فرانتسۋز دەلەگاتسياسى ءال-فارابي اتىنداعى قازۇۋ-دىڭ عىلىمدى قاجەت ەتەتىن تەحنولوگيالار مەن ينجينيرينگ كلاستەرىندەگى زاماناۋي تەحنولوگيالىق جابدىقتاردى كورىپ, ۋنيۆەرسيتەتتىڭ عىلىمي-تەحنولوگيالىق پارك, جاعداياتتىق باسقارۋ جانە «كەرەمەت» ستۋدەنتتەرگە قىزمەت كورسەتۋ ورتالىقتارىنىڭ قىزمەتىمەن تانىستى.
فورۋم اياسىندا «حالىقارالىق عىلىمي كوللابوراتسيانىڭ دامۋ بولاشاعى» اتتى دوڭگەلەك ۇستەل ءوتتى. القاسوزگە فرانتسيانىڭ الماتىداعى باس كونسۋلى فابريسا نەۆە, مادەنيەت جانە ىنتىماقتاستىق جونىندەگى كەڭەسشى الەكس بورتولان, اباي اتىنداعى قازۇپۋ سوربوننا-قازاقستان ينستيتۋتىنىڭ جانە ءال-فارابي اتىنداعى قازۇۋ بازاسىندا قۇرىلعان گەوەنەرگەتيكا عىلىمي ورتالىعىنىڭ ديرەكتورى اگنەس بۋسسە, فرانتسيانىڭ جوعارى وقۋ ورىندارى مەن كاسىپورىندارىنىڭ وكىلدەرى, قازاقستاندىق جوو وكىلدەرى قاتىستى. فورۋم اياسىندا ەكى تاراپ تاجىريبە الماسىپ, بولاشاقتاعى ىنتىماقتاستىق كوكجيەگىن ايقىندادى.
القاسوز مودەراتورى باسقارما توراعاسى-ءال-فارابي اتىنداعى قازۇۋ رەكتورى جانسەيىت تۇيمەباەۆ: «كەشە قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ قازاقستانعا رەسمي ساپارمەن كەلگەن فرانتسيا پرەزيدەنتى ەممانيۋەل ماكرونمەن كەزدەستى. ەكى ەل باسشىلارى ساۋدا-ەكونوميكالىق, ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ جولدارىن تالقىلادى. سونداي-اق ءبىلىم-عىلىم سالاسىنداعى ارىپتەستىك پەن حالىقارالىق ماسەلەلەر قاراستىرىلدى. قازاقستان مەن فرانتسيا اراسىنداعى ەكونوميكالىق-ستراتەگيالىق ارىپتەستىگىمىزدى ودان ءارى دامىتۋ ءبىز ءۇشىن وتە ماڭىزدى», - دەپ ەكى ەلدىڭ ءبىلىم مەن عىلىم سالاسىنداعى ىنتىماقتاستىقتىڭ بولاشاقتا ناتيجەلى جالعاسىن تاباتىندىعىنا سەنىم ءبىلدىردى.
فرانتسيانىڭ قازاقستانداعى ءبىلىم بەرۋ سالاسىنداعى ىنتىماقتاستىعى جونىندەگى اتتاشە كساۆە لە تورريۆەللەك (EHESS-پاريج), سۋلەيمان دەميرەل ۋنيۆەرسيتەتىنىڭ اسس. پروفەسسورى قايرات مولداشەۆ بىرلەسكەن عىلىمي زەرتتەۋلەر, جوبالار, قوس ديپلومدىق ءبىلىم بەرۋدەگى وزەكتى ماسەلەلەردى قوزعاپ, شەشىلۋ جولدارىن ۇسىندى. سان-ەتين ۇلتتىق ۋنيۆەرسيتەتىنىڭ دەپارتامەنت ديرەكتورى تەرري دجەنيزيان عىلىمي پىكىرتالاستان اقيقات تۋاتىندىعىن ۇتىمدى جەتكىزدى. جاساندى ينتەللەكت جانە Big Data كافەدراسىنىڭ مەڭگەرۋشىسى مادينا مانسۇروۆا, بيوتەحنولوگيا كافەدراسىنىڭ مەڭگەرۋشىسى ايدا قىستاۋباەۆا, تۇراقتى دامۋ بويىنشا يۋنەسكو كافەدراسىنىڭ مەڭگەرۋشىسى تۇرسىنكۇل بازارباەۆا ۇلتتىق ۋنيۆەرسيتەتتىڭ فرانتسيا جوو-لارمەن وقۋ ۇدەرىسى, عىلىمي باعىتتارداعى ءتيىمدى بايلانىستارىن اڭگىمەلەپ, فرانتسيا ۋنيۆەرسيتەتتەرىنىڭ بازاسىندا وتكىزگەن عىلىمي تاعىلىمدالاردان العان اسەرلەرىمەن ءبولىستى.
