, سونداي-اق ۇلتتىق بولمىس پەن ناقىشتى بىلدىرەدى.
كوللەكتسيالىق مونەتالار قازاقستان تەڭگە سارايىندا دايىندالدى.
بۇل مونەتالار قازاقستان رەسپۋبليكاسىنىڭ بۇكىل اۋماعىندا وزدەرىنىڭ بەلگىلەنگەن قۇنىنا ساي تولەمنىڭ بارلىق ءتۇرى بويىنشا قابىلدانۋعا, سونداي-اق ەلدىڭ بارلىق بانكىندە بانك شوتتارىنا ەسەپكە الىنۋعا, اۋدارۋعا, ۇساقتالۋعا جانە ايىرباستالۋعا جاتادى.
پايدالانۋشى ءۇشىن «قازاقستان مونەتالارى» ءموبيلدى قوسىمشاسى دا جۇمىس ىستەيدى. وندا مونەتالارعا قىسقاشا سيپاتتاما بەرىلىپ, سەريالار بويىنشا تاقىرىپتىق بولىمدەرگە بولىنگەن. ياعني ۇلتتىق بانك شىعاراتىن مونەتالار تۋرالى اقپاراتپەن تولىقتاي قامتىلعان. جەكەلەگەن مونەتالار بويىنشا بەينەروليكتەرگە, مونەتالاردىڭ 3D-سۋرەتتەرىنە, سونداي-اق تولىقتىرىلعان شىنايىلىق ەلەمەنتتەرىنە دە سىلتەمەلەر بەرىلگەن.
مونەتالاردىڭ ساتۋعا شىعارىلاتىن كۇنى ۇلتتىق بانكتىڭ رەسمي سايتىندا جانە الەۋمەتتىك جەلىلەردەگى پاراقشالارىندا قوسىمشا حابارلانادى.
