قازىرگى تاڭدا جاڭاشا ىقپالداسۋدىڭ زامانى كەلدى. ەگەر ءاربىر تۇركىتىلدەس ەل ءبىر-بىرىمەن بايلانىسىن ودان ءارى نىعايتىپ, حالقى دا ىنتىماقتاساتىن بولسا, بولاشاقتا الەۋەتتى وداق قۇرىپ, ۇلكەن ساياسي جانە ەكونوميكالىق كۇشكە, ەڭ باستىسى, الەۋمەتتىك, رۋحاني كەڭىستىككە اينالۋعا ابدەن بولادى.
سامميتتە قاۋىپسىزدىك, ەكونوميكا, ساياسي ينتەگراتسيا جانە كولىك كوممۋنيكاتسياسى الەۋەتىن ارتتىرۋ ماسەلەلەرى كەڭىنەن ءسوز بولدى. تۇركيا مەن ازەربايجان پرەزيدەنتتەرى ءوز سوزىندە كولىك ءدالىزىنىڭ قاجەتتىگىنە توقتالدى. ترانسكاسپي ءدالىزىن قۇرۋعا باۋىرلاس تۇركى ەلدەرى عانا ەمەس, قازاقستان دا مۇددەلى. دەمەك بارلىعىنىڭ مۇراتى ورتاق.
قازىرگى كۇردەلى كەزەڭدە كولىك-ترانزيت كوممۋنيكاتسياسىنىڭ الەۋەتىن ارتتىرۋ جانە ونىڭ مۇمكىندىگىن بارىنشا پايدالانۋ اسا ماڭىزدى. سەبەبى ءبىزدىڭ مەملەكەتتەرىمىز باتىس پەن شىعىستى, سولتۇستىك پەن وڭتۇستىكتى تىكەلەي بايلانىستىرادى. قازاقستان, ازەربايجان, تۇركيا ارقىلى وتەتىن ترانسكاسپي حالىقارالىق كولىك ءدالىزى – سونىڭ جارقىن مىسالى.
ازەربايجان دا, قازاقستان دا قۇرىلىقتاعى, اۋماقتاعى جاعدايدىڭ تۇراقتالعانىنا مۇددەلى. ەكى تاراپتىڭ دا بەيبىتشىلىكتى قۋاتتايتىن بەرىك ۇستانىمى بار. تەك وسىنداي باسقوسۋلار ارقىلى ءبىز گەوساياسي احۋالدىڭ ىقپالىن ازايتامىز. جالپى, ەۋروپاعا قاراعاندا ازيا ەلدەرىنىڭ بايلانىسىن نىعايتۋ بارشامىزعا ماڭىزدى بولىپ وتىر.
سامميت بارىسىندا باس-اياعى 12 قۇجاتقا قول قويىلدى. ەندىگى كەزەكتە تۇركى مەملەكەتتەرىنىڭ ۇيىمى ءتۇرلى سالادا وسى قۇجاتتاردىڭ نەگىزىندە بەكىپ, ىقپالداستىعى مەن بىرلىگى نىعايا تۇسۋگە ءتيىس. ءبىر سوزبەن ايتقاندا, تۇركى مەملەكەتتەرى ءۇشىن دامۋدىڭ جاڭا كەزەڭى باستالدى.
ناريمان گۋسەينزادە,
«ARB 24» ارناسىنىڭ
باس رەداكتورى
