فوتو: اشىق دەرەككوز
جىل باسىنان بەرى وڭىرلەردە بارلىعى 215 لاۋازىمدى تۇلعا اشكەرەلەندى, ونىڭ 137-ءسى باسشىلار.
جەمقورلىققا ۇشىراعان مەملەكەتتىك قىزمەتشىلەردىڭ ەڭ كوپ سانى الماتى, شىمكەنت قالالارى مەن الماتى, شىعىس قازاقستان, تۇركىستان, اقمولا, اباي جانە جەتىسۋ وبلىستارىنا تيەسىلى.
ەسەپتى كەزەڭدە ءارتۇرلى سالالاردا سىبايلاس جەمقورلىق تاۋەكەلدەرىنە 180-گە جۋىق تالداۋ جانە مونيتورينگ جۇرگىزىلدى.
جالپى, سوڭعى 10 ايدا قازاقستاندا 1500-گە جۋىق جەمقورلىق قىلمىس تىركەلدى, 1100-دەن استام ادام اشكەرەلەندى, ونىڭ 158-ءى ءتۇرلى دەڭگەيدەگى باسشىلار بولىپ شىقتى.
ۆەدومستۆو وكىلدەرىنىڭ ايتۋىنشا, سوتقا 1 مىڭنان استام ءىس جىبەرىلدى, ولار بويىنشا 282 ملرد تەڭگەنى قۇراعان زالال تولىق وتەلدى.
«2021 جىلدان باستاپ بيۋدجەتكە جانە كۆازيمەملەكەتتىك سەكتور سۋبەكتىلەرىنە شامامەن 857 ملرد تەڭگە سوماعا م ۇلىكتىك اكتيۆتەر مەن اقشالاي قاراجاتتى قايتارۋ قامتاماسىز ەتىلدى. ونىڭ ىشىندە 159,8 ملرد تەڭگەسى شەتەلدىك يۋريسديكتسيالاردان تۇسكەن اقشا قاراجاتى تۇرىندە. بۇل سوما مەملەكەت بيۋدجەتىنە ءتۇستى. ماسەلەن, اۆستريادان 36,8 ملرد تەڭگە, ليحتەنشتەيننەن 116,7 ملرد تەڭگە, بىرىككەن اراب امىرلىكتەرىنەن 6,3 ملرد تەڭگە, تۇركيادان 253 ملن تەڭگە قايتارىلدى», دەلىنگەن رەسمي اقپاراتتا.
زاڭسىز ساتىپ الىنعان اكتيۆتەردى قايتارۋ بويىنشا جۇمىس ءالى دە جالعاسىپ جاتقانىن ايتا كەتۋ كەرەك.
مەملەكەتتىك ساتىپ الۋ پورتالىنىڭ مونيتورينگى بارىسىندا انتيكور قىزمەتكەرلەرى 38 ملرد تەڭگەدەن استام شىعىنداردىڭ الدىن الدى.
«ەلىمىزدىڭ وبلىستارىندا سىبايلاس جەمقورلىق تاۋەكەلدەرىنىڭ كارتاسىن ىسكە اسىرۋ شەڭبەرىندە جالپى بيۋدجەتى 2,44 ترلن تەڭگەنى قۇرايتىن 156 الەۋمەتتىك نىسان بەلگىلەندى. ولاردى جىمقىرۋعا جول بەرمەۋ ماقساتىندا قۇرىلىس بارىسىنا مونيتورينگ جۇرگىزىلەدى. بۇل پروتسەسكە جۇرتشىلىق تا قوسىلعان. جالپى, حالىقتىڭ جەمقورلىققا قارسى بەلسەندىلىگى ارتىپ كەلەدى. ماسەلەن, وسى جىلدىڭ تامىز ايىندا ىسكە قوسىلعان «سىبايلاس جەمقورلىققا قارسى ۆولونتەرلىك» جوباسىنا 2 مىڭ بەي-جاي قارامايتىن ازامات قاتىسىپ جاتىر», دەپ قوستى اگەنتتىك.
