سۋرەتتەردى تۇسىرگەن – رۋسلان قادىروۆ
كوپكە ءمالىم, ءبىلىم بەرۋدى تۇراقتى دامىتۋ قورى بىلتىردان باستاپ «قازاقستان حالقىنا» قورىمەن جانە نازارباەۆ زياتكەرلىك مەكتەپتەرىمەن بىرلەسە «اۋىلدىق ايماقتارداعى تىرەك مەكتەپتەردىڭ الەۋەتىن ارتتىرۋ» جوباسىن جۇزەگە اسىرىپ كەلەدى. بۇل باستامانىڭ نەگىزگى ماقساتى قالالىق جانە اۋىلدىق مەكتەپتەر اراسىنداعى ءبىلىم بەرۋ ساپاسىنداعى الشاقتىقتى ازايتۋعا, پەداگوگتەردىڭ كاسىبي شەبەرلىگىن شىڭداۋعا باعىتتالعان. بۇگىندە وڭىردە وسى جوباعا 4 مەكتەپ كىرىپ وتىر. ونىڭ ءبىرى – قوعالى ورتا مەكتەبى. اتالعان قور مەكتەپتى دامىتۋعا جوبا اياسىندا 250 ملن تەڭگە جۇمساعان. بۇل قاراجاتقا 36 سىنىپ قايتا جابدىقتالدى.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, بەرەكەلى باستاما اياسىندا قارعالى ورتا مەكتەبىنىڭ سىنىپتارىنداعى جيھاز جاڭارتىلىپ, جوندەۋ جۇمىستارىن جۇرگىزۋگە كومەك كورسەتىلدى. فيزيكا, حيميا, ماتەماتيكا, بيولوگيا, گەوگرافيا, ينفورماتيكا, جاراتىلىستانۋ كابينەتتەرى زاماناۋي قۇرالدارمەن جابدىقتالدى. ينتەراكتيۆتى پانەلدەر مەن زەرتحانالىق جابدىقتار ورناتىلدى. STEM زەرتحاناسى مەن روبوتتەحنيكا كابينەتى سىناقتارعا كەرەكتى شاعىن گيدروپونيكا زەرتحاناسىمەن, ۆيرتۋالدى شىندىق كابينەتتەرىمەن جانە باسقا دا ءتۇرلى قۇرالمەن, ماتەريالدارمەن جابدىقتالعان. ينفورماتيكا كابينەتى زاماناۋي تەحنولوگيالارعا سايكەس تولىعىمەن جاڭارتىلىپ, كومپيۋتەرلىك تەحنيكالار قويىلعان.
قور وكىلدەرى مەن دەمەۋشىلەر مەكتەپتىڭ جاڭارتىلۋ جاعدايىمەن تانىستى. اتاپ ايتقاندا, مەكتەپكە «قازاقستان حالقىنا» قورىنىڭ توراعاسى بولات جامىشەۆ, ءبىلىم بەرۋ سالاسىن تۇراقتى دامىتۋ قورى قامقورشىلىق كەڭەسىنىڭ باسشىسى كۇلاش ءشامشيدينوۆا, سونداي-اق جوبا دەمەۋشىلەرى «Aitas.kz» حولدينگىنىڭ وكىلدەرى كەلدى.
ب.جامىشەۆتىڭ ايتۋىنشا, جوبا اۋىلداعى ءبىلىم دەڭگەيىن ارتتىرۋعا باعىتتالعان: «زاڭدا «تىرەك مەكتەپ» ۇعىمى بار, بىراق زاڭ مۇنداي مەكتەپتىڭ نەمەن اينالىسۋى كەرەكتىگىن ناقتىلامايدى. بىزدىڭشە, بۇل مەكتەپتەردى زاماناۋي جابدىقتارمەن جاراقتاندىرۋمەن شەكتەلمەۋى كەرەك. مۇنداي مەكتەپتەر جاقىن ماڭداعى مەكتەپتەر ءۇشىن قۇزىرەتتىلىك ورتالىعىنا اينالۋعا ءتيىس. مەن بۇل مەكتەپتە جاڭا حيميا كابينەتى قانشا ساعات جۇمىس ىستەيتىنىن سۇراپ ءبىلدىم, ياعني اپتاسىنا ەڭ كوپ دەگەندە 8-10 ساعات قانا جۇمىس ىستەيدى. قالعان ۋاقىتتا بوس تۇرماۋى ءۇشىن كورشى مەكتەپتەردەن دە وسىندا وقۋشىلاردى تارتۋ كەرەك. ولار تەوريانى وزدەرىنەن ۇيرەنسىن, ال پراكتيكالىق, زەرتحانالىق ساباقتارعا وسىنداي تىرەك مەكتەپتەرگە كەلسىن. وعان قوسا ونلاين ساباقتار دا وتكىزۋ كەرەك. ونلاين فورمات – تەك ىندەت كەزىندە كەرەك فورمات ەمەس, سونىمەن قاتار وقۋشى ءۇشىن دە, مۇعالىم ءۇشىن دە ساباقتاردىڭ كۇندەلىكتى فورماتىنا اينالۋعا ءتيىس. ءبىزدىڭ جوسپارلارىمىزدى جۇزەگە اسىرۋعا وسى تۇرعىدا جيناقتالعان وڭ تاجىريبەسى بار نازارباەۆ زياتكەرلىك مەكتەپتەرى كومەكتەسەدى», دەدى ب.ءجامىشوۆ.
