كۇن تارتىبىندە نورماتيۆتىك قاۋلىلاردىڭ ەكى جوباسى قابىلداندى. العاشقى قۇجات – «سوتتاردىڭ زاڭدى تۇلعالار مەن جەكە كاسىپكەرلەردى وڭالتۋ جانە بانكروتتىق تۋرالى زاڭنامانى قولدانۋىنىڭ كەيبىر ماسەلەلەرى تۋرالى» دەپ اتالادى. نورماتيۆتىك قاۋلى جوباسىن جوعارعى سوتتىڭ سۋديالارى مارينا بوروۆيك پەن بوتاگوز ەراليەۆا تانىستىردى.
قولدانىستاعى نورماتيۆتىك قاۋلىدا قۇجات مازمۇنىنىڭ 50 پايىزدان كوپ بولىگى تۇزەتىلۋگە جاتادى. وسىعان وراي نورماتيۆتىك قاۋلى قارالۋعا شىعارىلىپ وتىر. ويتكەنى «وڭالتۋ جانە بانكروتتىق تۋرالى» زاڭعا 28 رەت وزگەرىس ەنگىزىلگەن. تيىسىنشە, بۇل سوت تاجىريبەسىنە دە ءوز اسەرىن تيگىزدى. قۇجاتتا سوتتىلىققا, مەرزىمدەرگە, سوتقا جۇگىنۋ نەگىزدەرىنە, ادەيى بانكروتتىق پەن سۋبسيديارلىق جاۋاپكەرشىلىككە, بورىشكەر مەن اكىمشىنىڭ قۇقىقتىق جاعدايىنا, كرەديتورلار جينالىسى مەن كوميتەتىنە, ولاردىڭ قۇقىقتارى مەن مىندەتتەرىنە, كرەديتورلار تالاپتارىنىڭ ءتىزىلىمىن جۇرگىزۋگە جانە باسقالارعا قاتىستى ماتەريالدىق جانە ۇدەرىستىك قۇقىق نورمالارىنىڭ جەكەلەگەن ەرەجەلەرى ءتۇسىندىرىلدى.
«سوتتاردىڭ تورەلىك زاڭنامانى قولدانۋىنىڭ كەيبىر ماسەلەلەرى تۋرالى» نق جوباسىن جوعارعى سوت سۋديالارى مارگاريتا ودينتسوۆا مەن جاڭىلدىق قاشقىنباەۆا تانىستىردى. جوعارعى سوتتىڭ تورەلىك زاڭنامانى قولدانۋدىڭ سوت پراكتيكاسىن قورىتۋى سۋديالاردىڭ تورەلىك پەن سوت اراسىنداعى قۇزىرەتتى اجىراتۋ, قامتاماسىز ەتۋ شارالارىن جۇزەگە اسىرۋ جانە دالەلدەمەلەردى الۋعا جاردەمدەسۋ, تورەلىك شەشىمدەردىڭ كۇشىن جويۋ, تورەلىك شەشىمدەردى تانۋ جانە ماجبۇرلەپ ورىنداۋ ماسەلەلەرى تۋىندايتىنىن كورسەتىپ وتىر.
وسى ورايدا نورماتيۆتىك قاۋلىلار جوباسىندا كورسەتىلگەن ءاربىر جاعداي بويىنشا تۇسىندىرمە بەرىلدى. تالقىلاۋ قورىتىندىسى بويىنشا جوعارعى سوت سۋديالارى نورماتيۆتىك قاۋلىلاردىڭ جوبالارىن قابىلداۋ ءۇشىن داۋىس بەردى. جوبالارمەن جوعارعى سوت سايتىنىڭ «زاڭناما» بولىمىندە تانىسۋعا بولادى. نورماتيۆتىك قاۋلىلاردىڭ ءماتىنى قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ ەتالوندىق باقىلاۋ بانكىندە رەسمي جاريالانادى.
جالپى وتىرىستىڭ جۇمىسىنا جوعارعى سوت جانىنداعى حالىقارالىق كەڭەستىڭ مۇشەسى, ۇلتتىق عىلىم اكادەمياسىنىڭ اكادەميگى, پروفەسسور مايدان سۇلەيمەنوۆ جانە عىلىمي-كونسۋلتاتيۆتىك كەڭەستىڭ مۇشەسى, ەكونوميكا عىلىمدارىنىڭ دوكتورى جاننات ەرتىلەسوۆا قاتىسىپ, ساراپتامالىق سۇيەمەلدەۋ قىزمەتىن كورسەتتى. جيىندا اسلامبەك مەرعاليەۆ سوت قىزمەتىن جەتىلدىرۋگە قوسقان ۇلەسى ءۇشىن ولاردى «قازاقستان رەسپۋبليكاسىنىڭ سوت جۇيەسىنە 30 جىل» مەرەيتويلىق مەدالىمەن ماراپاتتادى.
