فوتو: استانا اكىمدىگى
جيىنعا ۆەنگريانىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پيتەر سييارتو, قازاقستان سىرتقى ىستەر ءمينيسترى مۇرات نۇرتىلەۋ جانە ەلوردا تۇرعىندارى قاتىستى.
«بيىل قازاقستاندا اتاقتى ۆەنگر اقىن شاندور پەتوفيدىڭ 200 جىلدىعى اتاپ ءوتىلدى, ال بۇگىن ءبىز ونىڭ قۇرمەتىنە ەلىمىزدىڭ باس قالاسىندا كوشە اشۋ ءۇشىن باس قوسىپ وتىرمىز. بۇل ورتاق تاريحي تامىرى بار ەكى حالىق اراسىنداعى دوستىقتىڭ تاعى ءبىر بەلگىسى», دەپ اتاپ ءوتتى مۇرات نۇرتىلەۋ.
ءوز كەزەگىندە ءسوز العان پيتەر سييارتو ەكى ەل اراسىنداعى كوپ جىلعى ىنتىماقتاستىق ودان ءارى نىعايا بەرەتىنىن ايتتى.
«قازاقستان مەن ۆەنگريا – مادەنيەتى باي جانە تاريحي ەرەكشەلىكتەرى ۇقساس ەلدەر. سوندىقتان ءبىزدىڭ ىنتىماقتاستىعىمىز ءبىرىنشى كەزەكتە ءوزارا تۇسىنىستىككە نەگىزدەلگەن. مۇنداي سەنىمدى قارىم-قاتىناس ەكى ەل ءۇشىن دە دامۋ جولىندا جاقسى قولداۋ بولىپ سانالادى», دەدى ول.
ول سونداي-اق اقىننىڭ 1000-نان استام شىعارماسىنان تۇراتىن شاندور پەتوفيدىڭ جيناعى قازاق تىلىندە جاريالاناتىنىن ەرەكشە اتاپ ءوتتى.
شاندور پەتوفي – ۆەنگر حالقىنىڭ ۇلتتىق پوەزياسىنىڭ ەڭ كورنەكتى وكىلى جانە 1848-1849 جىلدارداعى رەۆوليۋتسيانىڭ بەلسەندى قايراتكەرلەرىنىڭ ءبىرى بولعان.
