زاڭ جوباسى مەملەكەتتىك باقىلاۋ مەن قاداعالاۋ جۇيەسىن رەتكە كەلتىرۋ, ولاردى جۇرگىزۋدىڭ اشىقتىعىن ارتتىرۋ, كاسىپكەرلىك سۋبەكتىلەرى مەن مەملەكەت مۇددەلەرىنىڭ تەپە-تەڭدىگىن قامتاماسىز ەتۋ ارقىلى كاسىپكەرلىك قىزمەتتى جۇرگىزۋ جاعدايلارىن جاقسارتۋعا باعىتتالعان.
سونىمەن قاتار دەپۋتاتتار قوعامدىق بىرلەستىكتەر ماسەلەلەرىنە قاتىستى تۇزەتۋلەر بويىنشا زاڭ جوباسىن ءبىرىنشى وقىلىمدا قارايدى. زاڭ جوباسى ازاماتتىق قوعامدى ودان ءارى دامىتۋ جانە جاڭا قوعامدىق بىرلەستىكتەر قۇرۋ ءتارتىبىن وڭايلاتۋ ماقساتىندا ازىرلەندى.
الداعى جالپى وتىرىستا رەسەي ۇكىمەتىمەن مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسىن قاراۋ كوزدەلگەن. سونداي-اق ەكسپورتتىق-كرەديتتىك اگەنتتىك جانە شيكىزاتتىق ەمەس تاۋارلاردىڭ (جۇمىستاردىڭ, كورسەتىلەتىن قىزمەتتەردىڭ) ەكسپورتىن ىلگەرىلەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ەكىنشى وقىلىمدا قارالماق. قۇجات «KazakhExport» ەكسپورتتىق ساقتاندىرۋ كومپانياسى» اكتسيونەرلىك قوعامى ەكسپورتتى قارجىلىق قولداۋدىڭ بىرىڭعاي وپەراتورى ءۇشىن رەتتەۋشى رەجىمدى قالىپتاستىرۋ بويىنشا مەملەكەت باسشىسىنىڭ تاپسىرماسىن ورىنداۋ ماقساتىندا ازىرلەندى.
پالاتا كوميتەتتەرى بايلانىس, تسيفرلاندىرۋ جانە اقپاراتتاندىرۋ سالاسىنىڭ ينۆەستيتسيالىق احۋالىن ارتتىرۋ ماسەلەلەرى تۋرالى زاڭ جوباسىن جانە بىرقاتار راتيفيكاتسيالاناتىن كەلىسىمدى جۇمىس الۋدى جوسپارلاپ وتىر. ولار – سينگاپۋر ۇكىمەتىمەن ينۆەستيتسيالاردى كوتەرمەلەۋ مەن ءوزارا قورعاۋ تۋرالى جانە فرانتسۋز ۇكىمەتىمەن جاھاندىق جىلىنۋعا قارسى كۇرەس سالاسىنداعى ىنتىماقتاستىقتى ىسكە اسىرۋ تۋرالى ارنايى كەلىسىمدەر.