تۇراقتى ءبىلىم بەرۋدى دامىتۋ قورىنىڭ ديرەكتورى دانيار توقتارباەۆتىڭ ايتۋىنشا, قور 2019 جىلدان باستاپ قالالىق جانە اۋىلدىق مەكتەپتەردىڭ ءبىلىم ساپاسى اراسىنداعى الشاقتىقتى قىسقارتۋعا ءوز ۇلەسىن قوسىپ كەلەدى. جاڭا فورماتتا بۇل جوبا وتكەن جىلدان باستاپ ىسكە قوسىلدى.
ء«بىز تىرەك مەكتەپتەردى ءۇش باعىتتا دامىتامىز. ءبىرىنشىسى – مۇعالىمدەردىڭ بىلىكتىلىگىن ارتتىرۋ, تاجىريبە الماسۋ. بۇل باعىتتى نازارباەۆ زياتكەرلىك مەكتەپتەرى قاداعالايدى. ەكىنشى باعىت – ماتەريالدىق-تەحنيكالىق بازانى جاڭارتۋ. ءۇشىنشىسى – مەكتەپتەردى ادىستەمەلىك جاعىنان سۇيەمەلدەۋ. تىرەك مەكتەپ وزگە مەكتەپتەر ءۇشىن تارتىلىس ورتالىعىنا اينالادى. ولار ءبىلىم بەرۋ, ادىستەمەلىك جانە باسقا دا مىندەتتەردى بىرلەسىپ اتقاراتىن ءبىرتۇتاس كەشەن رەتىندە جۇمىس ىستەيدى», دەيدى دانيار توقتارباەۆ.
ايتا كەتەيىك, بۇگىندە ەلىمىزدە وسىنداي 80 مەكتەپ بار, تاعى 110 ءبىلىم وشاعىن اشىپ, جاراقتاندىرۋ جوسپارلانىپ وتىر. بۇگىندە جەتىسۋ وبلىسىندا «اۋىلدىق ايماقتارداعى تىرەك مەكتەپتەردىڭ الەۋەتىن ارتتىرۋ» جوباسىنا 2022-2023 جىلدارى 4 مەكتەپ تارتىلدى, ولاردىڭ ارقايسىسىن قايتا جابدىقتاۋعا 250 ملن تەڭگەدەن ءبولىندى. بۇلار – اقسۋ اۋدانىنداعى ە.سيقىموۆا اتىنداعى ورتا مەكتەپ, ەسكەلدى اۋدانىنداعى ك.شەستاكوۆ اتىنداعى ورتا مەكتەپ, سارقان اۋدانىنداعى اباي اتىنداعى گيمنازيا مەكتەبى جانە كەربۇلاق اۋدانىنداعى قوعالى ورتا مەكتەبى.
وبلىستىق ءبىلىم باسقارماسىنىڭ مالىمەتىنشە, بالالاردى باعدارلامالاۋعا, روبوتتەحنيكاعا, قۇراستىرۋعا ۇيرەتۋ مۇمكىندىكتەرىن ارتتىرۋ, ولارعا ينجەنەرلىك داعدىلار باعىتىندا قولجەتىمدى ساپالى ءبىلىم بەرۋ ءۇشىن «قازاقستان حالقىنا» قورىنىڭ, ينجەنەرلىك ءبىلىم بەرۋدى دامىتۋ» قورىنىڭ جانە «ارمان ينجينيرينگ» كومپانياسىنىڭ قولداۋىمەن «بولاشاق ينجەنەر-1» جوباسى ىسكە اسىرىلدى. سونىڭ شەڭبەرىندە الاكول, اقسۋ, سارقان, ەسكەلدى, كوكسۋ, قاراتال, كەربۇلاق اۋداندارىندا تاعى 7 مەكتەپ روبوتتەحنيكا جيىنتىعىمەن قامتاماسىز ەتىلدى. جىل سوڭىنا دەيىن «بولاشاق ينجەنەر-2» جوباسىنىڭ اياسىندا تەكەلى قالاسىنداعى تاعى ءبىر روبوتتەحنيكا كابينەتىن جابدىقتاۋ جوسپارلانىپ وتىر. وبلىس كولەمىندە جالپى سوماسى 71 ملن تەڭگەدەن استام ينۆەستيتسيا تارتىلاتىن بولادى.
جەتىسۋ وبلىسى
