ءبىز قازىر الەم ەلدەرىنىڭ جاڭاشا ىقپالداسۋىنىڭ قارساڭىندا تۇرمىز. سول ورايدا سانعاسىرلىق تاعىلىمدى تاريحى بار تۇركى ءداۋىرى تاقىرىبىنداعى باسقوسۋ ەڭ الدىمەن ادامزات ءۇشىن اسا ماڭىزدى بەيبىتشىلىك, تۇراقتىلىق پەن قاۋىپسىزدىك يدەيالارىن العا تارتادى.
كەيىنگى جىلدارى ورتالىق ازيانى مەكەن ەتەتىن تۇركىتىلدەس مەملەكەتتەر ساياسي-ەكونوميكالىق, مادەني-رۋحاني جاعىنان نىعايىپ, كۇشەيىپ كەلەدى. ەگەر وتكەن عاسىردىڭ توقسانىنشى جىلدارى تۇركى الەمىندە تۇركيا مەملەكەتىنىڭ ءۇنى باسىمىراق شىعىپ, تۇركى دۇنيەسىنە قاتىستى نەگىزگى ۇسىنىستار مەن شەشىمدەردى سول ەل قابىلداپ كەلسە, كەيىنگى ۋاقىتتا قازاقستان سەكىلدى جاڭادان تاۋەلسىزدىك العان تۇركىتىلدەس مەملەكەتتىڭ تۇركى الەمىندەگى سالماعى بارىنشا ارتتى.
ايتالىق, قازاقستاننىڭ باستاماسىمەن قۇرىلعان تۇركىتىلدەس مەملەكەتتەر ىنتىماقتاستىعى كەڭەسى قازىردە تولىققاندى بەدەلدى حالىقارالىق ۇيىمعا اينالدى. بۇگىنگى سامميت – ءتۇبى ءبىر تۇركى جۇرتىنىڭ ءداۋىرى باستالعانىنىڭ ناقتى ايعاعى. شەتەلدىك بەدەلدى ساياسي ساراپشىلار دا تۇركى ءداۋىرىنىڭ جاڭا كەزەڭى باستالعانىن جارىسا جازىپ, جاريالاپ جاتىر.
مۇنداي جوعارى دەڭگەيلى باسقوسۋلار – بارشا ادامزاتتى بەيبىتشىلىككە, ىنتىماقتاستىققا, ءوزارا ىقپالداستىققا ۇندەۋدىڭ بىردەن-ءبىر قۇرالى. سامميت بارىسىندا الداعى ۋاقىتتا اتقارىلۋعا ءتيىس كەلەلى ىستەر مەن باستامالاردى كۇن تارتىبىنە شىعارعان تاريحي كەلىسىمدەرگە, ءتۇرلى شەشىمگە قول قويىلدى. باۋىرلاس مەملەكەتتەردىڭ قاۋىپسىزدىگى, گەوساياسي تۇراقتىلىعى, ەكونوميكالىق دامۋىنا قاتىستى ناقتى شەشىمدەر قابىلداندى.
يالچىن توپچۋ,
تۇركيا پرەزيدەنتىنىڭ
باس كەڭەسشىسى