تۇستەن كەيىن جالعاسقان «قازاقستاندا جۇمىس ىستەيتىن فرانتسۋز كومپانيالارىنىڭ ينجەنەرلەر مەن تەحنيكتەرگە سۇرانىستارى» تاقىرىبىنداعى B2B كەزدەسۋگە فرانتسيا بيزنەس-مەكتەبىنىڭ (KEDGE, YSchools, IMT Atlantic, INP Grenoble, Phelma) جانە فرانتسۋز كومپانيالارىنىڭ وكىلدەرى (BGDN, CCIFK), سونداي-اق ءىرى كومپانيا باسشىلارى (قازاقستاندىق «La Tartine», «Novotel» ت.ب.) قاتىسىپ, جۇمىس بەرۋشىلەردىڭ تۇلەكتەرگە قوياتىن تالاپتاردى اتاپ ءوتتى, ساپالى دايارلانعان تۇلەكتەرگە ءزارۋ ەكەندەرىن, كەيدە تۇلەكتەردى وزدەرى قايتا دايارلايتىندىعىن جەتكىزدى. فرانتسيا بيزنەسىنىڭ وكىلدەرى فرانتسياداعى ماماندار دايارلاۋ ەرەكشەلىگىنە, شەتەلدىك كومپانيالاردا جۇمىس ىستەۋگە قاجەتتى قۇزىرەتتىلىكتەرگە, تەحنولوگيالىق كومپانيالاردىڭ قىزمەتىنە توقتالدى, شارا قاتىسۋشىلارى – جاستارعا اقىل-كەڭەستەر بەردى.
ءال-فارابي اتىنداعى قازاق ۇلتتىق ۋنيۆەرسيتەتى فرانتسيانىڭ 21 جوعارى وقۋ ورنىمەن تىعىز ىنتىماقتاستىق ورناتقان. بىلتىرعى وقۋ جىلىندا 48 ستۋدەنت پەن 23 دوكتورانت اكادەميالىق ۇتقىرلىق باعدارلاماسى بويىنشا فرانتسيادا ءبىلىم السا, بيىل باكالاۆر, ماگيستراتۋرا, دوكتورانتۋرا دەڭگەيىندەگى 30-عا جۋىق ستۋدەنت فرانتسيان ۋنيۆەرسيتەتتەرىندە وقۋلارىن جالعاستىرىپ جاتىر.
قازىرگى تاڭدا ءال-فارابي ۋنيۆەرسيتەتىندە فرانتسيا جوعارى وقۋ ورىندارىمەن جاسالعان كەلىسىم-شارت اياسىندا 11 ستۋدەنت وقيدى. ۋنيۆەرسيتەت عالىمدارى فرانتسيالىق ارىپتەستەرمەن بىرلەسكەن حالىقارالىق جوبالار ورىنداپ, عىلىمي-زەرتتەۋ جۇمىستارىن جۇرگىزىپ وتىر. قوس ديپلومدىق ءبىلىم بەرۋ باعدارلامالارى جۇزەگە اسىرىلۋدا. فرانتسيادان شاقىرىلعان پروفەسسورلار ۋنيۆەرسيتەتتە ءدارىس وقيدى, دوكتورانتتارعا عىلىمي كەڭەسشىلىك جاساپ, بىرلەسكەن ماقالالار جاريالاپ كەلەدى.
نازگۇل شىڭعىسوۆا,
يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ مەڭگەرۋشىسى,
ءال-فارابي اتىنداعى قازۇۋ
