وبلىستىق سايلاۋ كوميسسياسىنىڭ دەرەگىنشە, 2 اۋداندا 6 ۇمىتكەرگە 72 مىڭنان استام سايلاۋشى داۋىس بەرە الادى. سىرداريا اۋدانىندا – 22 101, ال شيەلىدە 50 402 سايلاۋشى تىركەلگەن. ەكى اۋدانداعى 58 ۋچاسكەدە 388 كوميسسيا مۇشەسى بار.
ەل تاريحىنداعى ەرەكشە كۇندە داۋىس بەرۋ ۋچاسكەلەرىنە وتباسىمەن كەلگەندەر قاتارى كوپ بولدى. وسى ساياسي ناۋقاندا 18 جاسقا جاڭا تولعان 1011 ازامات العاش رەت داۋىس بەرۋ مارتەبەسىنە يە بولىپتى.
سىرداريا اۋدانىندا ەڭ العاش بولىپ داۋىس بەرگەن 102 جاستاعى مايدانگەر ياحيا تاسىروۆ تۋعان جەرىنە قىزمەت ەتەتىن ازاماتتى تاڭداۋ ماڭىزدى ءسات ەكەنىن ايتادى. قازىنالى قاريا ءوز تاڭداۋىن جاساعاننان كەيىن باتاسىن بەرىپ, ساياسي ناۋقانعا ساتتىلىك تىلەدى.
سايلاۋ كۇنى شيەلى اۋدانىنداعى №299 سايلاۋ ۋچاسكەسىنە تالاي دودانى وتكەرگەن كوكپارشىلاردىڭ ۇيىمداسىپ كەلىپ, داۋىس بەرۋى ەرەكشە وقيعا بولدى. بىلەكتى جىگىتتەردىڭ بۇل باستاماسى ەلدىڭ بىرلىگىن تانىتتى. پوليتسيالار مەن ۇستازدار ديناستياسىنىڭ وكىلدەرى دە توپتاسىپ كەلىپ, تاڭداۋ جاسادى.
«بۇگىن 109 بىرىڭعاي بايلانىس ورتالىعى ۇزدىكسىز جۇمىس ىستەپ تۇر. جەرگىلىكتى ۋاقىتپەن ساعات 15:00-گە دەيىن وعان 129 مارتە قوڭىراۋ تۇسكەن. ۇيدەن داۋىس بەرۋگە ءوتىنىش قالدىرعان 344 ازاماتقا تاسىمالداناتىن جاشىك بارادى. بارلىق ۋچاسكەدەگى ازاماتتاردىڭ داۋىس بەرۋ قۇپيالىعى ساقتالاتىن ارنايى كابينالار پەردەلەرمەن جابىلعان», دەيدى وبلىستىق سايلاۋ كوميسسياسىنىڭ ماماندارى.
قىزىلوردا
