ءا.سمايىلوۆ پرەزيدەنتتىڭ جارلىعىمەن مەملەكەتتىك قارجىنى باسقارۋدىڭ 2030 جىلعا دەيىنگى ارنايى تۇجىرىمداماسى بەكىتىلگەنىن اتاپ ءوتتى.
«مۇنداي كەشەندى قۇجات العاش رەت قابىلدانىپ وتىر. وندا قارجىنى باسقارۋ, ونىڭ ىشىندە مەملەكەتتىك قارىزدى باسقارۋ بويىنشا قاتاڭ مىندەتتەمەلەر بەلگىلەنگەن. ۇكىمەت ولاردى ۇستاناتىن بولادى», دەدى پرەمەر-مينيستر.
پرەمەر-ءمينيستردىڭ ايتۋىنشا, ۇكىمەت قازاقستاننىڭ بورىشتىق مىندەتتەمەلەرىن ازايتۋ بويىنشا بىرقاتار شارا قابىلداۋدا. بىرىنشىدەن, بيۋدجەت تاپشىلىعىن ازايتۋ كوزدەلىپ وتىر.
«سوڭعى ۋاقىتتا بيۋدجەت تاپشىلىعى ءىجو-گە شاققاندا شامامەن 3% بولدى. بيىل تاپشىلىق ءىجو-گە شاققاندا 2,7%-عا دەيىن تومەندەدى, ودان ءارى 2026 جىلعا قاراي كورسەتكىش 2,3%-عا دەيىن جەتكىزىلمەك. بۇل جاڭادان قارىز الۋدى شەكتەۋگە جانە قارىزدىڭ ءوسۋ قارقىنىن تومەندەتۋگە مۇمكىندىك بەرەدى», دەدى ءاليحان سمايىلوۆ.
ەكىنشىدەن, مەملەكەتتىك بيۋدجەتتىڭ كىرىستەرىن ۇلعايتۋ كوزدەلىپ وتىر. ول ءۇشىن سالىقتىق جانە كەدەندىك اكىمشىلەندىرۋدى تسيفرلاندىرۋ جونىندەگى جۇمىس جالعاساتىن بولادى.
«ۇشىنشىدەن, قارجى مينيسترلىگىنىڭ باعالى قاعازدارىن حالىقارالىق يندەكستەرگە قوسۋ كوزدەلگەن. بۇل قارىز الۋ قۇنىن جانە سايكەسىنشە قارىز بويىنشا قىزمەت كورسەتۋ شىعىندارىن ازايتۋ ءۇشىن قور نارىعىنا حالىقارالىق ينۆەستورلاردى تارتۋعا مۇمكىندىك بەرەدى», دەدى پرەمەر-مينيستر.
ءاليحان سمايىلوۆ ۇكىمەت ارتىق ۆاليۋتالىق تاۋەكەلدەردى جويۋ جانە قارىز بويىنشا قىزمەت كورسەتۋ شىعىندارىن ودان ءارى ازايتۋ ءۇشىن كوبىنە ىشكى نارىقتا قارىز الۋ ساياساتىن قابىلداعانىن ايتتى.
«وسى شارالاردىڭ بارلىعىن ءبىز ۇكىمەتتە تۇراقتى تۇردە تالقىلاپ كەلەمىز. بارلىق مىندەتتەمەنىڭ ساقتالۋىن قاداعالاپ وتىرمىز. جاڭا بيۋدجەت كودەكسى اياسىندا پارلامەنتكە قارىزدى باسقارۋ بويىنشا تالدامالىق اقپارات ۇسىنۋدى جوسپارلاپ وتىرمىز», دەپ تۇيىندەدى ءاليحان سمايىلوۆ.
