تۇركيا پرەزيدەنتى اتاپ وتكەن ءبىر ءالىپبي, قازاقستان پرەزيدەنتى اتاپ وتكەن ءبىر تاريح جانە وزبەكستان پرەزيدەنتى اتاپ وتكەن ءبىر بانك, ياعني تۇركى مەملەكەتتەرى اراسىنداعى ىنتىماقتاستىقتىڭ مىزعىماس نەگىزىن قۇراۋعا سەپتىگىن تيگىزەدى. ورتاق ءالىپبي – يدەولوگيالىق تۇرعىدا وتە ماڭىزدى قادام. ءبىزدىڭ ەلدە لاتىن الىپبيىنە كوشۋ تۋرالى باستامالار بولعان. ول كەيىنگە شەگەرىلگەنىمەن, جاڭا سەرپىلىس الۋى مۇمكىن. ال ورتاق تاريحقا كەلسەك, ارحيۆ ماتەريالدارىن قايتا قاراۋ – باۋىرلاس حالىقتاردىڭ بولاشاق قادامدارى ءۇشىن ەلەۋلى سەرپىلىس. تۇركى مەملەكەتتەرىن قايتا قاراۋدى ۇسىنۋدىڭ ءوزى ۇيىمعا مۇشە مەملەكەتتەر اراسىنداعى مادەني-گۋمانيتارلىق, تاريحي-الەۋمەتتىك, ياعني بارلىق سالادا بىرىگۋدى كۇشەيتەتىن فاكتور. ودان كەيىنگى ەكونوميكالىق فاكتور. بۇل تۇرعىدا بىلتىر وتكەن سامميتتە تۇركى ينۆەستيتسيالىق قورى قۇرىلىپ, 500 ملن دوللارداي العاشقى جارنا انىقتالعان بولاتىن. ەندى تۇركى ينۆەستيتسيالىق بانكى قۇرىلاتىن بولسا, بۇل – وسى مەملەكەتتەگى ينفراقۇرىلىمدىق جوبالاردى قارجىلاندىرۋ ءۇشىن جاڭا تەتىك پايدا بولادى دەگەن ءسوز. بۇل – ەلدەر اراسىنداعى ينۆەستيتسيالىق اعىمدى كۇشەيتۋگە ماڭىزدى قادام. ارينە, تۇركيانىڭ ورتالىق ازيا مەملەكەتتەرىمەن, ونىڭ ىشىندە قازاقستانمەن ساۋدا-ەكونوميكالىق قارىم-قاتىناستاعى ۇلەسى ءالى دە بولسا تومەن. بۇل جەردە رەسەي, قىتاي باستامالارى, ەۋرازيا ەكونوميكالىق قاۋىمداستىعى نەمەسە ء«بىر بەلدەۋ, ءبىر جول» جوباسىنىڭ قارجىلارىمەن سالىستىرۋعا كەلمەيدى. دەي تۇرعانمەن مەملەكەت باسشىسىنىڭ وسى تۇرعىداعى زاڭنامالاردى جانە ەكونوميكالىق تەرميندەردى, ەكونوميكالىق تەتىكتەردى ۇيلەستىرۋ باستاماسى الداعى ۋاقىتتا تۇركى مەملەكەتتەرى ۇيىمىنىڭ مۇشەلەرى اراسىنداعى ەكونوميكالىق قارقىندى كۇشەيتۋگە ءوز سەپتىگىن تيگىزۋى مۇمكىن.
اسكەري سالادا دا سەرپىندى سەرىكتەستىك بايقالادى. بىلتىردان بەرى قىرعىز رەسپۋبليكاسى تۇرىك «Bayraktar»-ىنا كوپتەپ تاپسىرىس بەرىپ جاتىر. ودان بولەك, ازەربايجان تۇرىك اسكەري قارۋلارىن كەڭىنەن قولدانا باستادى. قازاقستان مەن وزبەكستان دا وسى باعىتتاعى قارىم-قاتىناستى جۇزەگە اسىرىپ كەلەدى. ورتالىق ازيا مەملەكەتتەرىنىڭ قاتىسۋىمەن ارنايى جاتتىعۋلار ءوتىپ جاتىر. الداعى ۋاقىتتا ەكونوميكالىق ىنتىماقتاستىق ينتەگراتسياسى كۇشەيەدى.
قازبەك مايگەلدينوۆ,
ۇلتتىق قۇرىلتاي مۇشەسى, ساياساتتانۋشى
