قازىرگى كەزدە پوليتسيا ينتەرنەت ارقىلى ەسىرتكى ساتۋ قىلمىستارىن تۇراقتى تۇردە اشىپ جاتىر.
"جىل باسىنان بەرى مادەنيەت جانە اقپارات مينيسترلىگىنە 3,2 مىڭنان اسا ەسىرتكى سايتتارىن بۇعاتتاۋ تۋرالى سۇراۋحات جىبەرىلدى. بىراق قازىر ەسىرتكى جارنامالايتىن سايتتار تەز وزگەرەدى", دەدى باقىتجان ءامىرحانوۆ وكق-دا وتكەن ءباسپاسوز ءماسليحاتىندا.
باسشىنىڭ ورىنباسارى ەسىرتكى ساتۋشىلار قانداي سايتتى ءجيى پايدالاناتىنىن اتاپ ءوتتى.
"ەسىرتكى ساتۋ بويىنشا OLX سايتى تانىمال. تەك جىل باسىنان بەرى اتالعان كومپانيامەن ىشكى ىستەر مينيسترلىگىنىڭ باستاماسى بويىنشا پوليتسيا جانە سەرۆيس قىزمەتكەرلەرى 3 مىڭنان اسا حابارلاندىرۋدى جويدى", دەدى ءىىم وكىلى.
ءىىم دەرەگىنشە, 2023 جىلعى 10 ايدا 2 405 ەسىرتكى قىلمىسى (1 287 وتكىزۋ جانە اسا ءىرى كولەمدە 415 ەسىرتكى ساقتاۋ) تىركەلگەن. سونداي-اق 32 توننا 642 كەلى ءارتۇرلى ەسىرتكى (62 كەلى گەروين, 5 توننادان اسا كەپتىرىلگەن ماريحۋانا, 503 كەلى گاشيش جانە 255,5 كەلى سينتەتيكالىق ەسىرتكى) تاركىلەنگەن.
