بيىل ونەرلى وتباسىنىڭ شاڭىراق كوتەرگەنىنە 30 جىل بولادى. جۇلدىزدى جۇپتىڭ وتباسى قۇرعان كۇنىن قانات ايتباەۆتىڭ جان دوسى, سازگەر ورال بايسەڭگىروۆ كوپشىلىكتىڭ ەسىنە سالدى.
«قانات پەن سۆەتانىڭ العاش تانىسقان ساتىنە كۋامىن. توقسانىنشى جىلداردىڭ باسىندا ستۋدەنت ارۋلار اراسىندا «قىز سىنى» بايقاۋىن جۇرگىزدىم. قىزداردى رەت-رەتىمەن ساحناعا شىعۋعا دايىنداپ جاتسام, كورەرمەن اراسىنان قاناتقا كوزىم ءتۇستى. مويىنى ءۇزىلىپ كەتەتىندەي سۆەتاعا قاراپ وتىر ەكەن», دەپ ازىلدەدى.
دوسىنىڭ ءسوزىن راستاپ, تانىسۋ حيكاياسىن قانات مىرزا ءوزى ايتىپ بەردى.
«ينستيتۋتتا وقىپ جۇرگەندە بەلسەندى ستۋدەنت بولدىم. ءبىر كۇنى پەداگوگيكالىق كوللەدجدە «قىز سىنى» بايقاۋىنا ادىلقازى بولۋعا شاقىردى. ۇلكەن وقىتۋشى-پەداگوگتەرمەن سول جەردە قازىلىق ەتتىم. ينەنىڭ كوزىنەن وتەتىن ارۋلارىمىز ونەرلەرىن كورسەتتى. سول بايقاۋدا قازىلار القاسىنىڭ شەشىمىمەن سۆەتاعا ەكىنشى ورىن بەردىك», دەدى ديماشتىڭ اكەسى.
ارادا ەكى اپتاداي ۋاقىت وتەدى. ول كەزدە الەۋمەتتىك جەلى جوق. ەلدىڭ كورەتىنى – تەلەديدار.
«وبلىستىق ارنانى قوسىپ قويىپ, ءتورت جىگىت جالدامالى پاتەرىمىزدە تاماق ءىشىپ وتىرساق, تەلەديداردان: «باس جۇلدە يەگەرى – سۆەتلانا تولەمىسوۆا» دەپ حابارلاپ جاتىر. سول جەردە: «وسى قىزعا ۇيلەنەمىن» دەپ وزىمە سەرت بەردىم. ستۋدەنت كۇنىمدە جەرگىلىكتى تەلەارنادا جۇمىس ىستەيتىنمىن. سۆەتانى باعدارلاماعا شاقىرىپ ءجۇرىپ, تانىسىپ الدىم», دەدى قانات ايتباەۆ.
