سەناتور ءوز سوزىندە كورەيا قازاقستاننىڭ ازيا-تىنىق مۇحيتى ايماعىنداعى نەگىزگى ساياسي جانە ەكونوميكالىق ارىپتەستەرىنىڭ ءبىرى ەكەنىن اتاپ ءوتتى. ەلدەرىمىز اراسىنداعى ساۋدا-ەكونوميكالىق جانە ينۆەستيتسيا سالالارىنداعى ىنتىماقتاستىق قارقىندى دامىدى جانە رەكوردتىق كورسەتكىشتەرگە جەتتى. سەناتور سونىمەن قاتار ەلىمىزدەگى نەگىزگى قۇرىلىمدىق ەكونوميكالىق رەفورمالار تۋرالى ايتىپ, جۇرگىزىلىپ جاتقان وزگەرىستەر ساۋدا-ەكونوميكالىق جانە ينۆەستيتسيالىق ىنتىماقتاستىق ءۇشىن جاڭا مۇمكىندىكتەر اشاتىنىن اتاپ ءوتتى.
«وڭدەۋ سەكتورىن دامىتۋعا باستى نازار اۋدارىلادى. مەتالداردى تەرەڭ وڭدەۋ, مۇناي حيمياسى, اۋىر ماشينا جاساۋ, ۋراندى بايىتۋ سياقتى سالالاردا ءىرى جوبالاردى ىسكە اسىرۋ جوسپارلانىپ وتىر. وسى ماقساتتا شەتەلدىك جانە وتاندىق ينۆەستورلار العاشقى ءۇش جىلدا سالىقتار مەن باسقا دا مىندەتتى تولەمدەردەن بوساتىلادى. بۇل – ناقتى وڭدەۋ سالاسىنا ەلەۋلى سەرپىن بەرۋگە ءتيىس نەگىزگى ماسەلە. اگروونەركاسىپ كەشەنىن دامىتۋعا باسا نازار اۋدارىلادى. تسيفرلاندىرۋ جانە يننوۆاتسيالاردى ەنگىزۋ ماسەلەلەرى دە باستى نازاردا بولادى», دەدى س.الداشەۆ.
كەزدەسۋگە قاتىسۋشىلار اقپاراتتىق تەحنولوگيالار, تسيفرلاندىرۋ, جاسىل ەكونوميكانى ىلگەرىلەتۋ, كيبەرقىلمىسپەن كۇرەس, ماشينا جاساۋ, تاۋ-كەن ءوندىرىسى جانە اتوم ەنەرگەتيكاسى سالاسىنداعى ىنتىماقتاستىق ماسەلەلەرىن تالقىلادى.
كورەيادان كەلگەن دەلەگاتتار ءىس-شارا سوڭىندا قازاقستانمەن ىنتىماقتاستىقتى جوعارى باعالايتىندارىن جانە ەكىجاقتى قارىم-قاتىناستاردى نىعايتۋعا بەلسەندى ىقپال ەتۋگە دايىن ەكەندەرىن اتاپ ءوتتى.
